ޑިމޮކްރަޓްސްއިން ހުށަހަޅަނީ މިމަހުގެ 25 ވަނަ ދުވަހު ވެރިކަމުގެ ނިޒާމީ ވޯޓަކަށް ދިޔުމަށް
ދަ ޑިމޮކްރެޓްސްގެ ރިޔާސީ ކެންޑިޑޭޓް، އިލްޔާސް ލަބީބު
ރިޔާސީ އިންތިޚާބުގެ ދެވަނަ ބުރުގައި އެކުގައި މަސައްކަތްކުރުމަށް ޕީޕީއެމް/ޕީއެންސީ ކޯލިޝަނާއެކު މަޝްވަރާތައް ކުރިޔަށްދިޔަކަމަށާއި, ނަމަވެސް އެ ވާހަކަތައް ކުރިޔަށްނުދަނީ އެއްވެސް ކަމަކާ އެއްބަސްވެ، އެއްބަސްވުމެއްގައި ސޮއިކުރުމަށް ޕީޕީއެމް/ޕީއެންސީން ދެކޮޅުހަދާތީކަމަށް ޑިމޮކްރަޓްސްއިން ބުނެފިއެވެ.
ޑިމޮކްރަޓްސްއިން ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ވަގުތީ ޗެއަރޕަރސަން ހަސަން ލަތީފް ވިދާޅުވީ، އެހެންވުމުގެ ސަބަބުން ޕީޕީއެމްއާއެކު ވާހަކަތައް ކުރިޔަށްގެންދިޔުމަށް ދަތިކަމަށެވެ. ނިމިގެންދިޔަ ރިޔާސީ އިންތިޚާބުގެ ފުރަތަމަ ބުރުގައި ތިންވަނައަށް އެންމެ ގިނަ ވޯޓު ހޯއްދަވާފައިވަނީ ޑިމޮކްރަޓްސްގެ ރިޔާސީ ކެންޑިޑޭޓެވެ.
ހަސަން ލަތީފް ވިދާޅުވީ ޑިމޮކްރަޓްސްއިން ޕާޓީތަކަށް ހުށަހަޅަނީ ވެރިކަމުގެ ނިޒާމު ބަދަލުކުރަންކަމަށެވެ. މަޝްވަރާތަކުގައި ޕީޕީއެމް/ޕީއެންސީ ކޯލިޝަނުން އެއްވެސް ލިޔުމެއްގައި ސޮއިކުރަން ބޭނުންނުވާކަމަށާއި އެހެންކަމުން އެއީ އެކަމުގައި ސީރިއަސްކަމެއް ހުރި ކަމެއްކަމަށް ނުބެލެވޭކަމަށް ހަސަން ލަތީފް ވިދާޅުވިއެވެ.
އެހެންކަމުން މިހާރު ޕީޕީއެމް/ޕީއެންސީ ކޯލިޝަނާއެކު މަޝްވަރާތައް ކުރިޔަށް ނުދާކަމަށް ހަސަން ލަތީފް ވިދާޅުވިއެވެ.
މީގެއިތުރުން މިކަމާ ގުޅޭގޮތުން އެމްޑީޕީއާއެކު ނުރަސްމީ ސިފައެއްގައި މަޝްވަރާތައް ކުރިޔަށްދާކަމަށާއި، ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓަކަށް ދިޔުމާމެދު އެމްޑީޕީން އެއްބަސްވެސް އަދި ދެބަސްވެސް ނުވާކަމަށް ހަސަން ލަތީފް ވިދާޅުވިއެވެ. ހަސަން ލަތީފް ވިދާޅުވީ މަޝްވަރާތައް އެމްޑީޕީއާއެކު ކުރިޔަށްދާކަމަށާއި ނަމަވެސް އެއީ ދިގުލައިގެންދާ މަޝްވަރާތަކެއްކަމަށް ހެދެން ޑިމޮކްރަޓްސްއަށް ނޯންނާނެކަމަށެވެ.
ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުން އެއީ ޑިމޮކްރަޓްސް ގަބޫލުކުރާ މައިގަނޑު އެއް އަސާސްކަމަށް ވާއިރު، ހަސަން ލަތީފް ވިދާޅުވީ ޑިމޮކްރަޓްސްއިން ހުށަހަޅަނީ މިމަހުގެ 25 ވަނަ ދުވަހު ނިޒާމީ ވޯޓަކަށް ދިޔުމަށްކަމަށެވެ. އަދި އެވޯޓު ނެގުމުގައި މިއޮތް މުއްދަތުގެ ތެރޭގައި އިދާރީގޮތުން ވާންޖެހޭ ތައްޔާރީތަކަށްވެސް، އަދި އެކަމާ ގުޅޭގޮތުން ރައްޔިތުން ހޭލުންތެރި ކުރުވުމަށްވެސް ބޮޑެތި ދަތިތަކެއް ހުންނާނެކަމަށް ޑިމޮކްރަޓްސްއިން ގަބޫލުނުކުރާކަމަށް ހަސަން ލަތީފް ވިދާޅުވިއެވެ.
