މަޖިލީހުގެ މެންބަރުން ނިސްބަތްވާ ގޮތަށް އައި ބަދަލު އިއުލާންކޮށްފި

ރައްޔިތުންގެ މަޖިލީހުގެ މެންބަރުން ނިސްބަތްވާ ގޮތަށް އައި ބަދަލު ހާމަކޮށްފިއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވީ ރައްޔިތުންގެ މަޖިލީހުގެ ދަފްތަރުގައި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުންގެ ތެރޭގައި ތިއްބެވި ކާށިދޫ ދާއިރާގެ މެންބަރު އަބްދުﷲ ޖާބިރާއި، ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް އަދި ތޮއްޑޫ ދާއިރާގެ މެންބަރު ހަސަން ޝިޔާން، ދިވެހިރައްޔިތުންގެ ޑިމޮކްރަޓިކް ޕާޓީއާއި ގުޅިވަޑައިގެންފައިވާކަން އަންގަވާފައިވާ ކަމަށެވެ. އަދި އެ މެންބަރުންގެ ނަންތައް އިލެކްޝަންސް ކޮމިޝަނުން ބަލަހައްޓަމުން ގެންދާ ދިވެހިރައްޔިތުންގެ ޑިމޮކްރަޓިކް ޕާޓީގެ ދަފްތަރުގައި ހިމަނާފައިވާކަން އެ ކޮމިޝަނުން އަންގާފައިވާ ކަމަށެވެ.

ނަޝީދު ވިދާޅުވީ މި ބަދަލާއި ގުޅިގެން ސިޔާސީ ޕާޓީތަކުގައި ހިމެނޭ މެންބަރުންނާއި ވަކި ޕާޓީއަކަށް ނިސްބަތްނުވާ މެންބަރުންގެ ބަހުސްގެ ވަގުތުތަކަށް ބަދަލު ގެނެސްފައިވާ ކަމަށެވެ. އަދި މަޖިލީހުގެ ދާއިމީ ކޮމިޓީތަކުގައި މެންބަރުން ހިމެނިވަޑައިގަންނަވާގޮތަށް އަންނާނެ ބަދަލު ފާސްކުރުމަށް ހުށަހަޅުއްވާނެ ކަމަށެވެ.