ސަބަބުތައް ދެނެގަނެވިއްޖެ، "މީތި އަނބުރާލާ ބޮޑުތަނުން ކާމިޔާބުކުރެވޭނެ" - ރައީސް

ފުރަތަމަ ބުރުގައި ދިމާވި މައްސަލަތަކުގެ ސަބަބުތައް ދެނެގަނެވިއްޖެ ކަމަށާއި، "މީތި އަނބުރާލާ" ރިޔާސީ އިންތިހާބުގެ ދެވަނަ ބުރުގައި ބޮޑުތަނުން ކާމިޔާބު ހޯއްދަވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

ރިޔާސީ އިންތިހާބުގެ ފުރަތަ ބުރުގެ ވޯޓަށްފަހު ފުރަތަމަ ފަހަރަށް ސަޕޯޓަރުންނާއި ބައްދަލުކުރައްވާ ރައީސް ވިދާޅުވީ އެމްޑީޕީއާއި ގުޅިފައިވާ ޕާޓީތަކުގެ މެންބަރުން ކުރެއްވި ބުރަ މަސައްކަތަކީ ގައުމަށްޓަކައި ކުރެއްވި މަސައްކަތެއް ކަމަށެވެ. އެއީ ރައްޔިތުންނަށްޓަކައި ކުރެއްވި މަސައްކަތެއް ކަމަށާއި، އަމާޒަކީ އަނެއްކާވެސް މި ރާއްޖެ ކުރީގައި އޮތް ބިރުވެރިކަމުގެ ތެރެއަށް ދިޔަ ނުދިނުމަށް މަސައްކަތް ކުރެއްވުން ކަމަށެވެ.

ރައީސް ވިދާޅުވީ އަނެއްކާވެސް ފަށައިގަންނަނީ 9 ޖުލައިގައި ފެށި މަސައްކަތް ކަމަށާއި، އެއީ ރާއްޖެ ތަަރައްގީކުރުމަށްޓަކައި ހިފައިގެން ނުކުތް މެނިފެސްޓޯ ތަންފީޒުކުރުމުގެ މަސައްކަތް ކަމަށެވެ. ރައީސް ވިދާޅުވީ ކުރެއްވި ބުރަ މަސައްކަތުން އެ ނަތީޖާ ފުރަތަމަ ބުރުގައި ނުކުތީ އެއްވެސް މީހަކު ބޭނުންވި ގޮތަކަށް އަދި އުއްމީދުކުރި ގޮތަކަށް ނޫން ކަމަށެވެ.

ރައީސް ވަނީ ފަހަތަށް ޖެހިވަޑައިނުގެން ކުރިއެކޭ އެއްގޮތަށް ކުރިއަށް ވަޑައިގެންނެވުމަށް ސަޕޯޓަރުންގެ ކިބައިން އެދިވަޑައިގަންނަވާފައެވެ.

ރައީސް ވިދާޅުވީ ކޮންމެ ރައްޔިތެއްގެވެސް ވޯޓަކީ މުހިންމު ވޯޓެއް ކަމަށާއި، މިފަހަރު ނުކުންނަނީ އެ ހޯއްދަވަން ކަމަށެވެ. ނަތީޖާ ބަދަލުކުރުމަށް ބޭނުންވަނީ އެންމެ ވޯޓެއް ކަމަށާއި، ދެވަނަ ބުރުގައި ކޮންމެވެސް އެކަކަށް ވޯޓުލާނެ ކަމަށާއި، ބޭނުންވަނީ 50 އިންސައްތައާއި 1 ވޯޓު ކަމަށެވެ. އެއީ ކޮންމެ ބޭފުޅެއްގެ ވޯޓަކަށް ވެސް ވެދާނެ ކަަމަށެވެ.

ރައީސް ވިދާޅުވީ މިއީ ރާއްޖޭގެ ތާރީހުގައި އެންމެ މަދުން މީހުން ވޯޓުލީ ފަހަރު ކަމަށާއި، މަސައްކަތް ކުރެވިއްޖެނަމަ ރަނގަޅު ނަތީޖާއެއް ނެރެވޭނެ ކަމަށެވެ. ރައީސް ވިދާޅުވީ އެމަނިކުފާނަށް ތާއިދުކުރައްވާ އެތައް ބައަކަށް ވޯޓު ނުލެވި އެބަހުރި ކަމަށާއި، އެ ސަބަބުތައް ދެނެގަނެ ލިސްޓް ތައްޔާރުކުރެވިއްޖެ ކަމަށާއި، އެއާ އެކީގައި ކުރިއަށް ވަޑައިގެން "މީތި އަނބުރާލާ" ބޮޑުތަނުން އިންތިހާބު ކާމިޔާބުކުރެވޭނެ ކަމަށެވެ.