ދެވަނަ ބުރުގައި ވޯޓުލާ ބޫތުތަކުގެ ޑިޒައިނަށް ބަދަލުގެންނާނަން: އީސީ

ރިޔާސީ އިންތިޚާބުގެ ދެވަނަ ބުރުގައި ވޯޓުލާއިރު ވޯޓުގެ ސިއްރުކަން ކަށަވަރުކުރުމުގެ ގޮތުން ވޯޓިންގ ބޫތުތަކުގެ ޑިޒައިންތަކަށް ބަދަލު ގެންނާނެކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

އިންތިޚާބީ މަރުކަޒު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ކޮމިޝަންގެ ނާއިބު ރައީސް އިސްމާއީލު ހަބީބު ވިދާޅުވީ ވޯޓުލާ މަރުކަޒުތަކުގައި ބޫތު ބެހެއްޓިފައިވާ ގޮތުން ވޯޓުގެ ސިއްރުކަން ގެއްލޭކަން ބައެއް ފަރާތްތަކުން ފާހަގަކުރިކަމަށެވެ. ނަމަވެސް ޤައުމީ ލަފާދޭ ކޮމިޓީގައި ބޮޑެތި ސިޔާސީ ޕާޓީތަކުން ފާހަގަކުރިގޮތުގައި މިފަހަރު ބޫތު ބެހެއްޓިގޮތުން ވޯޓުގެ ސިއްރުކަން ކަށަވަރުކުރުމަށް ވަރަށް ގިނަ ކަންތައްތަކެއް ބެލިގެންގޮސްފައިވާކަމަށެވެ. އަދި އެކަން ކޮމިޝަނަށް ވެސް ކަށަވަރުކުރެވުނު ކަމަށް ހަބީބު ވިދާޅުވިއެވެ.

ހަބީބު ވިދާޅުވީ ކުރީ އިންތިޚާބުތަކުގައި ވޯޓުލާ މީހާގެ ހަރަކާތްތައް ނުފެންނާތީ ލާ ވޯޓަކީ އޭނާގެ މައްޗަށް އެހެން ނުފޫޒެއްނެތި ލާ ވޯޓެއްކަމާމެދު ޝައްކުވާކަމަށެވެ. ނަމަވެސް މިފަހަރު ވޯޓުލާ ބޫތުތަކަށް ބަދަލު ގެނައި ގޮތުން ވޯޓުލާ މީހާގެ ހަރަކާތްތައް ގާތުން ބެލޭކަމަށެވެ. ނަމަވެސް ވޯޓުލާ މަރުކަޒުތައް ހުންނަނީ ކުދިކުދި ކްލާސްރޫމްތަކުގައި ކަމުން ވޯޓުކަރުދާސް ފެނުމުގެ ފުރުސަތު އޮންނަކަމަށް ހަބީބު ވިދާޅުވިއެވެ.

މީގެއިތުރުން ބައެއް ކަހަލަ ކަންކަމުގައި ވޯޓުލާ މަރުކަޒުތަކުގެ އެހީތެރިންނާއި އޮފިޝަލުން އަމަލުކުރި ގޮތް ތަފާތުކަމަށް ފާހަގަކުރެވުނު ކަމަށާއި ދެވަނަ ބުރުގައި އެކަހަލަ ކަންކަމާއި ގުޅޭގޮތުން އޮފިޝަލުންނަށް އިތުރު ތަމްރީން ދޭނެކަމަށް ހަބީބު ވިދާޅުވިއެވެ.

އެގޮތުން ވޯޓުލާ ކަރުދާހުގެ ސައްހަކަމާމެދު އެއްގޮތަކަށް ހުރިހާ މަރުކަޒުތަކެއްގައި އަމަލުކުރުމަށް އިރުޝާދުދޭނެކަމަށް ހަބީބު ވިދާޅުވިއެވެ.

މީގެއިތުރުން ވީލްޗެއަރ ގައި އަންނަ ފަރާތްތަކަށް ވޯޓުލުމުގައި ފަސޭހަ އިންތިޒާމުތަކެއް ހަމަޖައްސާނެކަމަށާއި ޚާއްސަ އެހީއަށް ބޭނުންވާ ފަރާތްތަކަށް ކިޔުގައި ނުޖެހި ވޯޓުލެވޭނެ ގޮތަކާމެދު މަޝްވަރާކޮށްފައިވާކަމަށާއި އެކަންކަން ދެ ވަނަ ބުރުގައި ރަނގަޅުކުރެވޭނެކަމަށް ހަބީބު ވިދާޅުވިއެވެ.

މީގެއިތުރުން ވޯޓު ލާއިރު އެހީތެރިކަން ފޯރުކޮށްދެވޭނެ ކަމަށް ގާނޫނުގައި ބުނަނީ ތިން ހާލަތެއްގައިކަމަށް ހަބީބު ވިދާޅުވިއެވެ. އެއީ އެމީހެއްގެ ދެ އަތުން ކުރެ އެއްވެސް އަތަކުން ފާހަގަނުޖެހޭ މީހާ އާއި ލޮލަށް ނުފެންނަ މީހާ އާއި މުސްކުޅިވެ ގައިބާރު ދެރަވުމުގެ ސަބަބުން ފާހަގަނުޖެހޭ މީހާކަމަށް ހަބީބު ވިދާޅުވިއެވެ.

އޯޓިޒަމް ކުދިންނާއި ވީލްޗެއަރގައި އަންނަ ކުދިންނާއި ލިޔަންކިޔަން ނުދަން މީހުންނަށް އެހީތެރިކަން ފޯރުކޮށްދެވޭނެކަމަށް ގާނޫނުގައި ބުނެފައިނުވާކަމަށް ހަބީބު ވިދާޅުވިއެވެ. އެހެންކަމުން އެފުރުސަތު ހަމަޖައްސައިދެވެން ނޯންނާނެކަމަށް ހަބީބު ވިދާޅުވިއެވެ.

މީގެއިތުރުން ދެވަނަ ބުރުގައި ބޭރުގައި އިތުރު ފޮށި ބެހެއްޓުމަށާއި ރިސޯޓްތަކުގައި އިތުރު ވޯޓު ފޮށި ބެހެއްޓުމަށް އެދިފައިވާކަމަށް ހަބީބު ވިދާޅުވިއެވެ. ނަމަވެސް މިހާރު މިއޮތް ވަގުތަށް ބަލާއިރު އެއީ ކުރެވޭނެ ކަމެއް ނޫންކަމަށް ހަބީބު ވިދާޅުވިއެވެ.