އިންތިޚާބުގެ ދެވަނަ ބުރު ބޭއްވުމަށް 44 މިލިއަން ރުފިޔާ ބޭނުންވޭ: އީސީ
ބަޖެޓް ދިނުމަށް އެދި ބުދަ ދުވަހު ފިނޭންސް މިނިސްޓްރީއަށް ހުށަހަޅާނެ
ވޯޓު ގުނުމުގެ މަސައްކަތްތައް ދަނީ ކުރަމުން
ރިޔާސީ އިންތިޚާބުގެ ދެވަނަ ބުރުގައި ވޯޓުލުމުގެ ކަންކަން ކުރިޔަށްގެންދިޔުމަށް 44 މިލިއަން ޚަރަދުވާނެކަމަށް ލަފާކުރެވޭކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.
އަންގާރަ ދުވަހު އީސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވީ ދެވަނަ ބުރަށް ބޭނުންވާ ބަޖެޓް މިހާރު ކޮމިޝަނުން ތައްޔާރުކޮށްފައިވާކަމަށެވެ. އަދި 44 މިލިއަން ރުފިޔާ ޚަރަދުވާނެކަމަށް ބެލެވޭއިރު ބަޖެޓް ދިނުމަށް އެދި ބުދަ ދުވަހު ފިނޭންސް މިނިސްޓްރީއަށް ހުށަހަޅާނެކަމަށް ހަބީބު ވިދާޅުވިއެވެ.
ހަބީބު ވިދާޅުވީ ދެވަނަ ބުރަށް ވޯޓު ކަރުދާސް ޗާޕުކޮށް ދަތުރުފަތުރުގެ ކަންކަންކުރެވޭނީ ފައިސާ ހަމަޖެހިގެންކަމަށެވެ.
ރިޔާސީ އިންތިޚާބު ބޭއްވުމަށް އިލެކްޝަންސް ކޮމިޝަނުން މަޖިލީހަށް ހުށައެޅީ 120 މިލިއަން ރުފިޔާގެ ބަޖެޓެކެވެ. އެއީ އިންތިޚާބުގެ ފުރަތަމަ ބުރަށް 95 މިލިޔަން ރުފިޔާ އަދި ދެވަނަ ބުރު ބާއްވަން ޖެހިއްޖެނަމަ 25 މިލިޔަން ރުފިޔާގެ ބަޖެޓެއް ކަނޑައެޅުއްވިއެވެ. އެހެންނަމަވެސް ރައްޔިތުންގެ މަޖިލީހުން މިއަހަރުގެ ބަޖެޓުގައި ހިމެނުމަށް ފާސްކުރީ 90 މިލިއަން ރުފިޔާގެ ބަޖެޓެކެވެ.
މިފަހަރުގެ އިންތިޚާބުގައި 574 ވޯޓު ފޮއްޓެއް ބަހައްޓާއިރު ރާއްޖެއިން ބޭރުގައި 8 ފޮށި ބަހައްޓާފައިވެއެވެ.
