ދެވަނަ ބުރުގައި ވޯޓުލާން ރީރަޖިސްޓްރީކުރުން މިމަހުގެ 15ން 17ށް
ސެޕްޓެމްބަރ 15، 16 އަދި 17 ވަނަ ދުވަހު ރީރަޖިސްޓްރީކުރުމުގެ ފުރުސަތު އޮންނާނެ
އިންތިޚާބާބެހޭ މަރުކަޒު
ސެޕްޓެމްބަރ މަހުގެ 30 ވަނަ ދުވަހު އޮންނަ ރިޔާސީ އިންތިޚާބުގެ ދެވަނަ ބުރުގައި ވޯޓުލާން ރީރަޖިސްޓްރީކުރަން ބޭނުންވާ ފަރާތްތަކަށް އެފުރުސަތު މިމަހުގެ 15ން 17ށް ހުޅުވާލާނެކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.
އަންގާރަ ދުވަހު އިންތިޚާބީ މަރުކަޒު ދަރުބާރުގޭގައި އީސީން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވީ ސެޕްޓެމްބަރ 15، 16 އަދި 17 ވަނަ ދުވަހު ރީރަޖިސްޓްރީކުރުމުގެ ފުރުސަތު އޮންނާނެކަމަށެވެ. އެފުރުސަތުގައި ވޯޓުލާން ބޭނުންވާ ތަން ބަދަލުކުރަން ބޭނުންވާ ފަރާތްތަކަށް އިންތިޚާބީ މަރުކަޒަށް އައިސް ފޯމު ހުށަހަޅައިގެންނާއި އޮންލައިންކޮށްވެސް ފޯމު ހުށަހެޅޭނެކަމަށް ހަބީބު ވިދާޅުވިއެވެ.
މީގެއިތުރުން ހަބީބު ވިދާޅުވީ އޮބްޒަރވަރުންނާއި މޮނިޓަރުންނާއި ކެންޑިޑޭޓުންގެ މަންދޫބުންނަށްވެސް ރަޖިސްޓްރީވުމަށް އިތުރު ފުރުސަތު ހުޅުވާލާނެކަމަށެވެ. ނަމަވެސް އެފަރާތްތަކަށް ޖެހޭނީ ފޯމު ހުށަހަޅަންކަމަށާއި އޮންލައިންކޮށް ފޯމު ހުށަހެޅުމުގެ ފުރުސަތު ނޯންނާނެކަމަށް ހަބީބު ވިދާޅުވިއެވެ.
މީގެއިތުރުން ހަބީބު ވިދާޅުވީ ބައެއް ސިޔާސީ ޕާޓީތަކާއި މީޑިޔާތަކަށް މިހާރު ވަނީ ގާނޫނުގައި ބުނާ އަދަދަށް ފާސްތައް ދޫކޮށް ނިމިފައިކަމަށާއި އެހެންކަމުން އެފަރާތްތަކަށް ދެން އިތުރު ފާސްތައް ދޫނުކުރެވޭނެކަމަށެވެ. ނަމަވެސް މީހުން އެކި ތަންތަނަށް ބަދަލުކުރުމުގެ ފުރުސަތު އޮންނާނެކަމަށް ހަބީބު ވިދާޅުވިއެވެ. ގާނޫނުގައި ބުނާ އަދަދަށް ހަމަނުވާ ސިޔާސީ ޕާޓީތަކާއި މީޑިޔާތަކަށް އިތުރު ފުރުސަތު ދޭނެކަމަށް ހަބީބު ވިދާޅުވިއެވެ.
