ރިޔާސީ އިންތިޚާބުގެ ދެވަނަ ބުރުގެ ވޯޓުލުން ހެނދުނު 8ން ހަވީރު 5ށް
ވަގުތު އިތުރުކުރީ އިންތިޚާބުގެ ފުރަތަމަ ބުރުގައި ވޯޓުލީ މީހުންގެ ނިސްބަތް އެހެން ރިޔާސީ އިންތިޚާބުތަކާއި އަޅާބަލާއިރު މަދުކަމަށް ރިކޯޑް ކުރެވިފައިވާތީ
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގެ ތެރެއިން
ސެޕްޓެމްބަރ މަހުގެ 30 ވަނަ ދުވަހު އޮންނަ މިއަހަރުގެ ރިޔާސީ އިންތިޚާބުގެ ދެވަނަ ބުރުގައި ވޯޓުލުން ކުރިޔަށްގެންދިޔުމަށް ހަމަޖެހިފައިވަނީ ހެނދުނު 8ން ހަވީރު 5ށް ކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.
އަންގާރަ ދުވަހު އީސީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކޮމިޝަންގެ ރައީސް ފުއާދު ތައުފީގު ވިދާޅުވީ ވޯޓުލާ ނިމި ވޯޓު ފޮށިތައް ބަންދުކުރާތާ 30 މިނެޓް ފަހުން ވޯޓު ގުނަންފަށާނެކަމަށެވެ.
ވަގުތު އިތުރުކުރުމާއި ގުޅޭގޮތުން ވާހަކަދައްކަވަމުން އީސީގެ ނައިބު ރައީސް އިސްމާއީލު ހަބީބު ވިދާޅުވީ އިންތިޚާބު އޮބްޒަރވްކުރަން އައި ބޭރުގެ ފަރާތްތަކާއެކު ބައްދަލުވުންތައް ބާއްވާ ރަނގަޅުކުރަންޖެހޭ ކަންކަން ސާފުކޮށް މަޝްވަރާކޮށްފައިވާކަމަށެވެ. އަދި އިންތިޚާބުގެ ފުރަތަމަ ބުރުގައި ވޯޓުލީ މީހުންގެ ނިސްބަތް އެހެން ރިޔާސީ އިންތިޚާބުތަކާއި އަޅާބަލާއިރު މަދުކަމަށް ރިކޯޑް ކުރެވިފައިވާތީ ކޮމިޝަންގެ ލަފާދޭ ކޮމިޓީގެ މަޝްވަރާއާއެކު ވޯޓުލުން ހަވީރު 4 އާ ހަމައަށް އޮތްއޮތުމަށް އެއް ގަޑިއިރު އިތުރުކޮށް ހަވީރު 5 ޖަހަންދެން ވޯޓުލެވޭ ގޮތަށް ބަދަލުކުރީކަމަށެވެ.
އެއާއެކު ގިނަ ބަޔަކަށް ވޯޓުލެވޭނެކަމަށް ބެލެވޭކަމަށް ހަބީބު ވިދާޅުވިއެވެ. ހަބީބު އިތުރަށް ވިދާޅުވީ ދެން ވޯޓުލާ ވަގުތު އިތުރުނުކުރާނެކަމަށެވެ.
ފުރަތަމަ ބުރުގައި ވޯޓުލުން ކުރިޔަށް ގެންގޮސްފައިވަނީ ހެނދުނު 8ން ހަވީރު 4 ޖެހުމާ ހަމައަށެވެ. ހަބީބު ވިދާޅުވީ ގިނަ މަރުކަޒުތަކުގައި ކިޔުއަށް ބާރު ބޮޑުވެފައިވަނީ 3:30 އާއި 4 އާ ދެމެދުކަމަށެވެ. އެހެންކަމުން ދުރާލާ ވޯޓުލާން އައުމަށް ކޮމިޝަނުން ވަނީ އިލްތިމާސްކޮށްފައެވެ.
