މޮރޮކޯއަށް އެހީވުމަށް އިންޓަނޭޝަނަލް އެއިޑް ކެމްޕެއިނުން އެދިއްޖެ
މި ހިތާމަވެރި ދަނޑިވަޅުގައި އެންމެން އެކަތިގަނޑަކަށްވެ، މޮރޮކޯގެ ރައްޔިތުންނަށް ވެވުނު ގޮތަކުން އެހީވުމަށް އެދިފައިވޭ
ޖަމިއްޔާތަކާއެކު އިންޓަނޭޝަނަލް އެއިޑް ކެމްޕެއިނުން ބޭއްވި ބައްދަލުވުމުގެ ތެރެއިން
މޮރޮކޯއަށް އެހީވުމަށް އިންޓަނޭޝަނަލް އެއިޑް ކެމްޕެއިނުން އެދިއްޖެއެވެ.
މޮރޮކޯގެ މެދުތެރޭގެ ހިސާބުތަކަށް ހުކުރު ދުވަހުގެ ރޭ ދަންވަރު އައި ބާރުގަދަ ބިންހެލުމުގައި މަރުވި މީހުންގެ އަދަދު 2،800ން މައްޗަށް ވަނީ އަރާފައެވެ.
އިންޓަރނޭޝަނަލް އެއިޑް ކެމްޕެއިނުން ބުނީ މި ހިތާމަވެރި ދަނޑިވަޅުގައި އެންމެން އެކަތިގަނޑަކަށްވެ، މޮރޮކޯގެ ރައްޔިތުންނަށް ވެވުނު ގޮތަކުން އެހީވުމަށް އެދޭ ކަމަށެވެ.
މޮރޮކޯއަށް ދިމާވި ވަރުގަދަ ބިންހެލުމާ ގުޅިގެން އިންޓަރނޭޝަނަލް އެއިޑު ކެންޕެއިނުން ހުޅުވާލާފައިވާ އެމަރޖެންސީ ރިލީފް އިތުރަށް ފުޅާކޮށް، ދިވެހީންގެ ބައިވެރިވުން އިތުރު ކުރުމަށްޓަކައި ޖަމްއިޔާތަކާއި ބައްދަލުކުރަމުންދާ ކަމަށް އެ ޖަމިއްޔާއިން ވަނީ ބުނެފައެވެ. އަދި އެ ހަރަކާތުގައި އެކި ޖަމިއްޔާތަކާއި ކުލަބްތަކުން ބައިވެރިވަމުންދާ ކަމަށް ވެސް ވަނީ ބުނެފައެވެ.
އިންޓަރނޭޝަނަލް އެއިޑް ކެންޕެއިންގެ ހަރަކާތާއި ގުޅޭ ޖަމިއްޔާތައް ދަނީ ޝޯސަލް މީޑިއާގައި ހާމަކުރަމުންނެވެ.
މި ކާރިސާގައި މޮރޮކޯގެ މަރަކޭޝްއާއި އޭގެ ދެކުނުގެ ބައެއް ހިސާބުތަކުން ވަރަށް ގިނަ އަދަދެއްގެ މީހުން ވަނީ މަރުވެފައެވެ. ބިންހެލުމުގައި މަރަކޭޝް އޯލްޑް ސިޓީގެ ބައެއް އިމާރާތްތައްވެސް ވަނީ ބިމާ ހަމަވެފައެވެ.
ބިންހެލުމުގެ އަސަރު 350 ކިލޯމީޓަރު ދުރުގައިވާ ވެރިރަށް ރަބާތުއާއި ކަސަބްލަންކާގެ އިތުރުން، އަވައްޓެރި އަލްޖީރިއާއަށްވެސް ކޮށްފައިވާ ކަމަށް ރިޕޯޓުތައް ބުނެއެވެ.
