ޣައްޒާއަށް ދަތިކުރުމުގެ ފިޔަވަޅުތައް އަޅާފައި ވީނަމަވެސް އެހީ ފޯރުކޮށްދިނުން ކުރިއަށްދާކަމަށް އިންޓަނޭޝަނަލް އެއިޑް ކެމްޕެއިން (އައިއޭސީ)ން ބުނެފިއެވެ.

ޣައްޒާއަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، ގްރައުންޑް މީޑިއާ ލިބުމުގައި ދަތިތަކެއް ހުރިނަމަވެސް، އެހީ ފޯރުކޮށްދިނުން ކުރިއަށްދާކަމަށް އައިއޭސީ ވަނީ ބުނެފައެވެ.

އެގޮތުން، މިވަގުތަށް އެންމެ ބޭނުންޖެހިފައިވާ ތަކެތިކަމުގައިވާ، ހޮސްޕިޓަލްތަކަށް ބޭނުންވާ ފިއުލް، ބޭސް, ޓެންޓު އަދި ކެއްކި ތާޒާ ކެއުން (ހޮޓް މީލް ޕެކޭޖް) ފުޑް ޕެކޭޖް ދަނީ ފޯރުކޮށްދެމުންނެވެ. އިމަޖެންސީ ހާލަތްތަކުގައި އައިއޭސީގެ މަސައްކަތްތައް ދާނީ، އެ ޖަމާއަތުން އަބަދުވެސް ހިފަހައްޓަމުން ގެންދާ މިންގަނޑުގެ ތެރެއިން ބެލެހެއްޓިގެން ކަމަށްވެސް ވަނީ ބުނެފައެވެ.

މީގެ އިތުރުން، އެ ޖަމާއަތުގެ މި މަސައްކަތުގައި ހުރިހާ ފަރާތްތަކުންވެސް ބައިވެރިވުމަށް ވަނީ ގޮވާލާފައެވެ. އެގޮތުން، އެހީ ފޯރުކޮށްދިނުމަށް:

ބީއެމްއެލް އިސްލާމިކް އެކައުންޓް ނަމްބަރު: 7770000062741 އެކައުންޓް ނަން:International Aid Campaign އަށް އެހީ ފޮނުވޭނެއެވެ.

ހޮނިހިރު ދުވަހުން ފެށިގެން އިސްރާއީލުގެ އަސްކަރިއްޔާއިން ދަނީ ޣައްޒާގެ އެކި ސަރަހައްދުތަކަށް، ހުއްޓުމެއްނެތި ވަރުގަދަ ވައިގެ ހަމަލާތައް ދެމުންނެވެ. އިސްރާއީލުގެ އަސްކަރިއްޔާގެ އޮފިސަރުން ދަނީ ޣައްޒާއާއި އިސްރާއީލް ގުޅޭ ބޯޑަރު ސަރަހައްދުގައި ހުރި، ހަމާސްއިން ކޮންޓްރޯލް ނަގާފައިވާ އަވަށްތަކަށް އަރައި އެތަންތަނަށް ހަމަލާދީ، އެ އަވަށްތަކުގެ ކޮންޓްރޯލް ނެގުމުގެ މަސައްކަތްވެސް ކުރަމުންނެވެ.

މި ހަނގުރާމައަށް ހަމާސް ޖަމާއަތުން ނަން ދީފައިވަނީ "އޮޕަރޭޝަން އަލް-އަގްސާ ފްލަޑް"ގެ ނަމުންނެވެ. އަދި އިސްރާއީލުން ވަނީ ރައްދު ހަމަލާތައް ދޭން ފަށައި، "އޮޕަރޭޝަން އަޔަން ސްވޯޑްސް" އިއުލާންކޮށްފައެވެ.