ފޯމު ފުރައިގެން އަދި އޮންލައިންކޮށްވެސް ފޯމު ހުށަހެޅުމުގެ ފުރުސަތު ހުޅުވާލާނެ
އިންތިޚާބާބެހޭ މަރުކަޒު
ރިޔާސީ އިންތިޚާބުގެ ދެވަނަބުރުގެ ރީ-ރެޖިސްޓްރޭޝަންގައި ބޭނުންކުރާނީ ފުރަތަމަ ބުރުގައި ވެސް ބޭނުންކުރި ފޯމު ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީގެ ނާއިބުރައީސް އިސްމާޢީލް ހަބީބް ކުރެއްވި ޓުވީޓެއްގައި ވިދާޅުވީ ފޯމު ފުރައިގެން އަދި އޮންލައިންކޮށްވެސް ފޯމު ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލާނެ ކަމަށެވެ.
ސެޕްޓެމްބަރު 30ށް 18 އަހަރު ފުރޭ ޒުވާނުންނަށްވެސް ދެވަނަބުރުގައި ވޯޓުލުމުގެ ފުރުސަތު ލިބިގެންދާނެ ކަމަށާއި އަދި އެފަރާތްތަކުގެ މަޢުލޫމާތު ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން ހޯދުމަށް ފަހު، ވަރަށް އަވަހަށް އީސީ އިން ޢާންމު ކުރާނެ ކަމަށް ވެސް ހަބީބް ވިދާޅުވިއެވެ.
ސެޕްޓެމްބަރު މަހުގެ 9 ވަނަ ދުވަހު އޮތް ރިޔާސީ އިންތިޚާބުގެ ފުރަތަމަ ބުރުގެ ވަގުތީ ނަތީޖާ އިލެކްޝަންސް ކޮމިޝަނުން ވަނީ އިއުލާންކޮށްފައެވެ.
އީސީން އާންމުކޮށްފައިވާ ވަގުތީ ނަތީޖާއަށް ބަލލާއިރު މިއަހަރުގެ އިންތިޚާބުގައި ވޯޓުލާފައިވަނީ ވޯޓުލުމުގެ ހައްގު ލިބިފައިވާ 282،395 މީހުންގެ ތެރެއިން 225،486 މީހުންނެވެ. އެއީ 79.85 އިންސައްތައެވެ.
އިންތިޚާބުގެ ވަގުތީ ނަތީޖާ:
އިންތިޚާބުގެ ނަތީޖާ ދައްކާގޮތުން 4،835 ވޯޓަކީ ބާތިލު ވޯޓެވެ. އަދި ޞައްހަ ވޯޓަކީ 220،651 ވޯޓެވެ.
ދެވަނަ ބުރުގައި ވާދަކުރައްވާނީ އެންމެ ގިނައިން ވޯޓު ލިބިވަޑައިގެންނެވި ޕީއެންސީގެ ކެންޑިޑޭޓް ޑރ މުހައްމަދު މުއިއްޒު އާއި އެމްޑީޕީގެ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހެވެ.
