ނިމިދިޔަ އިންތިޚާބަކީ މިނިވަން، އިންސާފުވެރި އަދި އަމާން އިންތިޚާބެއް: ބޭރުގެ އޮބްޒަރވަރުން
11 ސެޕްޓެމްބަރު 2023 | ހޯމަ 08:24އިލެކްޝަންސް ކޮމިޝަނުން ހަމަޖައްސާފައިވާ އިންތިޒާމުތަކަށް ތައުރީފު ކުރައްވާފައިވޭ
ރިޔާސީ އިންތިޚާބުގެ ކަންކަން އޮބްޒާވް ކުރައްވަން ވަޑައިގެންނެވި އޮބްޒަރވަރުންގެ ނޫސްވެރިންގެ ބައްދަލުވުން
ސެޕްޓެމްބަރު މަހުގެ 9 ވަނަ ދުވަހު ބޭއްވި ރިޔާސީ އިންތިޚާބަކީ މިނިވަން، އިންސާފުވެރި އަދި އަމާން އިންތިޚާބެއްކަމަށް ރިޔާސީ އިންތިހާބުގެ ކަންކަން އޮބްޒާވް ކުރައްވަން ވަޑައިގެންނެވި އޮބްޒަރވަރުން ވިދާޅުވެއްޖެއެވެ.
ހޯމަ ދުވަހު ނޫސްވެރިންނާ ބައްދަލުކުރައްވައި އިންތިޚާބު އޮބްޒަރވް ކުރެއްވުމަށް ރާއްޖެއަށް ވަޑައިގެންނެވި ވަފްދުގެ ބައިވެރިންވަނީ ރިޔާސީ އިންތިޚާބާއި ގުޅިގެން އިލެކްޝަންސް ކޮމިޝަނުން ހަމަޖައްސާފައިވާ އިންތިޒާމުތަކަށް ތައުރީފު ކުރައްވާފައެވެ.
އޭގެ އިތުރުން، ވޯޓުލުމުގެ އިންތިޒާމުތަކުގައި އަންހެނުންގެ ބައިވެރިވުންވެސް ބޮޑުކަން ފާހަގަކުރައްވައި ވަފްދުގެ ބޭފުޅުން ވަނީ އެކަމުގެ މައްޗަށް އަލިއަޅުވާލައްވާފައެވެ. އެއީ ބޮޑު ކުރިއެރުމެއްގެ ގޮތުގައި އެފަރާތްތަކުން ސިފަކުރެއްވިއެވެ.
ހަމައެއާއެކު، ވޯޓުލުމުގެ ކަންކަން ދިޔައީ އަމާންކޮށް ކަމަށާއި، މާ ގިނަ ވަގުތުތަކެއް ކިއޫގައި ހޭދަކުރަން ނުޖެހި މީހުން ވޯޓުލަމުން ދިޔަތަން ފެނިވަޑައިގެންފައިވާކަމަށްވެސް ވަފްދުގެ ބައިވެރިން ވިދާޅުވިއެވެ.
ކިޔޫގައި ވަގުތުކޮޅެއް ހޭދަކުރަން ޖެހުނު މީހުންވެސް ކެތްތެރިކަމާއެކު ވޯޓުލުމުގެ ކަންކަމުގައި ބައިވެރިވި މަންޒަރު ފެނިގެންދިޔަަކަން އެ ފަރާތްތަކުން ފާހަގަ ކުރެއްވިއެވެ.
އަދި، ވޯޓުލާ މަރުކަޒުތަކުގެ ސާފުތާހިރުކަމާއި، އެހެނިހެން އިންތިޒާމުތަކުގެ ފުރިހަަމަކަންވެސް އެބޭފުޅުން ފާހަގަ ކުރެއްވިއެވެ.
ވަކިން ޚާއްސަކޮށް، ނުކުޅެދުންތެރިކަން ހުންނަ ފަރާތްތަކަށް ޚާއްސަކޮށްގެން އިންތިޚާބުގައި ހަމަޖައްސާފައިވާ އެކިއެކި އިންތިޒާމުތަކަށް ވަފްދުގެ ބައިވެރިން ވަނީ ތައުރީފު ކުރައްވާފައެވެ.
ޖުމުލަ ގޮތެއްގައި މިއީ މިނިވަން، އިންސާފުވެރި، އަމާން އިންތިޚާބެއްކަމަށް ވަފުދުގެ ބޭފުޅުން ވިދާޅުވިއެވެ.
ކޮންމެ އިންތިޚާބެއްގައިވެސް ރަނގަޅު ކުރެވިދާނެ ކަންކަން ހުންނާނެކަން ފާހަގަ ކުރައްވައި ވަފްދުގެ ބައިވެރިން ވިދާޅުވީ، ވޯޓު ގުނުުމުގެ އިންތިޒާމުތައް މިހާރަށްވުރެ އަވަސްކުރެވިދާނެ ކަމަށެވެ.
