ލޯނު އެއްބަސްވުމެއްގެ ދަށުން ކުޓީނިއޯ، ޤަތަރުގެ ކްލަބަކަށް ސޮއިކޮށްފި

ލޯނު އެއްބަސްވުމެއްގެ ދަށުން ބްރެޒިލްގެ ފިލިޕް ކުޓީނިއޯ، ޤަތަރު ސްޓާސް ލީގުގެ ޗެމްޕިއަން އަލް ދުހެއިލް އަށް ސޮއިކޮށްފިއެވެ.

އެސްޓަން ވިލާ އިން ޤަތަރުގެ ކްލަބަށް ކުޓީނިއޯ ސޮއިކުރީ އެއް ސީޒަނުގެ ލޯނު އެއްބަސްވުމެއްގެ ދަށުންނެވެ. އުމުރުން 31 އަހަރުގެ ކުޅުންތެރިޔާ އެސްޓަން ވިލާއަށް ބަދަލުވީ 2022 ވަނަ އަހަރުއެވެ. ނަމަވެސް، އެސްޓަން ވިލާގައި އޭނާ އަށް އެދެވޭ ކުޅުމެއް ދެއްކިފައެއް ނުވެއެވެ. 20 މެޗުން އޭނާއަށް ޖެހިފައިވަނީ އެންމެ ލަނޑެކެވެ.

މީގެކުރިން ކުޓީނިއޯ ވަނީ އިންޓަ މިލާން އާއި ލިވަޕޫލްގެ އިތުރުން ބާސެލޯނާއަށް ކުޅެފައެވެ. 2018 ވަނަ އަހަރު އޭނާ ބާސެލޯނާއަށް ސޮއިކުރީ 142 މިލިއަން ޕައުންޑަށެވެ. އެއީ ފުޓުބޯޅައިގެ ތާރީޚުގައި ތިންވަނަ އަށް އެންމެ އަގުބޮޑު ޓްރާންސްފަރ އެވެ.

ކުޓީނިއޯ ވަނީ ބްރެޒިލް ގައުމީ ޓީމަށް 68 މެޗު ކުޅެދީ 21 ލަނޑު ޖަހާފައެވެ. ނަމަވެސް، މިދިޔަ އަހަރު ޖޫން މަހު ދެކުނު ކޮރެއާ ކައިރިން 5-1 ން މޮޅުވި މެޗަށްފަހު، އޭނާ ގައުމީ ޓީމަށް ކުޅެފައެއް ނުވެއެވެ.

އާޖެންޓީނާގެ ކުރީގެ ކުޅުންތެރިޔާ، ކްރެސްޕޯ ގެ އިރުޝާތުގެ ދަށުން ކުޅޭ އަލް ދުހެއިލް މިވަގުތު އޮތީ ތާވަލުގެ ތިންވަނައިގައެވެ. އެއީ އެއްވަނައިގައި އޮތް އަލް ރައްޔާން އަށްވުރެ ދެ ޕޮއިންޓް ފަހަތުގައެވެ.