އަތޮޅު ކެޔޮދޫގައި ވެލާތަކެއް ފަޅައި ކެއްކުމުގައި ބައިވެރިވި ބ.ކެންދޫގެ 7 މީހުންނަށް ކުރި ޖޫރިމަނާ 33000 ރުފިޔާއަށް ކުޑަކޮށްފައިވާކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

މީގެ ކުރިން މި މައްސަލައިގައި މި 7 މީހުންނަށް ކުރި ޖޫރިމަނާ އަކީ، 198،000 ރުފިޔާ އެވެ. އެފައިސާ 30 ދުވަހުގެ ތެރޭގައި އީޕީއޭއަށް ދެއްކުމަށް މެއި މަހު އަންގާފައވާއިރު، ޖޫރިމަނާ ފައިސާ ދައްކަންޖެހޭ މުއްދަތު ޖުލައި މަހުގެ 20 ވަނަ ދުވަހަށް ހަމަވިއިރުވެސް އެއްވެސް މީހަކު އެފައިސާ ދައްކާފައި ނުވާކަމަށް އީޕީއޭ އިން ބުނެއެވެ.

ޖޫރިމަނާއާ ގުޅޭގޮތުން އީޕީއޭއިން ނެރުނު ބަޔާނުގައި ބުނެފައިވަނީ އެމީހުންނަށް ކުރި ޖޫރިމަނާ އާ ގުޅޭގޮތުން އެފަރާތްތަކުން އެންވަޔަރަމެންޓް މިނިސްޓްރީއަށް ސިޓީތަކެއް ފޮނުވާފައިވާ ކަމަށް މިނިސްޓްރީން 23 ޖުލައި ގައި އީޕީއޭއަށް އަންގާފައިވާ ކަމަށެވެ. އަދި ކެޔޮދޫގައި އެ ފަރާތްތައް ވެލާތަކަކަށް ގޯނާކުރުމާއި ގުޅިގެން އީޕީއޭއިން ކޮށްފައިވާ ޖޫރިމަނާ އަލުން މުރާޖާ ކުރުމަށް ފެންނަ ކަމަށް އީޕީއޭގެ ގަވަރނިންގ ބޯޑުން އެންވަޔަރަމެންޓް މިނިސްޓްރީއަށް ލަފާދީފައވާތީ މިނިސްޓްރީން ވަނީ މިމައްސަލައިގައި އެޓަރނީ ޖެނެރަލްގެ ލަފާ ހޯދާފައިކަމަށް އީޕީއޭއިން ބުނެއެވެ.

އެގޮތުން އޭޖީ އޮފީހުގެ ލަފާއައަށް ރިޔާއަތްކޮށް އީޕީއޭއިން ބުނެފައިވަނީ ގުދުރަތީ ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރުމާ ދިރޭ އެއްޗަކަށް ގޯނާކޮށްފިނަމަ ޖޫރިމަނާކުރެވޭނީ 30،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ކަމަށް ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ 18 ވަނަ މާއްދާގެ ށ ގައި ބަޔާންކޮށްފައިވާ ކަމަށާއި އެ ގަވާއިދުގައި ގޯނާކުރި ތަކެތީގެ އަދަދަށް ބަލައި ޖޫރިމަނާކުރެވޭ އަދަދު އިތުރު ކުރުމުގެ އުސޫލެއް ކަނޑައަޅާފައިނުވާތީ ވެލަޔަކަށް ގޯނާކުރިކަމުގެ ހެކި ލިބިފައިވާ ކޮންމެ ފަރާތެއްވެސް ޖޫރިމަނާކުރެވޭނީ 30،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ކަމަށް ފެންނަ ކަމަށް ލަފާދީފައިވާ ކަމަށެވެ.

އެހެންކަމުން މިއުސޫލުގެ މަތިން ޖޫރިމަނާއަށް ވާ ފައިސާ ސެޕްޓެމްބަރު މަހުގެ 6 ވަނަ ދުވަހުން ފެށިގެން 30 ދުވަހުގެ ތެރޭގައި ދެއްކުމަށް އީޕީއޭއިން ވަނީ އެފަރާތްތަކަށް އަންގާފައެވެ.