ރިޔާސީ އިންތިޚާބާ ގުޅިގެން ފުލުހުން ކުރިއަށްގެންދާ "އޮޕަރޭޝަން ބްލޫވޭވް'' ގެ އޮޕަރޭޝަނަލް ފޭސް ފަށައިފި
8 ސެޕްޓެމްބަރު 2023 | ހުކުރު 03:16ދިވެހި ފުލުހުންގެ ޚިދުމަތުގެ ''އޮޕަރޭޝަނަލް ސްޓޭޓަސް ލެވެލް 3'' އަށް ވަނީ ބަދަލުކޮށްފައި
"އޮޕަރޭޝަން ބްލޫވޭވް'' ގެ އޮޕަރޭޝަނަލް ފޭސް ފެށުމުގެ ރަސްމިއްޔާތު
ރިޔާސީ އިންތިހާބާ ގުޅިގެން ފުލުހުން ކުރިއަށްގެންދާ ''އޮޕަރޭޝަން ބްލޫވޭވް'' ގެ އޮޕަރޭޝަނަލް ފޭސް ރަސްމީކޮށް ފަށައި އޮޕަރޭޝަން ބްރީފިންގ ދީފިއެވެ.
ބުރާސްފަތި ދުވަހުގެ ހަވީރު އިސްކަންދަރު ބިލްޑިންގގައި ބޭއްވި ޚާއްސަ ރަސްމިއްޔާތުގައި، އޮޕަރޭޝަނަލް ފޭސް ރަސްމީކޮށް ފައްޓަވައިދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދުއެވެ. ރަސްމިއްޔާތު ފައްޓަވައިދެއްވައި ކޮމިޝަނަރ ދެއްކެވި ވާހަކަފުޅުގައި، މި އޮޕަރޭޝަންގެ މަޤްސަދަކީ މިނިވަން އިންސާފުވެރި އިންތިޚާބެއް ބޭއްވުމަށް ސަލާމަތީގޮތުން ރައްކާތެރި އަމާން މާހައުލެއް ޤާއިމުކޮށްދީ، އިންސާނީ ކަރާމާތަށް އުނިކަމެއް ނާންނާނެގޮތުގެ މަތިން އިންސާނީ ހައްޤުތައް ރައްކާތެރިކޮށް އަދި ކޮމިއުނިޓީ ޕޮލިސިންގ ފަލްސަފާއާ އެއްގޮތަށް، އިންތިޚާބުގެ ކުރިންނާއި ފަހުން، ދިވެހިރާއްޖޭގެ ދާޚިލީ ހަމަޖެހުމާއި އަމަންއަމާންކަަމަށް ހުރަސްއެޅޭފަދަ އެއްވެސް ނުރައްކަލަކަށް ފުރުސަތުނުދީ އަދި ދިމާވެދާނެ ހަމަނުޖެހުމެއް ރޭވުންތެރިކަމާއެކު އާންމު ހާލަތަށް ބަދަލުކުރުންކަމަށް ވިދާޅުވިއެވެ.
އަދި 2022 ޑިސެމްބަރުން ފެށިގެން އޮޕަރޭޝަނަށް ތައްޔާރުވާންފަށައި، ކަނޑައެޅުނު ޓައިމްލައިނާ އެއްގޮތަށް މަސައްކަތްކުރެވި އެންމެ ފަހުގެ މަރުހަލާތަކަށް މިވަނީ އާދެވިފައިކަމަށާއި މި ފާއިތުވެދިޔަ ދުވަސްތަކުގައި ހުރިހާ ފުލުހުންވެސް ދިން އެއްބާރުލުމާއި ކުރި ބުރަ މަސައްކަތްތައް ފާހަގަކުރައްވައި ޝުކުރު އަދާކުރެއްވިއެވެ. އަދި ކުރިއަށް މިއޮތް ގަޑިތަކުގައާއި އިންތިޚާބުގެ ދުވަހު އަދި އިންތިޚާބުގެ ރަސްމީ ކަންކަން ނިމުމާ ހަމައަށްވެސް ޕްރޮފެޝަނަލްކޮށް ޤާނޫނީ ހަމަތަކުގެ މަތިން، ކޮންމެ ފުލުހަކާވެސް ހަވާލުކޮށްފައިވާ މަސައްކަތް ކުރަންވާގޮތް ސާފުކޮށް އެނގިތިބެ ކުރިއަށްް ގެންދިއުމަށް އިލްތިމާސްކުރެއްވިއެވެ.
އޭގެ އިތުރުން، އެއްވެސް ފަރާތަކަށް ބުރަނުވެ، ރަނގަޅު ބަހުން މުއާމަލާތުކުރުމަށާއި ވާދަވެރި އިންތިޚާބަކާ ގުޅިގެން މީހުންގެ ކިބައިން ފެންނާނެ އަމަލުތަކާއި ދިމާވެދާނެ ކަންކަމަށް ލޯ ހުޅުވި، ހާލަތާ އެކަށިގެންވާ ފިޔަވަޅު އެޅުމަށާއި އަދި ބޮޑީވޯން ކެމެރާގެ ޓެކްނޮލޮޖީ އާއި އޮޕަރޭޝަންގެ މައުލޫމާތުތައް ރެކޯޑުކުރުމަށް ބޭނުންކުރަން ކަނޑައަޅާފައިވާ ޓެކްނޮލޮޖީއާއި އެހެނިހެން ވަސީލަތްތަކާއި އާލަތްތައް، ހަމަޖެހިފައިވާގޮޮތުގެ މަތިން ބޭނުންކުރަމުން ގެންދިއުމަށް އެދިވަޑައިގެންނެވިއެވެ.
އަދި ހަމައެހެންމެ، މިއޮތް ވަގުތުތަކުގައިވެސް ފުލުހެއްގެ ފުށުން އެއްވެސް ނުރަނގަޅު ކަމެއް ނުފެންނާނެހެން ވީހާވެސް ރަނގަޅަށް ކަންކަން ގެންގޮސް ފުލުހުންގެ މުއައްސަސާއަށް، ރައްޔިތުންނާއި އިންތިޚާބުގެ ކަންކަން ބެލެހެއްޓުމަށް ރާއްޖެއަށް ޒިޔާރަތްކުރާ ފަރާތްތަކުގެ އިތުބާރާއި ޔަޤީންކަން ހޯދުމުގެ އަޒުމުގައި މަސައްކަތްކުރުމަށް އެދިވަޑައިގެންނެވިއެވެ. އަދި މި އޮޕަރޭޝަނަކީ ކަނޑައެޅުނު ލަނޑުދަނޑިއާ އެއްގޮތަށް ކާމިޔާބުކަމާއެކު ނިންމިގެންދާނެ އޮޕަރޭޝަނަކަށް ވެގެންދިއުން އުންމީދުކުރައްވާކަމަށް، ކޮމިޝަނަރުގެ ވާހަކަފުޅު ނިންމަވާލައްވަމުން ވިދާޅުވިއެވެ.
މި ބްރީފިންގގައި ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފްއާއި ފުލުހުންގެ އެގްޒެކެޓިވް އޮފިސަރުންނާއި ރިޔާސީ އިންތިޚާބުގެ އޮޕަރޭޝަން ކޮމާންޑަރ، ޗީފް ސުޕްރިންޓެންޑެންޓް އޮފް ޕޮލިސް އަޙްމަދު ޝާކިރުއާއި ޑެޕިއުޓީ ކޮމާންޑަރު، ސުޕްރިންޓެންޑެންޓް އޮފް ޕޮލިސް އަޙްމަދު މުސްލިމްގެ އިތުރުން ފުލުހުންގެ ކޮމިޝަންޑު އޮފިސަރުންނާއި ގިނަ އަދަދެއްގެ ފުލުހުން ބައިވެރިވިއެވެ. މި ބްރީފިންގގައި، ރަށްރަށުގައި ތިބި ފުލުހުން އޮންލައިންކޮށް ބައިވެރިވިއެވެ.
މި ބްރީފިންގއާ އެކު ދިވެހި ފުލުހުންގެ ޚިދުމަތުގެ އޮޕަރޭޝަނަލް ސްޓޭޓަސް ''ލެވެލް 3'' އަށް ވަނީ ބަދަލުކޮށްފައެވެ.
