އެމެންބަރުން ނަގާ އެއްލާލީ ރޮއެރޮއެ ތިއްބައެވެ. ހެޔޮ ނުވާނެޔޭ ތިޔަހެން ނުހަދާށޭ ބުނެ ދެފައިގާ ހިފާ އާދޭސް ކުރަނިކޮށެވެ. ތިމަންމެން ބޭނުމެއް ނެތޭ ބުނެބުނެ އޮއްވައި ޕީޕީއެމުން ކަނޑާ ބޭރުކޮށްލީއެވެ. ރައީސް ޔާމީނަށް ތާއީދު ނުކޮށް މައުމޫން ފެކްޝަނާ ދިމާލަށް ޖެހިލެވުނީތީއެވެ
އެއީ އެ ދުވަހެވެ. މީގެ ދުވަސްތަކެއް ކުރިއެވެ. ޕީޕީއެމުގައި އުޅެއުޅެ ތިއްބާ އެޕާޓީން ވަކިކުރި ހަތަރު މެންބަރުން ވަކިކުރިތާ ދުވަސްތަކެއް ވީއެވެ. މީޑިޔާތަކުގެ ފަލަ ސުރުޚީއަށް އަރައި މުޅި ދުނިޔެއަށް އެކަން ހާމަވެސް ވިއެވެ. އެއީ އެޕާޓީގެ މެންބަރުން ނޫން ކަމަށެވެ. ޕީޕީއެމްގެ ލޯގޯވެސް ދިދަވެސް ބޭނުން ނުކުރެވޭނެކަމެވެ. މަޖިލީހުގައިވެސް އެމެންބަރުން ޕީޕީއެމްގެ މެންބަރުންގެ ގޮތުގައި ގުނުންވެސް ހުއްޓާލީއެވެ.
ވަރިކުރީމާ އަނބިމީހާއަށް ޖެހެނީ ދުރުގައި ހުންނާށެވެ. ތިންމަސް ތެރޭގައި ރުޖޫއަ ނުކުރަންޏާ ކައިވެނި ދެމެހެއްޓޭނޭ ހަމަ އެއްވެސް ގޮތެއް ނޯވެއެވެ. ދެން އެއީ އެމީހެއްގެ އަންބެއްގެ ގޮތުގައި ހެދޭނީ އެމީހާގެ ރުހުން އޮވެގެން ކުރެވޭ ކައިވެންޏަކުންނެވެ. ރުޖޫއަ ކުރާ ނަމަވެސް އެކަން ކުރެވެނީ ދެ މީހުން އެއްބަސްވުމުންނެވެ.
އެހާލަތުގައި ހެޔޮވިސްނި ނުވަތަ ހެދުނު ގޯސް ވިސްނިގެން އެކައިވެނި ދަމަހައްޓަން ކިތައްމެ ވަރަކަށް މަސައްކަތް ކުރިއަސް ކުރެވޭނެ އިތުރު ކަމެއް ނޯވެއެވެ.
ޕީޕީއެމްގެ މެންބަރުން ތަކަކަށް ވެސް ކަންވެގެން މިއުޅެނީ އެފަދަ ގޮތެކެވެ. އެމެންބަރުން ވަކިކުރީ ޕީޕީއެމުންނެވެ. ވަކިކުރިކަން އެމެންބަރުންނަށް އެންގިއެވެ. އެއީ އެޕާޓީގެ މެންބަރުން ނޫންކަމަށް ކަނޑައެޅީއެވެ. އެދުވަހު އެމެންބަރުން ބޭނުން ނުވެ ތިއްބާ ނަގާއެއްލާލިއިރު މިއަދު އެޕާޓީއަށް އެމެންބަރުން ބޭނުންވެއްޖެއެވެ. އެކަމަކު ވަގުތު ފާއިތުވެއްޖެއެވެ. މެންބަރުން ބޭރުކޮށްލައިފިއެވެ. އެކަމަކު މިއަދު ޕީޕީއެމުން ގަދަފައިވިއްދާފައި އެވަނީ އެނިންމުން ބަދަލު ކުރުމަށެވެ. ކުރިން ނިންމި ނިންމުން އެއީ ނުވާކަމަކަށް ހެދުމަށެވެ. އެޅި ފިޔަވަޅަކީ އެޅި ފިޔަވަޅެއް ނޫންކަމަށް ކަނޑައެޅުމަށެވެ. އެ މެންބަރުން އަލުން ކަނޑާލިކަމަށް އިއުލާން ކޮށްގެން އެ މެންބަރުންގެ ގޮނޑި ގެއްލުވާލުމަށެވެ.
ޕީޕީއެމުން ބުނަނީ މެންބަރުން އޭރު ކަނޑާލިކަމަށް ބުނިކަމުގައިވީ ނަމަވެސް އަލުން އެ މައްސަލަ އެ ޕާޓީން ބަލަން ފެށިކަމަށެވެ. ގޮތެއް ކަނޑައެޅީ ސުޕްރީމް ކޯޓުން ހުކުމް ކުރި ފަހުން ކަމަށެވެ. ބޭނުމަކީ ހަމައެންމެ ބޭނުމެކެވެ. ޕާޓީން ވަކިކުރުމާއެކު މެންބަރުކަން ގެއްލޭނެ ކަމަށް ސުޕްރީމް ކޯޓުން ބުނި ބުނުމަށް ރިއާޔަތްކޮށް އެމީހުންގެ ގޮނޑި ގެއްލުވާލުމެވެ. ޕީޕީއެމްގެ އަތުން ބީވި މަޖިލިސް މެޖޯރިޓީ ހޯދުމެވެ. މަޖިލީހުގެ ރައީސްގެ އިތުބާރުނެތްކަމަށް ހުށަހަޅާފައިވާ މައްސަލަ ބޭރުކޮށްލުމަށެވެ.
މެންބަރުން އެބުނަނީ ހެޔޮނުވާނެޔޭއެވެ.ތިމަންމެންމީ ތިޔަ ޕާޓީގެ މެންބަރުންނެއް ނޫނޭއެވެ. ތިޔަ ޕާޓީން ކަނޑާލި ފަހުން ތިޔަ ޕާޓީއަކަށް އަހަރެމެނެއް ނުވަންނަމޭއެވެ. އަދި ވަންނާކަށް ބޭނުމެއްވެސް ނޫނޭއެވެ. ދެން ތިޔަބުނާ ފިޔަވަޅެއް އަހަރެމެންނަށް އެޅޭނޭ އެއްވެސް ހަމައެއް ނޯންނާނެ ކަމަށެވެ.
ވަރިކުރިފުޅު ފަހަތުން ކިތައްމެ ވަރަކަށް ދުވިއަސް އެމަންޖެ ބޭނުން ނުވާނަމަ ގެންގުޅެވޭނެ ގޮތެއް ނޯވެއެވެ. އެއީ ނިހާނަކަސް އަދުރޭއަކަސް އަދި ޔާމިނަސް ކަން އޮތްގޮތެވެ. ނަޝީދެއް މައުމޫނެއް ޤާސިމެއްވެސް އެކަމަކުން އިސްތިސްނާއެއް ނުވެއެވެ.
ދެން އޮތީ ސުޕްރީމް ކޯޓުން ނިންމި ނިންމުމެވެ. ޕާޓީން ވަކިކުރުމުން ގޮނޑިގެއްލޭނެ ކަމަށް ބުނުމެވެ. ތެދެކެވެ. އެކޯޓުން އެއޮތީ އެހެން ކަނޑައަޅާފައެވެ. އެކަމަކު އެކަން ހިނގާނީ އެކޯޓުން ކުރި ހުކުމުގެ ފަހުން ހިނގާ ކަމަކަކަށް ކަމަށް ސާފު ޞަރީޙަ އިބާރާތުން ބުނީވެސް އެކޯޓުންނެވެ. "ނަމާދާ ގާތް ނުވާށޭ އަންގަވާފައި އޮތީތީ މިސްކިތައް ނާރަން ހުރެވޭން ނޯންނަ ގޮތަށެވެ. އަންގަވާފައި އޮންނަނީ މަސްތުގެ ހާލުގައި ގާތް ނުވާށެވެ. އެއީ ނަމާދު ނުކުރުމެއް ނޫނެވެ. އެއްބައި ޤަބޫލު ކޮށްފައި އަނެއްބައި އެއަކުން އުންޏެއް ކުރެވޭނެ ގޮތެއް ނޯވެއެވެ. ޢަމަލް ނުކޮށް ދޫކޮށްލެވޭކަށް ނޯވެއެވެ.
އެކަމަކު ކަންކޮށްގެން މިއުޅެނީ ޕީޕީއެމުންނެވެ. ވެރިކަމުގައި އޮތީ އެޕާޓީއެވެ. ހަމަޔާ ލަމަ އޮތީ އޮތް ތަނެއްގައެވެ. ޤާނޫން އަސާސީއެއް ޤާނޫނެއް ހެދިފައިވާ ޤަވާއިދު އެއީ މުހިއްމު އެއްޗެއް ނޫނެވެ. ހުރިހާވެސް އެއްޗަކީ ޕީޕީއެމް ލޮޖިކެވެ. މިއީ ރޯމާ ދުވާލު ނަމަވެސް ރޭގަނޑު ކަމަށް ކަނޑައަޅައިފިނަމަ އެވީ ރޭގަނޑަށެވެ. ހަމައެކަނި ވާންޖެހޭ ގޮތަކީ ޕީޕީއެމުން ކަނޑައެޅުމެވެ.
މީހަކުވާ ހިންޏެއް ނާންނާނެ ހެއްޔެވެ. ތިޔަގަންނަ ގަނޑު ހަމަ އެންމެނަށްވެސް އެނގެއެވެ. ޤާނޫނީ ތަރަހައޭ ހަމައޭ އިންސާފޭ ކިއުމުގެ ބޭނުމެއް ނެތެވެ. އެކަމަކު ހަނދާން ކޮށްލަން ޖެހޭ ކަމެއް އެބައޮތެވެ. އަންނައުނު ލަނީ ނިވާކުރަން ކަމެވެ. ހަމަ ރީތިވެގެން ލާއެއްޗެއްގެ ގޮތުގައެއް ނޫނެވެ. މީހެއްގެ ވިއްޔާ ލަދެއް ހަޔާތެއް ހުންނަން ޖެހެއެވެ. ބާރު އޮތީތީ ކަންކުރެވޭނީ ދުވަސްކޮޅަކަށެވެ. އަބަދަކު އެބާރަކު ދެމިއެއް ނުތިބެވެއެވެ. އަމިއްލައަށް އަމިއްލަ މާޒީއަށް ބަލާލީމާވެސް އެއީ ލައްކަ ވާހަކައެވެ. މިއަދު ތިޔަވަނީ އެކަނިވެފައެވެ. ތިޔަފުޅާ ބޮޑު ކޯލިޝަން ތިޔައޮތީ ރޫޅިފައެވެ. އަތްނުފޯރާ މެޖޯރިޓީ ތިޔައޮތީ ގެއްލިފައެވެ. ދެން އޮތީ ހަމައެކަނި ތިޔަބުނާ ކޯޓެވެ. އެކަންވެސް ބަލަމާ ހިނގަށެވެ. ތާއީދެއް ނެތިއްޔާ ހިފެހެއްޓޭނެ ހަމައެއްވެސް ގޮތެއް ނޯވެއެވެ. ތިޔަދެން ހުސްވަނީއެވެ. ބެދޭމަޅިއެއް ނުފެންނާނެއެވެ. ވަރަށް ވިސްނާ ނެތިއްޔާ ބޯނުހިކޭވަރަށް ފެއިލްވެދާނެއެވެ. ފެންނަ މަންޒަރުތަކުން އެއީ ދާދި ގާތްކަމެކެވެ.
