ރައީސް ޔާމީން މިނިވަންކުރާ ވާހަކަ ނުދައްކާ މިންވަރަށް، ޕީޕީއެމުން އެމްޑީޕީ ރިޔާސީ ޕްރައިމަރީގެ ވާހަކަ ދައްކަނީ ކީއްވެ؟

ވެރިކަން ކުރާ މައި ޕާޓީ އެމްޑީޕީގެ ރިޔާސީ ޕްރައިމަރީ އަކީ މިވަގުތު ޤައުމުގެ އެންމެ ގިނަ ބައެއްގެ ސަމާލުކަން ހުއްޓިފައިވާ އެއް ހަރަކާތެވެ.

ޒަމާންވީ ދެ ރަޙުމަތްތެރިން ސިޔާސީ މައިދާނުގައި ވާދަކުރައްވަމުން ގެންދަވަނީ ކުރިއަށް އޮތް ރިޔާސީ ރޭހުގައި އެމްޑީޕީގެ ޓިކެޓު ހޯއްދެވުމަށެވެ. މިހާރު ވެރިކަމުގައި ހުންނެވި އެމްޑީޕީގެ އެންމެ އިސް ލީޑަރު ރައީސް އިބްރާހިމް މުޙަައްމަދު ޞާލިޙު އާއި އެމްޑީޕީގެ ރައީސް، ރައީސް މުޙައްމަދު ނަޝީދުގެ ވާދަވެރިކަން ފެންނަނީ ވަރަށް ބޮޑަށެވެ. ދެ ބޭފުޅުންގެ ކެމްޕެއިން ޓީމުން ވެސް އަންނަނީ ފޯރީގައި ކެމްޕެއިން ކުރަމުންނެވެ. މިއީ އެމްޑީޕީގެ އެތެރޭގެ އިންތިޚާބަކަށް ވުމުން، ދެ ރައީސުން ވެސް އަންނަނީ އެމްޑީޕީގެ މެމްބަރުންނާ ބައްދަލު ކުރައްވަމުންނެވެ. ޖަލްސާތައް ބާއްވަމުންނެވެ. ދެ ރައީސުން ވެސް ދައްކަވަނީ އެމްޑީޕީގެ މެމްބަރުން މި ޕްރައިމަރީއާ މެދު ވިސްނަން ޖެހޭ ވާހަކަ އެވެ.

މިއީ ފަހުގެ ތާރީޚެއްގައި ސިޔާސީ ޕާޓީއަކުން ރާއްޖޭގައި ކުރިއަށް ގެންދާނެ އެންމެ ވަރުގަދަ ސިޔާސީ ޙަރަކާތެވެ. ރާއްޖޭގެ އެންމެ ބޮޑު ސިޔާސީ ޕާޓީގެ މި ޙަރަކާތާމެދު އެންމެ ބޮޑަށް ވިސްނަން ޖެހެނީ އެމްޑީޕީގެ މެމްބަރުންނެވެ. އެ ވާހަކަ އެންމެ ގަދަޔަށް ދައްކަން ވާނީ އެމްޑީޕީގެ މެމްބަރުންތާ އެވެ. ނަމަވެސް މިވާހަކަތަކުގެ ތެރެއިން މުޅިން އެހެންކަމެއް ފާހަގަވެއްޖެ އެވެ. އިދިކޮޅު ސިޔާސީ ޕާޓީ، ޕީޕީއެމް އިން ވެސް އަންނަނީ އެމްޑީޕީގެ ރިޔާސީ ޕްރައިމަރީގެ ވާހަކަ ދައްކަމުންނެވެ. ސިޔާސީ ނަޒަރަކުން ބަލާނަމަ، ޕީޕީއެމް އިން އެ ވާހަކަ ދައްކަން ޖެހޭ ސަބަބެއް ނެތެވެ. ސަބަބަކީ މިއީ އެމްޑީޕީގެ އެތެރޭގެ އިންތިޚާބަކަށްވެފައި، މި އިންތިޚާބުގައި ވޯޓުލާނީ އެމްޑީޕީގެ މެމްބަރުންނަށް ވުމެވެ. އަނެއްކޮޅު ރިޔާސީ ކެންޑިޑޭޓަކު ކަނޑައެޅުމުގެ ބާރު އޮތީ އެމްޑީޕީގެ މެމްބަރުންގެ އަތް މަތީގަ އެވެ. އެމްޑީޕީގެ ރިޔާސީ ކެންޑިޑޭޓަކު ކަނޑައެޅުން އެއީ ޕީޕީއެމް މެމްބަރުންގެ އަތް މަތީގައި އޮންނަ ކަމެެއް ނޫނެވެ.

ޕްރައިމަރީގެ ފޯރި ގަދަވެ، އެ ޖޯޝުގައި އެމްޑީޕީން ކުރިއަށްދާއިރު، ޕީޕީއެމްގެ މެމްބަރުން ވެސް އަންނަނީ އެ ވާހަކަ ދައްކަމުންނެވެ. އެ ޕާޓީގެ އިސް ބޭފުޅުންނާ ހަމައިން ގޮސް، އާންމު މެމްބަރުން ވެސް އެ ވާހަކަ ދައްކަނީ އެވެ. ބައެއް ފަަހަރު ޖަލުގައި އޮންނެވި އެ ޕާޓީގެ ލީޑަރު، ނުވަތަ ރިޔާސީ ކެންޑިޑޭޓު ކަމަށް އެ ބޭފުޅުން ނިންމަވައިގެން ތިއްބެވި ރައީސް ޢަބްދުﷲ ޔާމީންގެ ވާހަކަ ނުދައްކާ މިންވަރަށް އެމްޑީޕީގެ ޕްރައިމަރީގެ ވާހަކަ އެބަ ދައްކަ އެވެ. ރައީސް ޔާމީން މިނިވަން ކުރަން ގޮވާލާ ފަހަރަށްވުރެ، މިހާރު ގިނަވަނީ އެމްޑީޕީގެ ޕްރައިމަރީގެ ވާހަކަ ދައްކާ ފަަހަރެވެ. ރިޔާސީ ޕްރައިމަރީގެ ކެމްޕެއިނަށް ރައީސް ނަޝީދާއި، ރައީސް ޞާލިޙު ރަށް ރަށަށް ވަޑައިގެންނެވިޔަސް އެ ވާހަކަ ވެސް ދައްކަނީ އެވެ. ޓުވީޓު ވެސް ކުރަނީ އެވެ. ފަހަރެއްގައި ވެސް ރައީސް ޔާމީން ޖަލުގައި އޮންނެވި ހަނދާން ނުވާ ކަހަލަ އެވެ. ރައީސް ޔާމީންގެ ވާހަކައަށްވުރެ ގިނަ އިން މިއަދު ޕީޕީއެމް މެމްބަރުންގެ ދުލުން ކިޔެނީ އެމްޑީޕީ ރިޔާސީ ޕްރައިމަރީގެ ވާހަކަ އެވެ. ރައީސް ނަޝީދު އާއި ރައީސް ޞާލިޙުގެ ވާހަކަ އެވެ. އެމްޑީޕީ މެމްބަރުން ވޯޓު ދޭންވީ ކެންޑިޑޭޓު ބުނެދޭން ޖެހޭނީ ޕީޕީއެމަކަށް ނޫންވިއްޔާ އެވެ.

މިއީ އެމްޑީޕީގެ އެތެރޭގެ އިންތިޚާބަކަށްވުމުން މި އިންތިޚާބުގައި ގޮތް ނިންމާނީ އެ ޕާޓީގެ މެމްބަރުންނެވެ. މި ޕްރައިމަރީ އާއި ޕީޕީއެމާ އެއްވެސް ގުޅުމެއް ނެތްއިރު، އެ ޕާޓީގެ މެމްބަރުން މި ޕްރައިމަރީގެ ވާހަކަ މިހާވަރަށް މިދައްކަނީ ކީއްވެގެން ބާވައެވެ؟