ފުލިދޫ ބަނދަރު ތަރައްގީކުރުމުގެ މަޝްރޫއު ސަރުކާރުން އެމްޓީސީސީއާ ހަވާލުކޮށްފި
7 ސެޕްޓެމްބަރު 2023 | ބުރާސްފަތި 14:01މި މަޝްރޫއަކީ 63.46 މިލިއަން ރުފިޔާއަށް، 465 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެއް
ފުލިދޫ ބަނދަރު ހެދުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ވ. ފުލިދޫ ބަނދަރު ތަރައްގީކުރުމުގެ މަޝްރޫއު ސަރުކާރުން އެމްޓީސީސީއާ ހަވާލުކޮށްފިއެވެ.
މި މަޝްރޫއު ހަވާލުކުރުމަށް ބޭއްވި ރަސްމިއްޔާތުގައ،ި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވ،ީ ޑިރެކްޓަރ ޖެނެރަލް، ފާތުމަތު ޝާނާ ފާރޫގެވެ.
567 މީހުންގެ އާބާދީއެއް އޮންނަ ވ. ފުލިދޫ ރައްޔިތުން އާންމުކޮށް މަސައްކަތްކުރަނީ ފަތުރުވެރިކަމުގެ ދާއިރާގައެވެ. މި ރަށުގައި 15ށްވުރެ ގިނަ ގެސްޓް ހައުސް ހުރެއެވެ. އަދި ޑައިވިންގ ދޯންޏާއި ގިނަ އަދަދެއްގެ ޑިންގީއާއި "ބިގް ގޭމް ފިޝިންގ"އަށް ދާ އުޅަނދުފަހަރު ގިނަ އަދަދަކަށް އޮވެއެވެ. ރަށުގެ އިގްތިސާދު، ގެސްޓް ހައުސް ވިޔަފާރިއަށް ބަރޯސާވެފައި އޮތުމާއެކު، މި ވިޔަފާރިއަށް ބޭނުންކުރާ ގިނަ އަދަދެއްގެ ކަނޑު އުޅަނދުތައް މި ރަށުގައި އޮވެއެވެ.
ނަމަވެސް، ރަށުގައި ކުޑަ ބަނދަރެއް އޮތުމުގެ ސަބަބުން، ބަނދަރަށް ގާތްކުރުމަށް ޖާގަ ހޯދުމުގައާއި ބަނދަރުގައި އަޅާފައި އޮތުމުގައި، އުޅަނދު ފަހަރަށް އަންނަނީ ދަތިތަކެއް ކުރިމަތި ވަމުންނެވެ. ފުލިދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތް ނިމުމާއެކު، ރައްޔިތުންނަށް ދިމާވެފައިވާ ދަތިތަކަށް ހައްލު ލިބޭނެއެވެ. އަދި ފުލިދޫގެ އިގްތިސާދަށް ހެޔޮ އަސަރުތަކެއް ކުރާނެއެވެ.
މި މަޝްރޫއުގެ ދަށުން، 41,413 ކިއުބިކް މީޓަރުގެ ސަރަހައްދެއްގެ އައު ހާބަރ ބޭސިން ފުންކުރުމާއި، 7812 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 30,708 ކިއުބިކް މީޓަރުގެ ވެލި، ބިން ހިއްކުމަށްޓަކައި ބޭނުންކުރުމާއި، 439 މީޓަރުގެ ރިވެޓްމެންޓް ޖެހުމާއި، 174 މީޓަރުގެ ޖިއޯބޭގް ރިވެޓްމެންޓް ޖެހުމާއި، 77 މީޓަރުގެ ބޭރުތޮށި ލުމާއި، 25 މީޓަރުގެ ގްރޮއިން ޖެހުމާއި، 300 މީޓަރުގެ އެއްގަމުތޮށި ލުމާއި، 40 މީޓަރު ދިގު 6 މީޓަރު ފުޅާ އާރްސީ ބްރިޖެއް ހެދުމާއީ، 1450 ސްކޮޔަރމީޓަރުގެ ޕޭވްމަންޓް ހެދުމާއި، ބަނދަރު ބައްތިއާއި ނެރު ބައްތި ހަރުކުރުމުގެ މަސައްކަތް ހިމެނެއެވެ.
މި މަޝްރޫއަކީ 63.46 މިލިއަން ރުފިޔާއަށް، 465 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫއެކެވެ. މި މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓް އެސެސްމެންޓް ހެދުމަށްފަހުއެވެ. ވޭތުވެދިޔަ 42 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި އުމްރާނީ ތަރައްގީގެ ގިނަ މަޝްރޫއުތަކެއް ހިންގައި، ކާމިޔާބުކަމާއެކު ނިންމާފައެވެ.
