ބައްދަލުވާ ރައްޔިތުން ބުނަނީ އިބޫ ނޫން މީހަކަށް މައްސަލަތައް ހައްލު ނުކުރެއްވޭނެ ކަަމަށް، ވޯޓު ދެނީ އިތުބާރުކުރާތީ ކަމަށް - ފަޒްނާ
7 ސެޕްޓެމްބަރު 2023 | ބުރާސްފަތި 08:08ހައްލުކޮށްދެއްވި ކަންކަމުގައި ހުރި ކަންބޮޑުވާ ކަންކަންވެސް ހައްލުކުރެވޭނީ އިބޫއަށް ކަމަށް ރައްޔިތުން ބުނޭ
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ދެކަނބަލުން
ކެމްޕޭންގެ ތެރެއިންނާއި އެކިއެކި ކަންކަމުގައި ބައްދަލުވާ ރައްޔިތުންގެ ބުނެފައިވަނީ ރައްޔިތުން އެދޭ މައްސަލަތައް ހައްލުކުރެވޭނީ ރައީސުލްޖުމްހުރިއްޔާ އިބްރާހިމް މުހައްމަދު ޞާލިހަށް ކަމަށް، އެމަނިކުފާނުގެ އަނބިކަނބަލުން ފަޒްނާ އަހުމަދު ވިދާޅުވެއްޖެއެވެ.
ރާއްޖެ ޓީވީގެ ފަށާއިރުގައި މެހެމާނެއްގެ ގޮތުގައި ބަައިވެރިވެވަޑައިގެން ރައީސްގެ އަނބިކަނބަލުން ފަޒްނާ ވިދާޅުވީ އާންމުންގެ ވަރަށް ބޮޑު އިތުބާރެއް ރައީސްއަށް އެބައޮތް ކަމަށެވެ. އެގޮތަށް ވިދާޅުވަނީ އެންމެ ބޮޑު ޝަކުވާތަކެއް އައި މުސާރައިގެ މައްސަލައިގައި ސްކޫލް ޓީޗަރުންނާއި ހެލްތު ޕްރޮފެޝަނަލުންގެ މުސާރަ ބޮޑުކުރެއްވި ކަމަށެވެ. މީގެ އިތުރުން މާލޭގެ ރައްޔިތުންނަށް ދާއިމީ ބޯހިޔާވަހިކަމެއް ދެއްވާނެކަމުގެ ވައުދުފުޅާއެކު ރައީސް ގޯތި ދެއްވި ކަމަށެވެ. ފަޒްނާ ވިދާޅުވީ މި ހުރިހާކަމެއް ކުރެއްވި ނަމަވެސް އަދިވެސް ހައްލުކުރަންޖެހޭ ކަންކަން އެބަހުރި ކަމަށެވެ. އަދި އެކަންކަން ހައްލުކުރެވޭނީ ވެސް ރައީސް ޞާލިހަށް ކަމަށް ގިނަ ބަޔަކު ދެކެވަޑައިގަންނަވާ ކަމަށެވެ.
ފަޒްނާ ވިދާޅުވީ ކެމްޕޭނުގައި ޑޯޓުޑޯއަށް ގޮސް ބައްދަލުކޮށް ވާހަކަ ދައްކާ މީހުންނާއި މުލިއާގެއަށް އައިސް ބައްދަލުކުރާ މީހުންގެ ވެސް ރައީސް ޞާލިހަށް އޮތް އިތުބާރު ފެނިވަޑައިގަންނަވާ ކަމަށެވެ. އަދި އެމީހުން ރައީސްއަށް ވޯޓުދެއްވަނީ ދޭ ހަދިޔާއެއްގެ ސަބަބުން ނޫން ކަމަށާއި، ވޯޓު ދެއްވަނީ އިތުބާރުކުރައްވާތީ ކަމަށެވެ. އަދި ބައްދަލުވާ ފަރާތްތަކުން ބުނަމުންދަނީ ކަންބޮޑުވުންތައް ހައްލުކޮށްދެއްވީ ރައީސް ކަމަށާއި، ދެންވެސް އެބޭފުޅުންގެ ކަންބޮޑުވުންތައް އަޑުއައްސަވާފައި ހައްލުކޮށްދެވެންޔާ ހައްލުކޮށްދެވޭނީ ރައީސްއަށްކަން އެބޭފުޅުން ގަބޫލުރައްވާ ކަމަށެވެ.
މާލޭގެ ބޯހިޔާވަހިކަމަށް އިޝާރަތްކުރައްވާ ފަޒްނާ ވިދާޅުވީ ކެމްޕޭންތަކަށް ގެތަކަށް ވަޑައިގަންނަވާއިރު ހިތްޕުޅަށް އަރާވަޑައިގަންނަވަނީ އެ ރައްޔިތުން ދިރިއުޅެނީ ކިހިނެއްބާއެވެ. އަދި ސްކޫލް ދަރިވަރުން ކިޔަވަނީ ކިހިނެއްބާއޭ ހިތްޕުޅަށް އަރާ ކަމަށާއި، ބޯހިޔާވަހިކަމަކީ ވަރަށް ބޮޑު މައްސަލައެއް ކަމަށެވެ. ފަޒްނާ ވިދާޅުވީ ރޭގަނޑު ކުދިން ނުނިދާވާހަކަ ދައްކާ އިރު، ހިތްޕުޅަށް ބައެއްފަހަރު އަރާވަޑައިގަންނަވަނީ އެކުދިން ނިދަންދާނެ ތަނެއް ނެތީ ނުނިދާ ތިބެނީ ކަމަށެވެ. އަދި އެއްބަޔަކު ނިދާ ހޭލީމަ އަނެއްބަޔަކަށް ނިދޭގޮތަށް ހުންނަ ކަމަށްވެސް ހިތްޕުޅަށް އަރާ ވަޑައިގަންނަވާ ކަމަށެވެ.
ފަޒްނާ ވިދާޅުވީ ގޯތި ލިބުނު ފަރާތްތަކުން ލޮލުން ކަރުނަ އަންނަނީ ޒަމާނީ ބޯހިޔާވަހިކަމަށް ހައްލެއް ލިބުމުން ކަމަށާއި، އެއީ އެވަރު ކަމެއް ކަމަށެވެ. އަދި އެމީހުންގެ ވާހަކަ އަޑުއެއްސެވުމުން އެކަމަނާގެ ލޮލުންވެސް ފެން އަންނަ ކަމަށް ރައީސް ވިދާޅުވިއެވެ.
