އދ. ދަނގެތީ ބަނދަރު ބޮޑުކުރުމާއި އިންޑަސްޓރިއަލް ޒޯނަށް ބިންހިއްކުމާއި އެސަރަހައްދަށް ދޯނި ގާތްކުރެވޭ ގޮތަށް ހެދުމުގެ މަޝްރޫއު، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ހަވާލުކޮށްފިއެވެ.

ބުދަ ދުވަހު ޕްލޭނިން މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް އާޒިމެވެ.

މި މަޝްރޫއު އެމްޓީސީސީއާ ހަވާލުކޮށްފައިވަނީ 450 ދުވަހުގެ ތެރޭގައި ނިންމާގޮތަށް، 76.8 މިލިއަން ރުފިޔާއަށެވެ.

މި މަޝްރޫއުގެ ދަށުން ކުރުމަށް ހަމަޖެހިފައިވާ މަސައްކަތްތަކަކީ އިންޑަސްޓްރިއަލް ޒޯނަށް ބޭނުންވާ ބިން ހިއްކުން، 35,500.00 ކިއުބިކް މީޓަރުގެ ބަނދަރު ފުންކުރުން، 48,000.00 ކިއުބިކް މީޓަރުގެ އައު ބަނދަރު ފުން ކުރުން، 21,500.00 ކިއުބިކް މީޓަރުގެ ނެރު ފުންކުރުން، 33,600.00 ކިއުބިކް މީޓަރުގެ މޫދަށް އެރޭ ސަރަހައްދު ފުންކުރުން، 7,800.00 ކިއުބިކް މީޓަރުގެ ހިމެނެއެވެ.

މީގެއިތުރުން ސޭންޑްފިލް ބްރޭކްވޯޓަރ ހެދުމާއި، 623 ސޭންޑްފިލް ރިވެޓްމެންޓް ޖެހުމާއި، 170 މީޓަރުގެ ސޭންޑްފިލް ކީވޯލް ހެދުމާއި، 43 މީޓަރުގެ ރިވެޓްމެންޓް ޖެހުމާއި، 219 މީޓަރުގެ އެއްގަމު ތޮށި ޖެހުމާއި، 389 މީޓަރުގެ ސްކޯރިންގ އެޕްރޮން ޖެހުމާއި، 08 މޫރިންގ ބޮއި ހަރުކުރުމާއި، 11x11 މީޓަރުގެ ރޭމްޕެއް ހެދުމާއި، އެކްސެސް ޕްލެޓްފޯމް އެޅުމާއި، 6x35 މީޓަރުގެ ކޮންކްރީޓް ބްރިޖް ހެދުމާއި، 19 މަގު ބައްތި ހަރުކުރުމާއި، 2 ނެރު ބައްތި ޖެހުމާއި އަދި 3,052.00 ސްކޮޔަރމީޓަރު ޕޭވްމަންޓް ހެދުން ހިމެނެއެވެ.