އެސްއެމްއީ ހަބުގެ ދެވަނަ ފިޔަވަހި ހުޅުވައިފި
6 ސެޕްޓެމްބަރު 2023 | ބުދަ 03:20އާރޓްސް އެންޑް ކްރާފްޓްގެ އުފެއްދުން ވިއްކުމަށްޓަކައި 5 ސްޓޯލް ވަނީ ގާއިމު ކޮށްފައި
އެސްއެމްއީ ހަބުގެ ދެވަނަ ފިޔަވަހި ހުޅުވުމުގެ ތެރެއިން
މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ އިސްނެގުމުގެ މަތިން ބިޒްނަސް ސެންޓަރ ކޯޕަރޭޝަން (ބީސީސީ) އާއި ހަވާލު ކުރެވިގެން ކުރިއަށްގެންދާ އެސްއެމްއީ ހަބުގެ ދެވަނަ ފިޔަވަހި ރަސްމީކޮށް ހުޅުވައިފިއެވެ.
މިއީ ވިޔަފާރީގެ ދާއިރާގައި ހަރަކާތްތެރިވާ ފަރާތްތަކަށް ހެޔޮ އަގުގައި ވިޔަފާރީގެ ޖާގަ ހޯދައިދިނުމާއި ލޯކަލް އަދި ބައިނަލްއަގްވާމީ މާކެޓުތަކަށް ތައާރަފްކޮށް ވިޔަފާރި ކުރިއެރުވުމަށް މަގު ފަހިކޮށްދިނުމުގެ މަގުސަދުގައި ކުރިއަށްގެންދާ މަޝްރޫއެކެވެ. އެގޮތުން އެސްއެމްއީ ހަބުގެ ފުރަތަމަ ފިޔަވަހީގައި ކާބޯތަކެތި ވިއްކާ 19 ކިއޯސްކާއި ބުކް ސްޓޯލެއް ވަނީ މީގެ ކުރިން ހުޅުވާފައެވެ.
އަންގާރަ ދުވަހު އެސްއެމްއީ ހަބުގެ ދެވަނަ ފިޔަވަހި ހުޅުވާފައިވާއިރު މި ފިޔަވަހީގައި އާރޓްސް އެންޑް ކްރާފްޓްގެ އުފެއްދުން ވިއްކުމަށްޓަކައި 5 ސްޓޯލާއި ގާރމަންޓް އުފެއްދުން ވިއްކުމަށްޓަކައި 4 ސްޓޯލާއި، ޑެއިލީ-ޔޫސް އަށް 1 ޕޮޕްއަޕް ސްޓޯލް ވަނީ ގާއިމުކޮށްފައެވެ. އަދި ދިވެހި ފަންނުވެރިންނާއި ކުރެހުންތެރިންނަށް ހާއްސަކޮށްގެން އާރޓް ގެލަރީއެއް ވެސް ވަނީ ގާއިމްކޮށްފައެވެ.
މީގެ އިތުރުން، ޒުވާނުންނަށް ހާއްސަކޮށްގެން ގޭމިންގ ރޫމަކާއި ކުޑަކުދިންނަށް ހާއްސަކޮށްގެން "ކިޑްސް ޕްލޭ" އޭރިއާއެއް ވެސް އެސްއެމްއީ ހަބްގައި ހިމެނެއެވެ. އަދި 25 މީހުންގެ ޖާގައިގެ ސިނަމާއެއް ވެސް ހުޅުވުމަށް ހަމަޖެހިފައިވާ ކަމަށް ބީސީސީން ބުނެއެވެ.
ރާއްޖޭގެ އުތުރާއި ދެކުނުގެ އިގްތިސާދު ކުރިއަރުވައި ހަރުދަނާ ކުރުމުގެ ގޮތުން، މިފަދަ ހަބުތައް މާލޭގެ އިތުރުން ކުޅުދުއްފުށި ސިޓީއާއި އައްޑޫސިޓީގައި ގާއިމްކުރުމުގެ މަސައްކަތް ބީސީސީން އަންނަނީ ކުރަމުންނެވެ.
