އަނިޔާގެ ސަބަބުން ގްރީލިޝް އާއި އާނޯލްޑަށް އިންގްލެންޑް ޓީމުން ފުރުސަތު ގެއްލިއްޖެ

އަނިޔާގެ ސަބަބުން މެންޗެސްޓަރ ސިޓީގެ ޖެކް ގްރީލިޝް އާއި ލިވަޕޫލްގެ ފުލްބެކް ޓްރެންޓް އަލެކްސަންޑަ އާނޯލްޑަށް އިންގްލެންޑް ގައުމީ ޓީމުން ފުރުސަތު ގެއްލިއްޖެއެވެ.

ކުރިޔަށް އޮތް ޔޫކްރެއިން އާއި ސްކޮޓްލޭންޑާ ދެކޮޅަށް ކުޅޭ މެޗުތަކަށް އިންގްލެންޑުން ޓީމް އެކުލަވާލިއިރު، މި ދެ ކުޅުންތެރިން ބާކީ ކޮށްފައިވަނީ ދާދި ފަހުން ލިބުނު އަނިޔާއާ ގުޅިގެނެވެ.

މިދިޔަ ހޮނިހިރު ދުވަހު ފުލަމް ކައިރިން 5-1 ން ސިޓީ މޮޅުވި މެޗުގައިވެސް އަނިޔާގެ ސަބަބުން ގްރީލިޝް ހިމަނާފައެއް ނުވެއެވެ. އާނޯލްޑަށް އަނިޔާވެފައިވަނީ މިދިޔަ އާދިއްތަ ދުވަހު އެސްޓަން ވިލާ ކައިރިން 3-0 ން މޮޅުވި މެޗުގައެވެ. އަނިޔާވުމާ ގުޅިގެން މެޗުގެ 71 ވަނަ މިނެޓުގައި އޭނާ ވަނީ ބަދަލުކޮށްފައެވެ.

ޔޫރޯ ކޮލިފައިންގައި ހޮނިހިރު ދުވަހު އިންގްލެންޑް ކުޅުމަށް ހަމަޖެހިފައިވަނީ ޔޫކްރެއިން އާއެވެެ. މި މެޗު ކުޅުމަށް ހަމަޖެހިފައިވަނީ ޕޮލެންޑް ގައެވެ. އެއަށްފަހު 12 ވަނަ ދުވަހު ސްކޮޓްލޭންޑާއެކު އެކުވެރިކަމުގެ މެޗެއް ކުޅޭނެއެވެ.

މި ދެ ކުޅުންތެރިންގެ ބަދަލުގައި ކުޅުންތެރިން ނުނަގަން އިންގްލެންޑްގެ ކޯޗު ގެރެތު ސައުތުގޭޓް ވަނީ ނިންމާފައެވެ.