މީހުން ހައްޔަރު ކުރުމަކީ ސަރުކާރާ ބެހޭ ކަމެއް ނޫން: އަބްދުއްރަހީމް
ގާސިމް އިބްރާހިމް ރާއްޖެއިން ބޭރަށް ނުފޮނުވުމުގައިވެސް ސަރުކާރާ ގުޅުމެއް ނެތް
އަބްދުއް ރަހީމް:- މެމްބަރުން ހައްޔަރު ކުރުމާ ސަރުކާރާ ގުޅުން ނެތް ކަމަށް ވިދާޅުވި
ރައްޔިތުންގެ މަޖިލީހުގެ މެމްބަރުން ހައްޔަރުކުރަމުންދިއުމާ ސަރުކާރާ އެއްވެސް ގުޅުމެއް ނެތް ކަމަށް ސަރުކާރު ހިންގައި މައި ޕާޓީ ޕީޕީއެމް ޑެޕިއުޓީ ލީޑަރު އަބްދުއްﷲ އަބްދުއް ރަހީމް ވިދާޅުވެއްޖެ އެވެ.
ދިއްގަރު ދާއިރާގެ މެމްބަރު އަހްމަދު ފާރިސް ހައްޔަރު ކުރުމާ ގުޅޭ ގޮތުން ރާއްޖެއެމްވީން ދެންނެވި ސުވާލަކަށް ޖަވާބު ދެއްވަމުން އަބްދުއް ރަހީމް ވިދާޅުވީ ޖިނާއީ ކުށެއް ކުރީމަ ޝަރުއީ މަރުހަލާގައި ނުވަތަ ތަހްގީގު މަރުހަލާގައި ކޮންމެ މީހަކު ވިއަސް ގެންދެވޭނެ ކަމަށެވެ. ނަމަވެސް އެއީކީ އެ ޕާޓީން ގޮތްކިޔާ ފާޑު ކިޔާނެ ކަންކަން ނޫން ކަމަށްވެސް އޭނާ ވިދާޅުވި އެވެ.
"އަދި ހަމަ އެއާކު އަޅުގަނޑެއް ގަބޫލެއް ނުކުރަން އެއީކީ ސަރުކާރުން ވަކި މީހެއްގެ ގައިގައި އަތްލާންވެގެން ވަކި މީހަކަށް އަމާޒުކޮށްގެން ކަމެއް ކުރަނީ ކަމަކަށް. މީގަ މިވާ ގޮތަކީ ސިޔާސީ ބޭފުޅަކާމެދު ކަމެއް ކުރީމަ މީޑިއާގެ ސަމާލުކަމަށް އަންނާނީ. އެކަމު ދުވާލަކު ކިތައް ބޭފުޅުން ގެންދާނެތޯ ތަހްގީގަށް،" އޭނާ ވިދާޅުވި އެވެ.
އަބްދުއް ރަހީމް މި މޭރުމުން ވާހަކަ ދައްކަވާފައިވާއިރު ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫނު އަބްދުލް ގައްޔޫމްގެ ދަރިކަލުން ފާރިސް މައުމޫނު ހައްޔަރު ކުރުމުން ސަރުކާރަށް ފާޑުކިޔުންތައް ވަނީ އަމާޒުވެފަ އެވެ. އެއީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ފެއިލްކޮށްލުމަށް ސަރުކާރުން ކުރި ކަމެއްގެ ގޮތުގައިވެސް ބައެއް މީހުންދެކެ އެވެ.
މީގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހިމް އާލާސްކަންފުޅާ އުޅުވާއިރު ރާއްޖެއިން ބޭރަށް ފުރާވަޑައިގަތުމަށް ހުއްދަ ނުދިނުމުގައިވެސް ސަރުކާރާ ގުޅުމެއް ނެތް ކަމަށް އޭނާ ވިދާޅުވި އެވެ.
"ރާއްޖޭގެ ސިޔާސީ މާހައުލު މި އޮތްގޮތުން އިދިކޮޅު ފަރާތްތަކުން ރާއްޖޭގައި ހިނގާ ކޮންމެ ކަމެއް ސަރުކާރުގެ ބޮލުގައި އަޅުވަމުން ގެންދަވަނީ، އެއީކީ އެއްވެސް ހަގީގަތެއް އޮތް ކަމެއް ނޫން. އަޅުގަނޑުމެން ޕާޓީއަކުންވެސް އަދި ސަރުކާރަކުންވެސް ވަކި ބޭފުޅަކާމެދު ވަކި ގޮތަކަށް ކަންކަން ކުރާކަށެއް ޝަރުއީ ނިޒާމަކަށްވެސް އަންގާފައި އޮންނާނެ ކަމަކަށް އަޅުގަނޑު ގަބޫލެއް ނުކުރަން. ނާންގާނެ،" އަބްދުއް ރަހީމް ވިދާޅުވި އެވެ.
އަބްދުއްރަހީމް ވިދާޅުވީ ބުދަ ދުވަހުގެ ބޭއްވި ކައުންސިލް ބައްދަލުވުމަކީ ޕާޓީގެ ހަރަކާތްތައް ފުޅާކުރުމަށާއި ރާއްޖޭގެ އެކި ސަރައްދުތަކަށް ދަތުރުތައް ފެށުމާ ގުޅޭ ގޮތުން ބޭއްވި ބައްދަލުވުމެކެވެ.
