އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގައި ވޯޓު ލާން ޖެހޭނީ ކަޅު ނުވަތަ ނޫ ކުލައިގެ ގަލަމަކުން ކަމަށް އިލެކްޝަން ކޮމިޝަން (އީސީ)ން ބުނެފިއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އީސީގެ ނާއިބު ރައީސް އިސްމާއީލް ހަބީބު ވިދާޅުވީ، ވޯޓުގެ ސިއްރުކަން ގެއްލިދާނެ ހާލަތްތަކެއް އަތުވެދާނެ ކަމަށް ބުނެ ބައެއް ސިޔާސީ ޕާޓީތަކުން ހުށަހަޅާފައިވާ މައްސަލަތަކާ ބެހޭ ގޮތުން ކޮމިޝަނުގެ ގާނޫނީ ޓީމާއެކު އާދިއްތަ ދުވަހު ބައްދަލުވުމެއް ބާއްވާފައިވާކަމަށެވެ.
ހަބީބު ވިދާޅުވީ އިންތިޚާބުތަކާބެހޭ ގާނޫނާއި ގަވާއިދުގައި އޮންނަނީ، ވޯޓުލާން ދާ މީހަކަށް ވޯޓުލާ މަރުކަޒަށް ވެއްދޭނީ އާދައިގެ ގަލަމެއް އެކަނި ކަމަށެވެ. އަދި އާދައިގެ ގަލަމެއް ކަމަށް ބަލައިގަންނާނީ ކޮން ކަހަލަ ގަލަމެއްކަން އެ ކޮމިޝަންގެ ބައްދަލުވުމުގައި ނިންމާފައި ވާކަމަށް ހަބީބު ވިދާޅުވިއެވެ. އަދި ވިދާޅުވީ ކަޅު ނުވަތަ ނޫ ކުލައިގެ އާދައިގެ ގަލަމަކަށް ނުވާނަމަ ވޯޓުލާ މަރުކަޒަކަށް ނުވެއްދޭނެ ކަމަށެވެ.
ވޯޓުލާ މަރުކަޒުގެ ވޯޓުލާ ބޫތުގައި ގަލަމެއް އޮންނާނެކަން ފާހަގަކުރައްވައި ހަބީބު ވިދާޅުވީ، އެންމެ ރަނގަޅު ގޮތަކީ ބޫތުގައި އޮތް ގަލަން ބޭނުން ކުރުން ކަމަށެވެ.
އެއީ ކަޅު ނުވަތަ ނޫ ކުލައިގެ ގަލަމަކަށް ނުވަންޏާ އެ ގަލަމެއް ވޯޓުލާ މަރުކަޒަކަށް ނުވެއްދޭނެ. އާދައިގެ ގަލަމެއް ވެއްދޭނީ. އާއްމުކޮށް ބޭނުންކުރާ ގަލަމުގެ ކުލަ ކޮމިޝަނުން މި ނިންމީ ކަޅު ނުވަތަ ނޫ ކުލައަށޭ ވާންޖެހޭނީ. ވޯޓިން ބޫތުގަ ގަލަމެއް އޮންނާނެ. އެހެންވީމަ އެންމެ ރަނގަޅު ގޮތަކީ ބޫތުގަ އޮތް ގަލަން ބޭނުންކުރުން. އެނޫން ގަލަމެއް ގެންނަ ކަމަށްވަންޏާ ގެންނަންވާނީ ކަޅު ނުވަތަ ނޫކުލައިގެ، އާދައިގެ ގަލަމެއް. މިކަމަށް ހުރިހާ ރައްޔިތުން ސަމާލުކަން ބެހެއްޓުމަކީ ވަރަށް މުހިންމު ކަމެއް.އީސީގެ ނާއިބު ރައީސް، އިސްމާއީލް ހަބީބު
މީގެ އިތުރުން ހަބީބު ވިދާޅުވީ ވޯޓު ކަރުދާހުގައި އެއް ފާހަގައަށްވުރެ ގިނަ ފާހަގަ ނުވަތަ ނިޝާނެއް ނުވަތަ ކުރެހުމެއް ނުވަތަ ލިޔުމެއްވެސް އިތުރަށް އޮވެއްޖެނަމަ ވޯޓު ކަރުދާސް ބާތިލުވާނެ ކަމަށެވެ.
ދެވަނަ ކަމެއްގެ ގޮތުގައި ލަފާދޭ ކޮމެޓީގަ ކަންބޮޑުވުން ފާޅުކުރި ކަމަކީ، ވޯޓު ކަރުދާހުގަ ފާހަގަ ޖަހާއިރު އެއް ފާހަގައަށްވުރެ ގިނަ ފާހަގަ އެބަ ޖަހާ ބައެއް މީހުން. އެއީ ބައެއް ކަހަލަ މަޖުބޫރީ ހާލަތްތަކެއް އެމީހުންނަށް ދިމާވެގެން ކުރާ ކަމެއް. އަޅުގަނޑުމެން ކޮމިޝަނުން ވިސްނާގޮތުގަ ވޯޓުލާ މީހަކަށް އެއްވެސް ކަހަލަ މަޖުބޫރީ ހާލަތެއް ނޯންނާނެ. އޭނަ ވޯޓުލާންވާނީ އޭނަގެ އަމިއްލަ އިޚްތިޔާރުގަ އޭނައަށް ފެންނަ ރަނގަޅު ކެންޑިޑޭޓަކާ ދިމާލުގަ ރަނގަޅު ފާހަގަ. ރަނގަޅު! އެއް ފާހަގައަށްވުރެ ގިނަ ފާހަގަ، ނިޝާން ނުވަތަ ކުރެހުމެއް އެކަހަލަ އެއްވެސް އެއްޗެއް އޮވެއްޖެއްޔާ އެ ވޯޓަކީ ބާތިލް ވޯޓެއްގެ ގޮތުގަ ބަލަނީ. އެހެންވީމަ ކުރީގަ އިންތިޚާބުތަކުގަ ބައެއް ފަހަރަށް އުމުރުން ދުވަސްވީ ބޭފުޅުންނަށް އެބޭފުޅުން ފާހަގަލައްވާއިރު ފަހަރުގަ ރަނގަޅު ނޫން ގޮތަކަށް ފާހަގަޖެހިދާނެ. ޖެހިފަ އޮވެއްޖެއްޔާ ދެވަނަ ފަހަރަށް ރަނގަޅު ކޮށްލަން އިތުރު ރަނގަޅު ފާހަގައެއް ލާ. އެހެންވީމަ ވޯޓު ލާ މީހާގެ ނިޔަތަކީ ރަނގަޅު ފާހަގައެއް ޖެހުން ކަމަށް ކޮމިޝަނުން ބަލަމުން އައީ. ނަމަވެސް މިކަމުން ނާޖާއިޒް ފައިދާއެއް ނަގާ ކަމަށްވަންޏާ އެކަމަކީ ކޮމިޝަނުން ކަންބޮޑުވާ ކަމެއް. ވޯޓުގެ ސިއްރުކަން ގެއްލޭ ހާލަތުގަ އެއްވެސް ކަމެއް ކުރުމަށް އެއްވެސް ފަރާތަކަށް ކޮމިޝަނުން އެފުރުސަތެއް ނުދޭނެ. އެހެންވީމަ ކޮމިޝަނުން ނިންމި ދެވަނަ ނިންމުމުގަ ނިންމާފަ މި ވަނީ ކޮންމެ މީހަކުވެސް އެމީހަކަށް ފެންނަ ކެންޑިޑޭޓުގެ ނަމާ ދިމާލުގަ އެންމެ ފާހަގައެއް ޖެހޭނީ.އީސީގެ ނާއިބު ރައީސް، އިސްމާއީލް ހަބީބު
ހަބީބު ވިދާޅުވީ ކޮމިޝަނުން ވިސްނާ ގޮތުގައި ވޯޓުލާ މީހަކަށް އެއްވެސް ކަހަލަ މަޖުބޫރީ ހާލަތެއް ނޯންނާނެ ކަމަށާއި، އޭނާ ވޯޓުލާން ވާނީ އޭނގެ އަމިއްލަ އިޚްތިޔާރުގައި އޭނާއަށް ފެންނަ ކެނޑިޑޭޓެއްގެ ނަމާ ދިމާލުގައި ކަމަށެވެ.
