ރިޔާސީ އިންތިޚާބުގައި ވޯޓު ލާން ޖެހޭނީ ކަޅު ނުވަތަ ނޫ ކުލައިގެ ގަލަމަކުން: އީސީ

އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގައި ވޯޓު ލާން ޖެހޭނީ ކަޅު ނުވަތަ ނޫ ކުލައިގެ ގަލަމަކުން ކަމަށް އިލެކްޝަން ކޮމިޝަން (އީސީ)ން ބުނެފިއެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އީސީގެ ނާއިބު ރައީސް އިސްމާއީލް ހަބީބު ވިދާޅުވީ، ވޯޓުގެ ސިއްރުކަން ގެއްލިދާނެ ހާލަތްތަކެއް އަތުވެދާނެ ކަމަށް ބުނެ ބައެއް ސިޔާސީ ޕާޓީތަކުން ހުށަހަޅާފައިވާ މައްސަލަތަކާ ބެހޭ ގޮތުން ކޮމިޝަނުގެ ގާނޫނީ ޓީމާއެކު އާދިއްތަ ދުވަހު ބައްދަލުވުމެއް ބާއްވާފައިވާކަމަށެވެ.

ހަބީބު ވިދާޅުވީ އިންތިޚާބުތަކާބެހޭ ގާނޫނާއި ގަވާއިދުގައި އޮންނަނީ، ވޯޓުލާން ދާ މީހަކަށް ވޯޓުލާ މަރުކަޒަށް ވެއްދޭނީ އާދައިގެ ގަލަމެއް އެކަނި ކަމަށެވެ. އަދި އާދައިގެ ގަލަމެއް ކަމަށް ބަލައިގަންނާނީ ކޮން ކަހަލަ ގަލަމެއްކަން އެ ކޮމިޝަންގެ ބައްދަލުވުމުގައި ނިންމާފައި ވާކަމަށް ހަބީބު ވިދާޅުވިއެވެ. އަދި ވިދާޅުވީ ކަޅު ނުވަތަ ނޫ ކުލައިގެ އާދައިގެ ގަލަމަކަށް ނުވާނަމަ ވޯޓުލާ މަރުކަޒަކަށް ނުވެއްދޭނެ ކަމަށެވެ.

ވޯޓުލާ މަރުކަޒުގެ ވޯޓުލާ ބޫތުގައި ގަލަމެއް އޮންނާނެކަން ފާހަގަކުރައްވައި ހަބީބު ވިދާޅުވީ، އެންމެ ރަނގަޅު ގޮތަކީ ބޫތުގައި އޮތް ގަލަން ބޭނުން ކުރުން ކަމަށެވެ.

މީގެ އިތުރުން ހަބީބު ވިދާޅުވީ ވޯޓު ކަރުދާހުގައި އެއް ފާހަގައަށްވުރެ ގިނަ ފާހަގަ ނުވަތަ ނިޝާނެއް ނުވަތަ ކުރެހުމެއް ނުވަތަ ލިޔުމެއްވެސް އިތުރަށް އޮވެއްޖެނަމަ ވޯޓު ކަރުދާސް ބާތިލުވާނެ ކަމަށެވެ.

ހަބީބު ވިދާޅުވީ ކޮމިޝަނުން ވިސްނާ ގޮތުގައި ވޯޓުލާ މީހަކަށް އެއްވެސް ކަހަލަ މަޖުބޫރީ ހާލަތެއް ނޯންނާނެ ކަމަށާއި، އޭނާ ވޯޓުލާން ވާނީ އޭނގެ އަމިއްލަ އިޚްތިޔާރުގައި އޭނާއަށް ފެންނަ ކެނޑިޑޭޓެއްގެ ނަމާ ދިމާލުގައި ކަމަށެވެ.