ހއ. މާރަންދުއާއި ހއ. ތަކަންދޫ ބަނދަރު ބޮޑުކުރުމުގެ މަޝްރޫއު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕަބްލިކް ލިމިޓެޑް (އެމްޓީސީސީ)އާ ހަވާލުކޮށްފިއެވެ.

މި ކޮންޓްރެކްޓްތަކުގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީގެ ފަރާތުން ސޮއިކުރެއްވީ ޗީފް އޮޕަރޭޓިންގ އޮފިސަރ އާދަމް އާޒިމްއެވެ.

ހއ. ތަކަންދޫ ބަނދަރު އަޕްގްރޭޑް ކުރުމުގެ މަޝްރޫއުގެ ދަށުން ކުރިއަށްދާނީ:

- ބަނދަރު ކޮނުން 15،565 ކިއުބިކް މީޓަރ

- ބޭރު ހިލަ ތޮށި ޖެހުން 161 މީޓަރ

- އެއްގަމު ހިލަ ތޮށި ޖެހުން 58 މީޓަރ

- ސޭންޑްފިލްޑް ބްރޭކް ވޯޓަރ ޖެހުން (98 މީޓަރު)

- ސޭންޑް ފިލްޑް ބްރޭކް ވޯޓަރ އެތެރެފަރާތު ބްލޮކް ޖެއްސުން (94 މީޓަރު)

- އެއްގަމު ތޮށިޖެހުން (150 މީޓަރު)

- 7 މޫރިންގ ބޮއި

- ބަނދަރު ލައިޓް ޖެހުން

- ޕޭވްމަންޓް އެޅުން

420 ދުވަހުގެ ތެރޭގައި ނިންމާ ގޮތަށް ހަވާލުކޮށްފައިވާ މި މަޝްރޫއަކީ 46،593،362.16 (ސާޅީސް ހަ މިލިއަން ފަސް ލައްކަ ނުވަދިހަ ތިން ހާސް ތިންސަތޭކަ ފަސްދޮޅަސް ދެ ރުފިޔާ, ސޯޅަ ލާރީގެ) އަގުހުރި މަޝްރޫޢުއެެކެވެ.

ހއ. މާރަންދޫ ބަނދަރު ބޮޑު ކުރުމުގެ މަޝްރޫއުގެ ދަށުން ކުރުމަށް ނިންމާފައިވާ ކަންކަމަކީ:

- ބަނދަރު ފުން ކުރުން (9,248.00 ކިއުބިކް މީޓަރު)

- އައު ބަނދަރު ފުން ކުރުން (45,000.00 ކިއުބިކް މީޓަރު)

- ނެރު ފުން ކުރުން (1,657.00 ކިއުބިކް މީޓަރު)

- 130 މީޓަރު ބޭރުތޮށި ޖެހުން

- 60 މީޓަރު ރިވެޓްމެންޓް ޖެހުން

- 20 މީޓަރު ނެރުފައިކަށި ޖެހުން

- 17 މީޓަރު ގްރޮއިން ޖެހުން

- 215 މީޓަރު އެއްގަމު ތޮށި ޖެހުމާއި 215 މީޓަރު ސްކޯރިންގ އެޕްރޮން ޖެހުން

- 54 މޫރިންގ ރިންގް ހަރުކުރުން

- 11 މޫރިންގ ބޮއި ހަރުކުރުން

- ބައު ބަނދަރުގެ ވެލި ދެމުމުގެ މައްސަލަ ހައްލުކުރުން

- ރޭންޕެއް ހެދުމާއި އެކްސެސް ޕްލެޓްފޯމް އެޅުން

- 17 މަގުބައްތިއާއި 02 ނެރުބައްތި ޖެހުން

- 2,291.00 އަކަމީޓަރު ޕޭވްމަންޓް ހެދުން

މި މަޝްރޫއުގެ އަގަކީ 43,982,195.40 (ސާޅީސް ތިން މިލިޔަން ނުވަ ލައްކަ އަށްޑިހަ ދެ ހާސް ސަތޭކަ ނުވަދިހަ ފަސް ރުފިޔާ، ސާޅީސް ލާރި)އެވެ. ކޮންޓްރެކްޓްގެ މުއްދަތަކީ 480 ދުވަހެވެ.