އިދިކޮޅަށް އަލުން ވެރިކަން ދީފިނަމަ، ދެން ހުރި ފަޅުތަކާއި ރަށްތައްވެސް ވިއްކައި ހުސްކޮށްލާނެ: ރައީސް
ކޮންމެ ރައްޔިތަކުވެސް ވިސްނުންތެރިކަމާއެކު ވޯޓުލުމަށް ރައީސް ވަނީ އެދިވަޑައިގެންފައި
ރައީސް ސާލިހް ވާހަކަފުޅުދައްކަވަނީ
އިދިކޮޅަށް އަލުން ވެރިކަން ދީފިނަމަ ދެން ހުރި ފަޅުތަކާއި ރަށްތައްވެސް ވިއްކައި ހުސްކޮށްލާނެ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ހދ. ނޮޅިވަރަމުގައި ބޭއްވި ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ރައްޔިތުންގެ ކޮންމެ ވޯޓަކީވެސް ރާއްޖޭގެ މުސްތަގުބަލާ ގުޅިފައިވާ ވޯޓެއް ކަމަށެވެ.
ވުމާއެކު، ކޮންމެ ރައްޔިތަކުވެސް ވިސްނުންތެރިކަމާއެކު ވޯޓުލުމަށް ރައީސް ވަނީ އެދިވަޑައިގެންފައެވެ.
ރައީސް ވަނީ މީގެ ކުރީގެ ވެރިކަމުގައި ކަން ހިނގައިދިޔަ ގޮތުގެ މައްޗަށްވެސް އަލިއަޅުއްވާލައްވާފައެވެ.
ރައީސް ވިދާޅުވީ، އިދިކޮޅަށް އަލުން ވެރިކަން ދީފިނަމަ، ދެން ހުރި ފަޅުތަކާއި ރަށްތައްވެސް ވިއްކައި ހުސްކޮށްލާނެ ކަމަށެވެ.
ރައީސް އިތުރަށް ވިދާޅުވީ، ހަނިމާދޫ އިންޓަނޭޝަނަލް އެއާޕޯޓު ތަރައްގީކޮށް އިގްތިސާދީ ބޮޑު ތަރައްގީއެއް ގެނައުމުގެ ވިސްނުން ސަރުކާރުގެ އެބަހުރިކަމަށެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން ވަނީ އަތޮޅުތަކުގެ ރަށްރަށުގައި އުމުރާނީ ތަރައްގީގެ ވަރަށް ގިނަ މަޝްރޫއުތައް ހިންގާފައެވެ.
