ރައީސްގެ "ރިއެކްޓް" ނުކުރެއްވުން: ރާޒުވާގެ މިސާލުން

ކުރިއަށް އޮތް ރިޔާސީ އިންތިޚާބަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވާދަ ކުރައްވާއިރު، ކެމްޕޭނުގެ ފޯރިވެސް މިވަނީ އެތައް ގުނައެއް އިތުރުވެފައެވެ. ކެމްޕޭނުގެ ތެރެއިން ދެކެވޭ ވާހަކަތަކަށް ބަލާއިރު، އެންމެ ބޮޑަށް މި ދުވަސްވަރު އިވޭ އެއް ބަހަކަށް "ރިއެކްޓް" މި ބަސް ވާނެއެވެ. ރައީސް ސާލިހު ކަންކަމަށް ރިއެކްޓް ނުކުރައްވާ ވާހަކައާއި، މަޑުމަޑުން ހުންނަވާ ވާހަކައެވެ.

ކަންކަމުގައި އެމަނިކުފާނު ރިއެކްޓް ކުރެއްވުން ލަސްވާކަމަށް ދެކެވޭ ވާހަކައިގެ ރައްދު ރައީސް ސާލިހު ދެއްވާފައިމިވަނީ ރާޒުވާ ކުޅިބައެއްގެ މިސާލުންނެވެ. އެގޮތުން ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ރައީސް ސާލިހު މިވަނީ، ސިޔާސީ ގޮތުންނާއި ޒާތީ ދިރިއުޅުއްވުމާ ގުޅޭގޮތުން ހޯސްޓު އާމިރު ސަލީމް ދެންނެވި ސުވާލުތަކަށް ޖަވާބު ދެއްވާފައެވެ.

ރާޒުވާ ބޯޑު އެތުރިފައިވާ ގޮތަށް އަލިއަޅުވާލައްވައި ރައީސް ވިދާޅުވީ، ބައެއް މީހުން ކުޅެން ފަށާގޮތަށް ރާޒުވާ ކުޅިބައިގައި ހިމެނޭ މަނާފުއްތައް އަވަހަށް ކުރިއަށް ޖައްސާލާ ކަމަށެވެ.

އެއީ މުޅިން ރަނގަޅު ގޮތެއް ނޫންކަމަށް ރައީސް ވިދާޅުވެއެވެ. އެގޮތުން މަނާފުއް ކުޅެލެވޭ އެންމެ ގޮތަކުންވެސް މުޅި ރާޒުވާ ގަނޑަށް އޭގެ އަސަރުކުރާނެކަމަށް ރައީސް ވިދާޅުވިއެވެ.

ރައީސް ވިދާޅުވީ، ރާޒުވާ ކުޅޭއިރުވެސް އެކަންކަމަށް ވިސްނަން ޖެހޭނެ ކަމަށާއި، ކަންކަމުގައި ނިންމުންތައް ނިންމާއިރުވެސް އޮންނާނީ ހަމަ އެ އުސޫލު ކަމަށެވެ. އެމަނިކުފާނަށްވެސް އެފަދަ ތަޖުރިބާތައް ކުރެއްވިފައިވާކަން ރައީސް ސާލިހު ފާހަގަ ކުރެއްވިއެވެ. އަވަސް އަރުވާލާފައި ކަންކަން ނުނިންމަންވީ މިހެންވެ ތޯއްޗެކެވެ.

ރައީސް ވިދާޅުވީ، އެމަނިކުފާނު ކަންކަން ނިންމަވާއިރު، ނުހަނު ފުންކޮށް ވިސްނާވަޑައިގަންނަވާ ކަމަށެވެ. އެންމެ އާދައިގެ ކަމެއްކަމަށް ހީކޮށް ފަރުވާކުޑަ ނިންމުންތައް ނިންމާލާ ކަންކަމަކީ ފަަހަރުގައި އެއަށްވުރެ ބޮޑު ނަތީޖާތަކަކާ ގުޅިފައިވާ ކަންކަމަށްވެސް ވެދާނެކަމަށް ރައީސް ވިދާޅުވިއެވެ.