ސަރުކާރުގެ ތެރޭގައި ތިއްބަވައިގެން ސަރުކާރަށް ފާޑުކިޔުމަކީ ވަރަށް ދަށު ދަރަޖައިގެ ކަމެއް ކަމަށާ ސަރުކާރު ތެރޭގައި މައްސަލައެއް ހުރިނަމަ އެންމެ ރަނގަޅު ގޮތަކީ ބޭރަށް ވަޑައިގަތުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހޮނިހިރު ދުވަހު "ރާއްޖެ ޓީވީ"ގެ ފަށާއިރު ޕްރޮގްރާމުގައި ވާހަކަފުޅުދައްކަވަމުންނެވެ. އެގޮތުން، ކޯލިޝަން ސަރުކާރެއް ދެމެހެއްޓުމަކީ އޭގެ ޒާތުގައި އުނދަގޫކަމެއް ކަަމަށާއި، އެމަނިކުފާނުގެ އަމާޒަކީ މިދައުރު ނިމެންދެން ކޯލިޝަން ދެމެހެއްޓުން ކަމަށް ވިދާޅުވިއެވެ.
ރައީސް ވިދާޅުވީ ރައްޔިތުން ކޯލިޝަން ސަރުކާރެއް އިންތިޚާބު ކުރާއިރު އާނ ބަސް ބުނަނީ އެ ކޯލިޝަނެއްގައި ހިމެނޭ އެންމެންނަށް ކަމަށާއި، އެހެންކަމުން ރައްޔިތުންގެ އެ ނިންމުމާ އެއްގޮތަށް ސަރުކާރު ދެމެހެއްޓުމަށް ކޮންމެ ވެރިޔަކުވެސް މަސައްކަތް ކުރައްވަން ޖެހޭ ކަމަށެވެ. ކުރީ ސަރުކާރުތަކުގެ ކޯލިޝަންތައް ރޫޅާލުމުން އޭގެ ގެއްލުން ވެގެންދިޔައީ ރައްޔިތުންނަށް ކަމަށާއި، އެހެންވެ އެ މަނިކުފާނު ބޭނުންފުޅުވަނީ ކިރިޔާވެސް ކޯލިޝަން ދެމެހެއްޓޭނެ ގޮތެއް އޮތް ނަމަ އެކަން ކުރެއްވުމަށް ކަމަށް ވިދާޅުވިއެވެ.
ވެރިކަމަށް ވަޑައިގެންނެވީ ފާޑުކިޔާނެކަން ގަބޫލުފުޅު ކުރައްވައިގެންކަން ފާހަގަކުރައްވާ ރައީސް ވިދާޅުވީ ސަރުކާރުގައި ތިބެ، ސަރުކާރުން މަސައްކަތް ކުރާގޮތް އެނބިތިބެ އެއާ ދެކޮޅަށް ވާހަކަދައްކަވާނީ އެއްވެސް އަޚުލާގެއް ނެތުމުން ކަމަށެވެ. ސަރުކާރުން ކަންކަން ކުރާ ގޮތުގައި މައްސަލަ ހުރިކަމަށް ގަބޫލުކުރެވޭނަމަ އެންމެ ރަނގަޅުގޮތަކީ ސަރުކާރާ ދުރަށް ދިއުން ކަމަށް ވެސް އެމަނިކުފާނު ވިދާޅުވިއެވެ.
ސަރުކާރުގެ ތެރޭގަ ތިއްބަވާއިރު ކަންތައް ކުރާ ގޮތް އެނގިވަޑައިގެން ތިއްބަވައި، އެއާ އިދިކޮޅަށް ވާހަކަ ދެއްކެވީމާ އަޅުގަނޑަށް ގަބޫލުކުރެވެނީ އެއީ އެއްވެސް ޑިސިޕްލިނެއް ނެތް ބޭފުޅުންނޭ. ސަރުކާރު ތެރޭގައި މައްސަލައެއް ހުރިނަމަ އެންމެ ރަނގަޅު ގޮތަކީ ބޭރަށް ވަޑައިގަތުން. ޚާއްސަކޮށް ރިޔާސީ އިންތިޚާބެއްގަ ކެމްޕޭނެއް ކުރަމުން އަންނައިރު ސަރުކާރުގެ ތެރޭގަ ތިއްބަވައިގެން މިކަހަލަ ކަންކަން ކުރުމަކީ އަޚުލާގީގޮތުން ދަށު ދަރަޖައިގެ ކަމެއް ކަމަށް އަޅުގަނޑަށް ގަބޫލުކުރެވެނީ.ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ރައީސް ވިދާޅުވީ ކޯލިޝަން ސަރުކާރެއްގައި އެއްކޮށް މަސައްކަތް ކުރާއިރު ގެންގުޅޭ ސިޔާސަތުތަކުގައި ޚިޔާލުތަފާތުވުންތަކެއް އުޅޭނެ ކަމަށެވެ. ނަމަވެސް އެއީ މަޝްވަރާ ކޮށްގެން ހައްލު ހޯދޭނެ ކަންކަން ކަމަށާއި ކަނޑައެޅިގެން ސީދާ ސަރުކާރުގެ މަސައްކަތްތަކަށް އުނދަގޫވާގޮތަށް މަސައްކަތް ނުކުރާ ހާލަތެއްގައި އެއްވެސް ބޭފުޅަކު މަގާމުން އެކަހެރި ނުކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ރައީސް މިފަދައިން ވިދާޅުވެފައިވާއިރު، އެމަނިކުފާނާއެކު މިދިޔަ 2018 ވަނަ އަހަރުގެ ރިޔާސީ އިންތިޚާބުގެ ކޯލިޝަން ހެދި ޕާޓީތަކުން ތެރެއިން މިއަހަރުގެ އިންތިޚާބުގައިވެސް އެމަނިކުފާނާއެކު ކޯލިޝަން ހަދާފައިވަނީ އަދާލަތު ޕާޓީން އެކަންޏެވެ. ޖުމްހޫރީ ޕާޓީން ވަކިން މިއަހަރުގެ އިންތިޚާބުގައި ވާދަކުރައްވާއިރު އެ ޕާޓީގެ ސްލޮޓުތަކުގައި ސަރުކާރުގެ އެކި މަގާމުތަކުގައި ތިއްބެވި ބައެއް ބޭފުޅުން ގެންދަވަނީ ކެމްޕޭނުގެ އެކި ޕޯޑިއަމްތަކުގައި ސަރުކާރަށް ފާޑު ވިދާޅުވަމުންނެވެ.
