މިއަހަރުގެ ހޫނުމޫސުމުގެ ޓްރާންސްފަރ "ޑެޑްލައިން ޑޭ"ގައި މެންޗެސްޓަރ ޔުނައިޓެޑުން ހަތަރު ކުޅުންތެރިއެއްގެ ސޮއިހޯދައިފިއެވެ.

ހުކުރު ދުވަހު ޔުނައިޓެޑުން ވަނީ ފެނަބާޗޭގެ ކީޕަރު އަލްޓޭ ބައިންދިރުއާއި ޔުނައިޓެޑުގެ ކުރީގެ ޑިފެންޑަރު ޖޮނީ އިވާންސްއާއި ޓޮޓެންހަމްގެ ސާޖިއޯ ރެގުއިލޮންގެ އިތުރުން ފިއޮރެންޓީނާގެ ސޮފްޔާން އަމްރަބަތުގެ ސޮއި ހޯދާފައެވެ.

ޔުނައިޓެޑުން އަމްރަބަތު ގެނެސްފައިވަނީ ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށެވެ. ލޯނު ފީގެ ގޮތުގައި 8.6 މިލިއަން ޕައުންޑް ދެއްކުމަށް ހަމަޖެހިފައިވާއިރު، އިތުރަށް 17.1 މިލިއަން ޕައުންޑާއި އެޑް-އޮންގެ ގޮތުގައި 4.2 މިލިއަން ޕައުންޑް ދައްކައިގެން، ދާއިމީކޮށް އޭނާ ގެނައުމުގެ ފުރުސަތު ޔުނައިޓެޑަށް ލިބޭނެއެވެ.

އުމުރުން 27 އަހަރުގެ އަމްރަބަތު ވަނީ މިދިޔަ އަހަރު ކުރިޔަށް ދިޔަ ވޯލްޑް ކަޕުގައި މޮޅު ކުޅުމެއް ދައްކާފައެވެ. މޮރޮކޯ މުބާރާތުން ކަޓާފައިވަނީ ސެމީ ފައިނަލުންނެވެ. މިދިޔަ ތިން ސީޒަން އޭނާ ހޭދަކޮށްފައިވަނީ ފިއޮރެންޓީނާއާ އެކުއެވެ. ޔުނައިޓެޑުން އޭނާ ގެންދިޔުމަށް މަސައްކަތްކުރި އިރުން ފެށިގެން، އޭނާ ވަނީ ޔުނައިޓެޑަށް ބަދަލުވާން އެއްބަސްވެފައެވެ. އޭގެ ފަހުން، ގިނަ ޓީމުތަކަކުން އޭނާ ހޯދުމަށް މަސައްކަތް ކުރިނަމަވެސް، އޭނާ ވަނީ ޔުނައިޓެޑު ނޫން ކްލަބަކަށް ބަދަލުނުވާން ނިންމާފައެވެ.

ޔުނައިޓެޑުން ރެގުއިލޮން ވެސް ގެނެސްފައިވަނީ ލޯނު އެއްބަސްވުމެއްގެ ދަށުންނެވެ. އޭނާ ގެނައުމަށް ޔުނައިޓެޑުން ނިންމާފައިވަނީ، ޓީމުގެ ޑިފެންސަށް ދިމާވެފައިވާ ދަތިތަކަށް ވަގުތީ ހައްލެއްގެ ގޮތުގައެވެ. އެއީ، ލެފްޓް ބެކަށް ކުޅޭ ދެ ކުޅުންތެރިން ކަމަށްވާ ލޫކް ޝޯއާއި ޓައިރެލް މަލާސިއާއަށް އަނިޔާވެ، ކުޅުމާ ދުރަށް ދާން ޖެހުމުންނެވެ. ރެގުއިލޮން ވަނީ ޕްރިމިއަރ ލީގުގައި ޖުމްލަ 52 މެޗު ކުޅެފައެވެ.

އިވާންސް ޔުނައިޓެޑާއެކު ސޮއިކޮށްފައިވަނީ އެއް އަހަރު ދުވަހުގެ އެއްބަސްވުމެއްގައެވެ. ޔުނައިޓެޑުން އޭނާ ގެނެސްފައިވަނީ ރަފައެލް ވަރާންއަށް އަނިޔާވެ، ކުޅުމާ ދުރަށް ދާން ޖެހިފައިވާ ދަނޑިވަޅެއްގައެވެ. އޭނާ ވަނީ ކުރިން ޔުނައިޓެޑަށް 198 މެޗު ކުޅެދީ، ތިން ޕްރިމިއަރ ލީގާއި ދެ ލީގު ކަޕު އަދި ޗެމްޕިއަންސް ލީގު ކާމިޔާބުކުރުމަށް އެހީތެރިވެދީފައެވެ.

ކީޕަރު ބައިންދިރު، ޔުނައިޓެޑާއެކު ސޮއިކުރީ ހަތަރު އަހަރު ދުވަހުގެ އެއްބަސްވުމެއްގައެވެ. ޔުނައިޓެޑުން އޭނާ ގެނައީ ދެވަނަ ޗޮއިސް ކީޕަރުގެ ގޮތުގައެވެ. ކުރީގެ ދެވަނަ ޗޮއިސް ކީޕަރު ޑީން ހެންޑަސަން ވަނީ ކްރިސްޓަލް ޕެލެސްއަށް ބަދަލުވެފައެވެ.

މި ހަތަރު ކުޅުންތެރިންގެ އިތުރުން މި ހޫނުމޫސުމުފައި ޔުނައިޓެޑާ ގުޅިފައިވަނީ އަންޑްރޭ އޮނާނާއާއި މޭސަން މައުންޓްގެ އިތުރުން ރަސްމުސް ހޮއިލުންޑެވެ.