އެމްޑީޕީ އުފެދުނީ ރައްޔިތުންނަށް އުފާވެރިކަމާއި އަމާންކަން ހޯދައިދޭން: އަސްލަމް
2 ސެޕްޓެމްބަރު 2023 | ހޮނިހިރު 02:49އެމްޑީޕީން އަބަދުވެސް މަސައްކަތްކުރަމުން ދިޔައީ ރައްޔިތުންނަށް ބޯހިޔާވަހިކަން ހޯދައިދީ ފެނާއި ނަރުދަމާ އަޅާ ޑްރަގުގެ ވަބާއިން ރައްޔިތުން ސަލާމަތްކޮށް ދަތުރުފަތުރުގެ ނިޒާމަކުން ރާއްޖެ ގުޅާލުމަށް
ެރައީސް އިބްރާހީމް މުހައްމަދު ޞާލިހުގެ ރަނިންގ މޭޓް މުހައްމަދު އަސްލަމް | އެމްޑީޕީ
އެމްޑީޕީ އުފެދިގެން އައީ ރާއްޖެއަށް އުފާވެރިކަމާއި އަމާންކަން ހޯދައިދޭންކަމަށާއި މިސަރުކާރުން ކުރަމުންދަނީވެސް އެކަންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންގ މޭޓް މުހައްމަދު އަސްލަމް ވިދާޅުވެއްޖެއެވެ.
އެމްޑީޕީ އާއި ގުޅިފައިވާ ޕާޓީތަކުން ހުކުރު ދުވަހުގެ ރޭ މާލޭގައި ބޭއްވި އުފާވެރި މާލެ ޖަލްސާގައި ވާހަކަދައްކަވަމުން އަސްލަމް ވަނީ އެމްޑީޕީން ވަކިވެގެންދިޔަ ފަރާތްތަކަށް ބަހުގެ ހަމަލާތަކެއް ދެއްވާފައެވެ. އަސްލަމް ވިދާޅުވީ އެމްޑީޕީގެ ފިކުރަކަށް ބަދަލު ނާންނަކަމަށާއި ބަދަލުވެގެން ދުރުވެގެންދިޔައީ ވަންހަނާވެގެންވާ ފިކުރެއްކަމަށެވެ. އެފިކުރަކީ އެމްޑީޕީ ދަންނަ ފިކުރެއް ނޫންކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ އެމްޑީޕީން އަބަދުވެސް މަސައްކަތްކުރަމުން ދިޔައީ ރައްޔިތުންނަށް ބޯހިޔާވަހިކަން ހޯދައިދީ ފެނާއި ނަރުދަމާ އަޅާ ޑްރަގުގެ ވަބާއިން ރައްޔިތުން ސަލާމަތްކޮށް ދަތުރުފަތުރުގެ ނިޒާމަކުން ރާއްޖެ ގުޅާލުމަށްކަމަށެވެ.
އަސްލަމް ވިދާޅުވީ ފެންނަމުންދަނީ އެމްޑީޕީ ފުޅާވަމުންދާތަން ކަމަށާއި ތާއީދު އިތުރުވަމުންދާތަންކަމަށެވެ. އެއީ ރައްޔިތުންގެ ފައިދާއަށް މިސަރުކާރުން ކުރަމުންދާ މަސައްކަތްތަކުގެ ނަތީޖާކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ މިސަރުކާރުން ތިމާވެށި ހިމާޔަތްކުރުމަށްވެސް ގިނަ މަސައްކަތްތަކެއް ކޮށްފައިވާކަމަށެވެ. ކޮންމެ ރަށެއްގައި ކުނި މެނޭޖްކުރުމުގެކަންކަން ވަކި ގޮތަކަށް ރޭވިގެން ކުރިޔަށްދާކަމަށް އަސްލަމް ވިދާޅުވިއެވެ.
މީގެއިތުރުން މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ގެނައުމަށް އެއްވެސް ސަރުކާރަކަށް ކުރަން ނުކުރެނު ގޯތި ކަނޑާފައި މިސަރުކާރުން ހަވާލުކޮށްދީފިކަމަށް އަސްލަމް ވިދާޅުވިއެވެ. އަދި ކުރިޔަށް އޮތްތަނުގައި ގިރާވަރުފަޅާއި ގުޅީފަޅު ތަރައްގީވެގެންދާނީ މާރަނގަޅު ޕްލޭނަކާއެކު ކަމަށާއި އެތަންތަނުން ގޯތި ލިބުނު ފަރާތްތަކުން އެއްގޮތަކަށްވެސް އެކަމާއި ހިތްހަމަނުޖެހުމަށް އަސްލަމް އެދިވަޑައިގެންނެވިއެވެ.
