ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކުރިޔަށް އޮތް ރިޔާސީ އިންތިޚާބުގެ ކެމްޕެއިނަށް ނ އަތޮޅަށް ކުރެއްވި ދަތުރުފުޅުގައި އެމަނިކުފާނުގެ ރިޔާސީ ދައުރު ނިމުމުގެ ކުރިން އެ އަތޮޅުގައި އާރުޓީއެލް ފެރީގެ ޚިދުމަތް ފައްޓަވާނެކަމަށް ވެވަޑައިގެންނެވި ވައުދުފުޅާ އެއްގޮތަށް އެކަންވެގެންދާނެކަމަށާއި އެ މަސައްކަތްކުރައްވަމުން ގެންދަވާކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

ނ. އަތޮޅަށް ވަޑައިގެން ރައީސް ސާލިހު ވަނީ މި އަހަރުތެރޭ އެ އަތޮޅުގައި އާރްޓީއެލް ފެރީގެ ޚިދުމަތް ފައްޓަވާނެ ކަމަށް ވައުދުވެވަޑައިގެންފައެވެ.

ގދ އަތޮޅުގައި އާރުޓީއެލް ޚިދުމަތް ރަސްމީކޮށް ފެށުމަށް ބުދަ ދުވަހު ތިނަދޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އާޒިމް ވިދާޅުވީ ނޮވެމްބަރު 17 ވާ ހުކުރު ދުވަހުގެ ކުރިން ނ އަތޮޅުގައި އޮންނާނީ އާރުޓީއެލް ފެރީ ޚިދުމަތް ފެށިފައިކަމަށެވެ. އަދި 2024 ވަނަ އަހަރު ނިމޭއިރު މުޅި ރާއްޖެ އޮންނާނީ އާރުޓީއެލް ފެރީ ލިންކުން ގުޅާލެވިފައިކަމަށާއި މާތްﷲގެ އިރާދަފުޅުން އެ ރަސްމިއްޔާތު ޝަރަފްވެރިކޮށްދެއްވާނީ ވެސް ރައީސް ޞާލިހުކަމަށެވެ.

އާޒިމް ވިދާޅުވީ މުޅި ރާއްޖެ އާރުޓީއެލް ފެރީ ނިޒާމުން ގުޅާލެވި ނިމޭއިރު 1000 ވަޒީފާ އުފެދިގެންދާނެކަމަށެވެ.

އެމްޓީސީސީން މިހާތަނަށް ހއ، ހދ، ށ އަދި ޅ އަތޮޅު އަދި އައްޑޫ ސިޓީއާއި ފުވައްމުލައް ސިޓީގެ އިތުރުން ހުވަދު އަތޮޅުގައި އާރްޓީއެލް ފެރީގެ ޚިދުމަތް ވަނީ ފަށާފައިވެއެވެ.

މަޝްރޫއުގެ ފުރަތަމަ ފިޔަވަހީގެ ދަށުން ހއ، ހދ، އަދި ށ އަތޮޅުގައި، ދެވަނަ ފިޔަވަހީގެ ދަށުން ހުވަދު އަތޮޅުގައި ޚިދުމަތް ފަށާފައިވާއިރު އައްޑޫ ސިޓީ އަދި ފުވައްމުލައް ސިޓީގައިވެސް ވަނީ ޚިދުމަތް ފަށާފައެވެ. އަދި ނ، ރ، ބ ގައި ޚިދުމަތް ދިނުމަށް ދަނީ މަސައްކަތް ކުރަމުންނެވެ. ތިންވަނަ ފިޔަވަހީގެ ދަށުން ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ.

މި މަޝްރޫއުގެ ދަށުން ޖުމްލަ 187 ރަށް ގުޅާލުމަށް ވަނީ ހަމަޖެހިފައެވެ.