މެމްބަރުން އެނބުރި އެމްޑީޕީއާ ގުޅެނީ ރިޝްވަތު ދީގެނެއް ނޫން، ރައްޔިތުން އެގޮތަށް އެދޭތީ: ރައީސް
ދުރަށްޖެހިވަޑައިގެން ތިއްބެވި މެމްބަރުންނަށް ޕާޓީއަށް އެނބުރި އައުމުގެ ފުރުސަތު އެބައޮތް
ރައީސް މީޑިއާތަކަށް މައުލޫމާތު ދެއްވަނީ
އެމްޑީޕީން ވަކިވުމަށްފަހު އެނބުރި އެ ޕާޓީއާ ގުޅުނު އެއްވެސް މެމްބަރަކާއެކު ރިޝްވަތުގެ މުއާމަލާތެއް ހިންގަވާފައި ނުވާނެ ކަމަށާއި އެ އެމްޑީޕީއާ ގުޅެނީ ރައްޔިތުން އެގޮތަށް އެދޭތީ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ލ. އަތޮޅަށް ކުރެއްވި ދަތުރުފުޅު ނިންމަވާލައްވައި ނޫސްވެރިން ކުރި ސުވާލުތަކަށް ޖަވާބުދެއްވަމުންނެވެ. އެގޮތުން، ރައްޔިތުންގެ މަޖިިލީހުގެ މެމްބަރުންގެ ތެރެއިން ބައެއް މެމްބަރުން އެމްޑީޕީން ވަކިވެވަޑައިގެންނެވުމަށްފަހު އަލުން އެ ޕާޓީއާ ގުޅިވަޑައިގެންނެވީ ރިޝްވަތު ދިނުމުން ކަމަށް ބައެއް ސިޔާސީ ފަރާތްތަކުން ދަނީ ބުނަމުންދާ ކަމަށް ވިދާލުވިއެވެ.
މިވާހަކަތަކާ ގުޅިގެން ރައީސް ވިދާޅުވީ އެމްޑީޕީއާ ގުޅިވަޑައިގަތީ އެ ޕާޓީގައި ކުރިންވެސް އުޅުއްވުމަށްފަހު ސިޔާސީ ޚިޔާލުތަފާތުވުންތަކެއް ހުރުމުން ދުރަށްޖެހިވަޑައިގެންނެވި މެމްބަރުންތަކެއް ކަމަށެވެ. އަދި މިހާރުވެސް އެގޮތަށް ދުރަށްޖެހިވަޑައިގެން ތިއްބެވި މެމްބަރުންނަށް ޕާޓީއަށް އެނބުރި އައުމުގެ ފުރުސަތު އެބައޮތް ކަމަށާއި ކުރިންވެސް ތިއްބެވި ހިސާބުތަކުގައި ޕާޓީގައި ތިއްބެވޭނެ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ މެމްބަރުން އެނބުރި އެމްޑީޕީއާ ގުޅިވަޑައިގެންނެވީ އެ މެމްބަރުން ތަމްސީލުކުރައްވާ ދާއިރާއެއް ނުވަތަ ރަށަކަށް ތަރައްގީ ގެނެވެން އޮތީ އެގޮތަށް ކަންކަން ކުރުމުންކަން ގަބޫލުކުރައްވާތީ ކަމަށެވެ. އަދި އެ ދާއިރާތަކުގެ ރައްޔިތުން ވެސް ބޭނުންވަނީ އެގޮތް ކަމަށާއި އެކަން އެމަނިކުފާނު ކެމްޕޭނުގައި ކުރެއްވި ދަތުރުފުޅުތަކުން ހާމަވާކަމަށް ވެސް ވިދާޅުވިއެވެ.
ރައީސް ވިދާޅުވީ ސިޔާސީ ގޮތުން ހުރި ޚިޔާލުތަފާތުވުންތަކުގެ ސަބަބުން ބައެއް މެމްބަރުން އެމްޑީޕީއާ ވަކިވި ނަމަވެސް ރާއްޖެ ތަރައްގީ ކުރުމުގައި އަމާޒު ހިފާފައިވަނީ އެއް މަންޒިލަކަށް ކަމަށެވެ. އެހެންވެ، މިހާރުވެސް ބައެއް މެމްބަރުން އެނބުރި ޕާޓީއާ ގުޅުމަށް މަޝްވަރާތައް ކުރަމުންދާކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ އެމަނިކުފާނަށް ކެމްޕޭނުގައި މިހާތަނަށް ދެވުނު އަތޮޅުތަކުން ފެނިގެންދަނީ ބޮޑު އިންސައްތައެއް އެމަނިކުފާނާއެކުގައި ތިއްބެވިތަން ކަމަށެވެ. މިވަގުތު ކަނޑައެޅިގެން ވަކި އިންސައްތައެއް ލިބޭނެކަން ވިދާޅުވާން ދަތިކަމަށާއި އައްޑޫ ސިޓީ އާއި މާލެ ސިޓީން ވެސް އެމްޑީޕީއަށް މެޖޯރިޓީ ލިބޭނެ ކަމުގެ ޔަގީންކަން އެބައޮތް ކަމަށް އެމަނިކުފާނު ވިދާޅުވިއެވެ.
