އަމާޒަކީ ލ. ގަމަކީ އަރބަން ސެންޓަރެއްގެ ގޮތުގައި ޑިވަލޮޕްކުރުން - ރައީސް
ގަމަށް ޖުމްލަ 5000 ހައުސިންގ ޔުނިޓުގެ ވައުދު ރައީސް ވެވަޑައިގެންނެވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގަމުގައި ވާހަކަފުޅުދައްކަވަނީ
އަމާޒަކީ ލ. ގަމަކީ އަރބަން ސެންޓަރެއްގެ ގޮތުގައި ތަރައްގީކުރެއްވުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
"އުފާވެރި އަމާންރާއްޖެ" ކެމްޕޭނަށް ލ. ގަމަށް ވަޑައިގެން ބޭއްވެވި ކެމްޕޭން ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އިގްތިސާދު ޑަބަލް ކުރުމަށްޓަކައި ކުރަންޖެހޭ މަސައްކަތް ކުރައްވަމުން ގެންދަވާ ކަމަށެވެ. އެގޮތުން އިގްތިސާދުގެ އެކި ހިސާބުގައި އެކި ކަންތަކުގައި ރައްޔިތުން ވީހާވެސް ބޮޑަކަށް ބައިވެރިވެވޭގޮތަށް ބައްޓަން ކުރުން އެއީ އެންމެ މުހިންމު އެއް ކަންތައް ކަމަށެވެ. ހާއްސަކޮށް ރާއްޖޭގައި މި ހުރި ކަންތައްތައް އެންމެ ރަނގަޅަށް ބޭނުންކުރެވޭނެ ގޮތަކަށް ސިޔާސަތު ބައްޓަންކުރަންޖެހޭ ކަމަށާއި، ލ. އަތޮޅަކީ ވަރަށް ބޭނުންތެރި ފައިދާހުރި މަސައްކަތްތަކެއް ކުރެވޭނެ ރަށެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ މި ހިނގާ 5 އަހަރު ދުވަހުގެ ތެރޭގައި އަމާޒަކަށްވީ އެ ސަރަހައްދު ތަފާތުކޮށް ތަރައްގީކުރެއްވުން ކަމަށެވެ.
ރައީސް ވިދާޅުވީ އަމާޒަކީ ގަމަކީ އަރބަން ސެންޓަރެއްގެ ގޮތުގައި ޑިވަލޮޕްކުރެއްވުން ކަމަށެވެ. އެގޮތުން ބޭނުންވާ ވަސީލަތްތައް ޑިވަލޮޕްކުރައްވާ، އަމާޒަކީ ކުރިއަށް އޮތް 10 އަހަރު ދުވަހުގެ ތެރޭގައި 25،000 މީހުންގެ އާބާދީއަކަށް އެތަން ބަދަލުކުރެއްވުން ކަމަށެވެ. ރައީސް ވިދާޅުވީ އެކަން ކުރެއްވުމަށް ހައުސިންގއާއި ސިއްހީ ހިދުމަތާއި ތައުލީމާއި ދަތުރުފަތުރުގެ ނިޒާމަށް ބަދަލު ގެނައުން ޕްލެންގައި އެބައޮތް ކަމަށެވެ.
ރައީސް ވިދާޅުވީ ބޯހިޔާވަހިކަމުގެ ފުރަތަމަ ފޭސްގައި އަންނަ އަހަރުގެ އަމާޒަކީ ގަމުގައި 1000 ހައުސިން ޔުނިޓް އަޅައިދެއްވުން ކަމަށެވެ. އަދި މުޅި އަމާޒަކީ 5000 ހައުސިންގ ޔުނިޓް އަޅައިދެއްވުން ކަމަށާއި، އެއީ ގަމުގެ ރައްޔިތުންނަށާއި، ގަމަށް އަންނަން ބޭނުންވާ ހުރިހާ އެންމެންނަށް ބައިވެރިވެވޭގޮތަށް ހުޅުވާލާ ސްކީމެއް ކަމަށް ރައީސް ވިދާޅުވިއެވެ.
އަދި ޓަރޝަރީ ހޮސްޕިޓަލުގެ މަސައްކަތް ވަނީ ޓެންޑަރކޮށް ބަޔަކާ ހަވާލުކޮށް އަމަލީ މަސައްކަތް ފަށާ ހިސާބުގައި ކަމަށް ރައީސް ވިދާޅުވިއެވެ. އަދި އެއާއެކު ޔަގީންކަން އަރުވަނީ ޕްލޭނުގައި އޮތްގޮތަކަށް ކެންސަރު ހޮސްޕިޓަލް އެޅިގެންދާނެ ކަމަށާއި، އެ ޕްލޭނަކަށް ބަދަލެއް ނުގެންނަވާނެކަމަށް ރައީސް ވިދާޅުވިއެވެ. ރައީސް ވިދާޅުވީ އެ މަސައްކަތް އޮތީ ރި-ޓެންޑަރިންގ މަރުހަލާގައި ކަމަށާއި، އެއާ އެކީގައި ޓެންޑަރިންނަށް ދުވަސްކޮޅެއްގެ ތެރޭގައި ދާނެ ކަމަށެވެ.
