100 ކިލޯ ޑްރަގް ކޭސް: ދިފާއީ ހެއްކާއި ޝަރީއަތުގެ ކުރީގެ ހުށައެޅުންތަކަށް ފުރުސަތެއް ދެއްވައިފި

100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ދައުވާތަކުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި، ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވަނީ ހދ. ކުމުންދޫ، ޑިއާފުރެންޑް، އިބްރާހީމް ސިނާން، ގއ. ކޮލަމާފުށި، ސޯސަންގެ، އިބްރާހީމް ޒާއިދު ހަބީބު، ކ. މާފުށި، ސްވީޓްމީޑް، އަހުމަދު މާހިރު، ނ. ވެލިދޫ، ބީޗްހެވެން، ޖުމާން މުސްތަފާ، ލ. ކަލައިދޫ، ޖަނަވަރީމާގެ، މުހައްމަދު އަހްމަދު، ދ. ބަނޑިދޫ، ޕޮލާރިސް، މުހައްމަދު ހުސައިންގެ އިތުރުން، ބިދޭސީ ދެ ރައްޔިތުން ކަމަށްވާ ބަންގްލަދޭޝްގެ ޑީއެމް މޮބިންއާއި، އެމްޑީ ރަފީގުލް އިސްލާމްގެ މައްޗަށެވެ.

މި މައްސަލަ ކުރިން ބައްލަވަމުން ގެންދެވީ ކްރިމިނަލް ކޯޓުގެ ގާޒީ ދީބާނާޒް ފަހުމީއެވެ. ނަމަވެސް މިހާރު މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.

ގާޒީ ވަނީ މައްސަލަ ގޮސްފައިވާ ހިސާބު ސާފު ކުރައްވާފައެވެ.

ދައުލަތުގެ ވަކީލު ވިދާޅުވީ، މި މައްސަލައިގެ ދައުވާތަކާއި ގުޅިގެން ހެކި ހުށައެޅުމުގެ ފުރުސަތު ދިފާއަށް ދެވިފައިވާ ކަމަށާއި، ޝަރީއަތުގެ ކުރީގެ ހުށައެޅުންތައް ހުށައެޅުމުގެ ފުރުސަތުވެސް ދެވިފައިވާ ކަމަށެވެ. އެގޮތުން ޖުމާން މުސްތަފާގެ ފަރާތުން ހުށައެޅުން ހުށައަޅައި، ދައުލަތުން އެކަމުގެ ރައްދުވެސް ކޯޓަށް ހުށައަޅާފައިވާކަމަށް ދައުލަތުގެ ވަކީލު ވިދާޅުވިއެވެ.

ދެން ތިއްބެވި ދިފާއީ ވަކީލުން ވިދާޅުވީ، ޝަރީއަތުގެ ކުރީގެ ހުށައެޅުންތައް ހުށައެޅިފައިނުވަނީ ބައެއް ލިއެކިއުންތައް ލިބިފައިނުވާތީ ކަމަށާއި، އެ ލިއުންތައް ހޯދުމަށް ދިފާއުން އެދިފައިވާނެ ކަަމަށެވެ. މިހާރު އެ ލިއުންތައް ލިބިފައިވާކަމަށް ދިފާއީ ވަކީލުން ފާހަގަ ކުރެއްވިއެވެ.

ގާޒީ ވިދާޅުވީ، މި މައްސަލަ ކުރިއަށް ގެންދަވާނީ މައްސަލަ ނިމިފައިވާ ހިސާބުން ކަމަށެވެ.

ގާޒީ ވަނީ ދިފާއީ ހެކި ހުށައެޅުމާއި، ޝަރީއަތުގެ ކުރީގެ ހުށައެޅުންތަކަށް 10 ދުވަހުގެ ފުރުސަތެއް ދެއްވާފައެވެ. އެގޮތުން 12 ސެޕްޓެމްބަރުގެ އޮފީސް ބަންދުވުމުގެ ކުރިން ކުރިން ދިފާއީ ހެކި ހުށައެޅުމަށް ގާޒީ ވަނީ ދަންނަވާފައެވެ.

މި މައްސަލައިގައި އުފުލާފައިވާ ޑައިމޯފިން ޓްރެފިކް ކުރުމުގެ ކުށުގެ ދައުވާ ސާބިތުވެއްޖެނަމަ އުމުރަށް ޖަލަށް ލުމާއެކު 1 ލައްކަ ރުފިޔާއާ 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

މީގެ އިތުރުން، އެ ދައުވާ ސާބިތުނުވެ، މި ކުށުގެ އަމަލުގައި އެއްވެސް މިންވަރަކަށް ބައިވެރިވިކަން ނުވަތަ ކުށް ކުރަން އުޅުނުކަން ސާބިތުވެއްޖެނަމަ 18 އަހަރަށް ޖަލަށް ލުމާއެކު، 75،000 ރުފިޔާއާއި، 7،500،000 ރުފިޔާއާ ދެމެދުގެ ޖޫރިމަނާއެއް އަންނާނެއެވެ.