ފުލުހުންގެ ބެލުމުގެ ދަށަށް ގެންގޮސްފައިވާ 60ށް ވުރެ ގިނަ ވެހިކަލް ކުރިއަށް އޮތް 60 ދުވަހުގެ ތެރޭގައި ގެންދިއުމަށް އަންގައިފި
28 އޯގަސްޓު 2023 | ހޯމަ 03:25މީގެ ތެރޭގައި ހިމެނެނީ 48 މޮޓޯ ސައިކަލް، 6 ކާރު، 2 ވޭން، 3 ޕިކަޕް، އެއް ބައިސްކަލް އަދި އެއް އިލެކްޓްރިކް ބައިސްކަލް
މީގެ ކުރިން ފުލުހުން ޓޯވް ކޮށްފައިވާ ވެހިކަލްތަކެއް
ފުލުހުންގެ ބެލުމުގެ ދަށަށް ގެންގޮސްފައިވާ 60ށް ވުރެ ގިނަ ވެހިކަލް ކުރިއަށް އޮތް 60 ދުވަހުގެ ތެރޭގައި ގެންދިއުމަށް ފުލުހުންގެ ޚިދުމަތުން އަންގައިފިއެވެ.
އާދިއްތަ ދުވަހު ފުލުހުން ވަނީ އެ ޚިދުމަތުގެ ބެލުމުގެ ދަށުގައި 61 ވެހިކަލް ނެގުނުތަނާއެކު ތަފްސީލީ ލިސްޓެއް އާއްމުކޮށްފައެވެ. 61 ވެހިކަލް ފުލުހުންގެ ބެލުމުގެ ދަށުގައި ހުރިއިރު މީގެ ތެރޭގައި ގަވާއިދާ ހިލާފަށް ޕާކު ކުރުމުގެ ސަބަބުން ގިނަ އަދަދެއްގެ ވެހިކަލް ނަގާފައިވެއެވެ.
ފުލުހުން ބުނީ އުޅަނދުތައް އޭގެ ވެރިފަރާތުން އާދިއްތަ ދުވަހުން ފެށިގެން 60 ދުވަހުގެ ތެރޭގައި ގެންދަން ޖެހޭ ކަމަށެވެ. މި މުއްދަތުގައި ނުގެންގޮސް ހުންނަ އުޅަނދުތައް ގާނޫނު ނަންބަރު 5/2009 އެއްގަމު ދަތުރުފަތުރުގެ ގާނޫނަށް 4 ވަނަ އިސްލާހު ގެނައުމުގެ ގާނޫނުގެ 68-1 ވަނަ މާއްދަގެ ދަށުން ހަމަޖެހިފައިވާ އުސޫލުގެމަތިން ނައްތާލުމުގެ މަސައްކަތް ފުލުހުން ކުރާނެ ކަމަށެވެ.
މީގެ ތެރޭގައި ހިމެނެނީ 48 މޮޓޯ ސައިކަލް، 6 ކާރު، 2 ވޭން، 3 ޕިކަޕް، އެއް ބައިސްކަލް އަދި އެއް އިލެކްޓްރިކް ބައިސްކަލް އެވެ.
މި ވެހިކަލްތައް ނަގާފައިވަނީ މާލެސިޓީ، އައްޑޫ ސިޓީ، ލ.ގަން އަދި ގދ.ތިނަދޫއިންނެވެ. އެންމެ ގިނަ ވެހިކަލް ނަގާފައިވަނީ މާލެސިޓީންނެވެ.
