މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ މޯލްޑިވްސް އިންސްޓަންޓް ޕޭމަންޓް ސިސްޓަމް 'ފަވަރަ' ގެ ދެވަނަ ފިޔަވަހީގެ ދަށުން އެޕްލިކޭޝަނެއް ތައާރަފު ކުރާނެ ކަމަށާއި އެއާއެކު އިތުރު ލުއިތަކެއް ލިބިގެންދާނެ ކަމަށް އެ އިދާރާއިން ބުނެފިއެވެ.

އާދީއްތަ ދުވަހު އެމްއެމްއޭގައި ބޭއްވި ނޫސްވެރިންގެ ބައްދަލުވުމެއްގައި އެ އިދާރާގެ އެގްޒެކެޓިވް ޑިރެކްޓަރ، ޕޭމެންޓް ސިސްޓަމްސް އެންޑް އޮވަސައިޓް ޑިވިޝަން، ހައްވާ ލަތީފު ވިދާޅުވީ ފަވަރައަކީ ޕޭމަންޓް ނިޒާމަށް ގެންނަ ބަދަލުގެ ދަށުން ގާއިމު ކުރެވޭ އިންފްރާސްޓްރަކްޗަރެއް ކަމަށެވެ. އެގޮތުން، މި މަސައްކަތުގެ ފުރަތަމަ ފިޔަވަހީގެ މަސައްކަތް އަދިވެސް ކުރިއަށްދާ ކަމަށާއި މަސައްކަތް އެއްކޮށް ނިމޭއިރު އޯޕަން ބޭންކިންގެ ޚިދުމަތް ލިބޭނެ ކަމަށް އޭނާ ވިދާޅުވިއެވެ. މި މަސައްކަތް ނިމުމުން އެކި ބޭންކުތަކުގައި އެކައުންޓު ހުރި ނަމަވެސް އެއް ބޭންކު މޯބައިލް އެޕްލިކޭޝަން މެދުވެރިކޮށް ހުރިހާ އެކައުންޓެއް މެނޭޖުކުރެވޭނެ ކަމަށް ހައްވަ ވިދާޅުވިއެވެ.

ހައްވަ ވިދާޅުވީ މި ޕޭމަންޓް ސިސްޓަމްގެ ދެވަނަ ފިޔަވަހީގެ ދަށުން "ފަވަރަ" ޕޯޓަލަށް ހާއްސަ މޯބައިލް އެޕްލިކޭޝަނެއް ތައާރަފު ކުރާނެ ކަމަށެވެ. މި އެޕްލިކޭޝަން މެދުވެރިކޮށް ފަވަރައިން މިހާރު ލިބޭ ހުރިހާ ޚިދުމަތެއް ލިބޭއިރު އިތުރު އެހެން ޚިދުމަތްތައް ވެސް ލިބިގެންދާނެ ކަމަށް އޭނާ ވިދާޅުވިއެވެ. އެގޮތުން، ކިޔުއާރު ކޯޑު ބޭނުންކޮށްގެން ޓްރާންސެކްޝަންތައް ހެދޭނެ އިންތިޒާމު އެ އެޕްލިކޭޝަން މެދުވެރިކޮށް ހެދޭނެ ކަމަށާއި އީ- ވޮލެޓް ބޭނުންކޮށްގެން ބޭންކެއްގައި އެކައުންޓު ނެތް ފަރާތްތަކަށް ވެސް ފައިސާގެ މުއާމަލާތް ކުރެވޭނެ ކަމަށް ވިދާޅުވިއެވެ. ރާއްޖޭގައި މިވަގުތު ފައިސާގެ މުއާމަލާތް ކުރުމުގައި އީ ވޮލެޓު ބޭނުން ކުރަނީ އުރީދޫ އާއި ދިރާގުންނެވެ.

ފަވަރައާއެކު އެޕްލިކޭޝަނެއް ތައާރަފު ކުރުމަށް ނިންމީ މިފަދަ ޚިދުމަތް ދިނުމަށް މާލީ އިދާރާތަކުން ބޮޑެތި އިންވެސްޓްމަންޓުތައް ކުރަން ޖެހޭއިރު އެ ފަރާތްތަކަށް ދެވޭ ސޮލިއުޝަނެއްގެ ގޮތުގައި ކަމަށް ވެސް ހައްވަ ވިދާޅުވިއެވެ.

ފަވަރައިގެ ފުރަތަމަ ފިޔަވަހީގެ ދަށުން މިހާރު އެއް ބޭންކުން އަނެއް ބޭންކަށް ފޮނުވާ ފައިސާ ވަގުތުން ޖަމާވުމުގެ ޚިދުމަތް ލިބިގެންދާނެއެވެ. އަދި ފަވަރަ އައިޑީއެއް ހަދައި، ފޯނު ނަންބަރު ނުވަތަ އީމެއިލް އެޑްރެސް ބޭނުންކޮށްގެން، އެކައުންޓު ނަންބަރު ހިއްސާ ކުރުމަކާ ނުލައި ފައިސާގެ މުއާމަލާތް ކުރުމާއި ރިކުއެސްޓެއް ފޮނުވާލައިގެން ފައިސާ ޖަމާކުރުމާއި އޮޅިގެން ހެއްދޭ ޓްރާންސެކްޝަންތައް ރިކޯލް ކުރުމުގެ ޚިދުމަތް ވެސް ލިބިގެންދާނެއެވެ.

އެމްއެމްއޭއިން މިހާރު މި ޚިދުމަތް ދެމުން އަންނަނީ ރާއްޖޭގައި ހަރަކާތްތެރިވާ ބޭންކުތަކުގެ އިންޓަރނެޓް އަދި މޯބައިލް ބޭންކިންގ އެޕްލިކޭޝަންތައް މެދުވެރިކޮށެވެ. މި ސިސްޓަމްގައި މިހާތަނަށް ބީއެމްއެލް އާއި އެމްއައިބީ އަދި އެސްބީއައި ގުޅިފައިވާއިރު އަހަރު ނިމުމުގެ ކުރިން ހުރިހާ ބޭންކެއް މި ޚިދުމަތާ ގުޅުވުމަށް މަސައްކަތް ކުރަމުން އަންނަ ކަމަށް އެމްއެމްއޭއިން ބުނެއެވެ.