އަދާލަތު ޕާޓީގެ ތާއީދު ޕީއެންސީގެ ކެންޑިޑޭޓު ޑރ މުޙައްމަދު މުއިއްޒަށް އޮތްކަން ދައްކަން އަދާލަތު ޕާޓީގެ ކުލަ ބޭނުންކޮށްގެން ސްކޭމް ހިންގަމުންދާކަމަށް އެ ޕާޓީން ބުނެފިއެވެ.
އާދިއްތަ ދުވަހު އެ ޕާޓީން ބުނީ، ޑރ މުއިއްޒުގެ ކެމްޕޭނުގައި އަދާލަތު ޕާޓީގެ ގިނަ އަދަދެއްގެ މެންބަރުން ބައިވެރިވިކަމަށް ބުނެ ބައެއް މީޑިޔާތަކުން ޚަބަރު ފަތުރަމުންދާ ކަމަށެވެ.
އެހެންނަމަވެސް ހަގީގަތުގައި މިއީ ޑރ މުއިއްޒަށް ތާއީދުނެތި އުފެދޭ މާޔޫސްކަމުގައި ޕީއެންސީގެ ފަރާތުން ކުރާ "ޑެސްޕަރޭޓް ކެމްޕޭނެއް" ގެ ގޮތުގައި އަދާލަތު ޕާޓީން ވަނީ ސިފަކޮށްފައެވެ.
އެ ޕާޓީން ބުނާ ގޮތުގައި މިއީ އަދާލަތު ޕާޓީގެ ތާއީދު މުއިއްޒަށް އޮތްކަން ދައްކަން އަދާލަތު ޕާޓީގެ ކުލަ ބޭނުންކޮށްގެން ހިންގާ ސްކޭމްއެކެވެ.
އަދި މި ދަށުދަރަޖައިގެ އަމަލުގައި ޑރ މުއިއްޒާ ބައިވެރިވިކަމަށް ބުނާ 13 މީހުންގެ ތެރެއިން 9 މީހުންނަކީ އަދާލަތު ޕާޓީގެ މެންބަރުންނެއް ވެސް ނޫންކަން ބަޔާންކޮށް އަދާލަތު ޕާޓީން ވަނީ އެ މީހުންގެ ތަފްސީލު ވެސް ހިއްސާކޮށްފައެވެ.
އެކަމާއި ގުޅޭގޮތުން އަދާލަތު ޕާޓީގެ ތަރުޖަމާނު އަދި ހޯމް މިނިސްޓްރީގެ ސްޓޭޓް މިނިސްޓަރު ޢަލީ ނަޒީރު ވިދާޅުވީ ޕީއެންސީގެ ކެންޑިޑޭޓް ޑރ މުއިއްޒުގެ ކެމްޕޭނުގައި ޢަދާލަތު ޕާޓީގެ ކުލަ ބޭނުންކުރާކަން ފާހަގަކުރެވިފައިވާ ކަމަށެވެ. އެކަން ހަރުކަށި އިބާރާތުން ކުށްވެރިކުރައްވާ އޭނާ ވިދާޅުވީ މިކަމަކީ އިންތިޚާބާ ބެހޭ އާންމު ޤާނޫނުގެ ދަށުން މަނާކަމެއްކަމަށެވެ.
އަދާލަތުން ވަނީ ކުރިއަށް އޮތް ރިޔާސީ އިންތިޚާބަށް އެމްޑީޕީ އާއެކު ކޯލިޝަން ހަދާފައެވެ.
