އިޓާލިއަން ލީގުގައި ކުޅުނު ދެ ވަނަ މެޗުން ވެސް މޮޅުވެ، އޭސީ މިލާން އެއް ވަނަ އަށް ޖެހިލައިފި އެވެ.

ހޮނިހިރު ދުވަހުގެ ރޭ މިލާންގެ އަމިއްލަ ދަނޑުގައި ޓޮރިނޯއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގައި މިލާންގެ ފުރަތަމަ ލަނޑު ޖަހައި އެ ޓީމަށް ލީޑު ނަގައިދިނީ 33 ވަނަ މިނެޓުގައި ކްރިސްޓިއަން ޕުލިސިޗް އެވެ. ފުރަތަމަ ހާފު ނިމުމުގެ ކުރިން މިލާނުން ވަނީ އިތުރު ދެ ލަނޑު ޖަހައި، މެޗުގެ ފުރިހަމަ ކޮންޓްރޯލް ހޯދައިފަ އެވެ. ފުރަތަމަ ހާފުގެ 43 ވަނަ މިނެޓުގައި މިލާންގެ ދެ ވަނަ ލަނޑު އޮލީވިއޭ ޖިރޫޑް ޖެހީ އެ ޓީމަށް ލިބުނު ޕެނަލްޓީ އަކުންނެވެ. ފުރަތަމަ ހާފުގެ އިތުރު ވަގުތުގައި މިލާންގެ ތިން ވަނަ ލަނޑު ޖެހީ ތިއޯ ހެނާންޑޭޒް އެވެ. ޓޮރިނޯގެ ހަމައެކަނި ލަނޑު ޖެހީ ޝޫސް އެވެ. މިލާންގެ ފަހު ލަނޑު ވެސް ޖިރޫޑް ޖެހީ ޕެނަލްޓީ އަކުންނެވެ. އެއީ މެޗުގެ 65 ވަނަ މިނެޓުގަ އެވެ.

މޮޅާއެކު މިލާން އެއް ވަނައިގައި އޮތީ ދެ މެޗުން ހަ ޕޮއިންޓު ހޯދައިގެންނެވެ. ދެ ވަނައިގައި އޮތް ވެރޯނާ އަށް ވެސް ލިބެނީ ހަމަ އެ އަދަދަށް ޕޮއިންޓެވެ. ވެރޯނާ ވަނީ އަމިއްލަ ދަނޑުގައި ކުޅުނު ދެ ވަނަ މެޗުގައި ރޯމާ ބަލިކޮށްފަ އެވެ. މިލާން ކުރި ހޯދަނީ ފައިދާ ލަނޑުންނެވެ. ލީގުގައި ދެން މިލާނަށް އޮންނާނީ ރަށުން ބޭރުގައި ރޯމާއާ ދެކޮޅަށް ކުޅޭ މެޗެވެ.