ފަހަތުން އަރައި ޔުނައިޓެޑުން ފޮރެސްޓު ބަލިކޮށްފި

އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު މޮޅުވެއްޖެ އެވެ.

ހޮނިހިރު ދުވަހުރޭ ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ ފަހަތުން އަރައި 3-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ފޮރެސްޓުންނެވެ.

މެޗު ފަށައިގެން ފުރަތަމަ ހަތަރު މިނެޓުގެ ތެރޭގައި ފޮރެސްޓުން ވަނީ ދެ ލަނޑު ޖަަހައި، ޔުނައިޓެޑު ޕްރެޝަރަށް ވައްޓާލައިފަ އެވެ. މެޗު ފަށައިގެން ދެ ވަނަ މިނެޓުގައި ފޮރެސްޓުގެ އަވޯނިޔީ ވަނީ ލަނޑު ޖަހައި އެ ޓީމަށް ލީޑު ނަގައިދީފަ އެވެ. އެއީ އެއީ މެދު ހާފާ ހަމައިން ޔުނައިޓެޑުގެ ކުޅުންތެރިންނަށް ހެދުނު ގޯހެއްގައި ލިބުނު ބޯޅަ ހިފައިގެން ގޮސް، ގޯލަށް ވައްދާލައިގެންނެވެ. އޭގެ ދެ މިނެޓު ފަހުން ފޮރެސްޓުން ދެ ވަނަ ލަނޑު ޖަހައި ލީޑު ފުޅާ ކުރީ ހިލޭ ޖެހުމެއްގަ އެވެ. ހިލޭ ޖެހުމުގައި މޯގަން ގިބްސް ހުރަސްކޮށްދިން ބޯޅަ ބޮލުން ގޯލަށް ވައްދާލީ ބޮލީ އެވެ. ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ ލަނޑެއް ޖަހައި ފަރަގު ކުޑަކޮށްފަ އެވެ. އެއީ ފޮރެސްޓުގެ އޭރިޔާ ތެރެއިން މާކަސް ރަޝްފޯޑު ހުރަސްކުރި ބޯޅަ އެއް ގޯލަށް ވައްދާލައިގެން 17 ވަނަ މިނެޓުގައި ކްރިސްޓިއަން އެރިކްސަން ޖެހި ލަނޑުންނެވެ.

ދެ ވަނަ ހާފު ފަށައިގެން ހަތް ވަނަ މިނެޓުގައި ޔުނައިޓެޑުން ވަނީ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ގޯލު ކުރިމަތިން ކެޕްޓަން ބްރޫނޯ ފެނާންޑޭސް ބޮލުން ޖައްސާލި ބޯޅަ ގޯލަށް ވައްދާލައިގެން ޔުނައިޓެޑަށް ނަތީޖާ ހަމަހަމަ ކޮށްދިނީ ކަސެމީރޯ އެވެ. މެޗުން ޔުނައިޓެޑު މޮޅު ކޮށްދިން ލަނޑު 76 ވަނަ މިނެޓުގައި ޖެހީ ކެޕްޓަން ބްރޫނޯ އެވެ. އެއީ ފޮރެސްޓުގެ އެރިޔާ ތެރެއިން ރަޝްފޯޑަށް ކުރި ފައުލަކަށް ރެފްރީ ދިން ޕެނަލްޓީ އަކުންނެވެ.

މިއީ މި ސީޒަންގެ ލީގުގައި ޔުނައިޓެޑުން ކުޅުނު ތިން ވަނަ މެެޗެވެ. ދެ މެޗުން އެ ޓީމު މޮޅުވިއިރު، އެއް މެޗުން ވަނީ ބަލިވެފަ އެވެ. ތިން މެޗުން ހަ ޕޮއިންޓު ހޯދައިގެން ޔުނައިޓެޑު އޮތީ ލީގު ތާވަލްގެ ހަ ވަނައިގަ އެވެ. ލީގުގަައި ދެން އެ ޓީމަށް އޮންނާނީ ރަށުން ބޭރުގައި އާސެނަލާ ދެކޮޅަށް ކުޅޭ މެޗެވެ.