އައިއޯއައިޖީ ފެށުމުގެ ރަސްމިއްޔާތުގައި ގިނަ އަދަދެއްގެ އާންމު ރައްޔިތުން މަރުވުމާ ގުޅިގެން ރައީސް ތައުޒިޔާ ވިދާޅުވެއްޖެ
26 އޯގަސްޓު 2023 | ހޮނިހިރު 14:36މިއީ ހިތާމެރި ވަގުތެއް
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
މަޑަގަސްކަރާގައި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ފެށުމުގެ ރަސްމިއްޔާތަށް ސްޓޭޑިއަމަށް ވަންނަން އުޅުމުގެ ތެރޭގައި ގިނަ އަދަދެއްގެ އާންމު ރައްޔިތުން މަރުވުމާ ގުޅިގެން، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ތައުޒިޔާ ވިދާޅުވެއްޖެއެވެ.
ނުރައްކާތެރި ހާދިސާއެއްގެ ގޮތުގައި ސިފަކުރައްވައި ރައީސް ވިދާޅުވީ މިއީ ހިތާމެރި ވަގުތެއް ކަމަށެވެ. އަދި މަޑަގަސްކަރާގެ ރައީސްގެ އިތުރުން ގެއްލުން ލިބުނު އާއިލާތަކަށް ތައުޒިޔާ ފޮނުއްވާކަމަށެވެ.
ރައީސް ސާލިހު ވިދާޅުވީ މިދަތި އުދަނގޫ ވަގުތު ދިވެހިރާއްޖެއިން އަބަދުވެސް ވަނީ މަޑަގަސްކަރައާއެކު ކަމަށެވެ.
މަޑަގަސްކަރާގައި ހުކުރު ދުވަހުގެރޭ ފެށި އިންޑިއަން އޯޝަން އައިލެންޑް ގޭމްސް ފެށުމުގެ ރަސްމިއްޔާތަށް، ސްޓޭޑިއަމަށް ވަންނަން އުޅުމުގެ ތެރޭގައި 12 މީހުން މަރުވެ، 80 މީހުން ޒަޚަމްވެފައިވާ ކަމަށް ރިޕޯޓުތަކުން ބުނެއެވެ.
މި ހާދިސާގައި ދިވެހި ކޮންޓިންޖެންޓުން ސަލާމަތުން ތިބި ކަމަށާއި، ހާލު ރަނގަޅުކަމަށް މޯލްޑިވްސް އޮލިމްޕިކްސް ކޮމިޓީގެ ޓީމުން ވަނީ ކަށަވަރުކޮށްދީފައެވެ. މަޑަގަސްކަރައިގެ މަހާމަސީނާ މުނިސިޕަލް ސްޓޭޑިއަމްގައި ހުކުރު ދުވަހުގެ ރޭ ބޭއްވި ހުޅުވުމުގެ ރަސްމިއްޔާތު ބެލުމަށް 50،000ށްވުރެ ގިނަ މީހުން ހާޒިރުވެފައިވެއެވެ.
މަޑަގަސްކަރައިގެ ބޮޑުވަޒީރު ކްރިސްޓިއަން އެންޓްސޭ ނޫސްވެރިންނަށް މައުލޫމާތު ދެއްވަމުން، އެންޓަނާނާރިވޯގެ ހޮސްޕިޓަލަކަށް ހަވާލާދެއްވައި ވިދާޅުވީ، ވަގުތީ އަދަދުން ފެންނަނީ 12 މީހުން މަރުވެ 80 ވަރަކަށް މީހުން ޒަޚަމްވެފައި ވާކަމަށެވެ.
