އަމާޒަކީ ބޭރުންނާއި އެތެރެއިން ދިމާވެދާނެ ކޮންމެ ނުރައްކަލަކަށް ތައްޔާރުވެ ދިފާއުވުން: ޝަމާލް
މި ޕްރޮޖެކްޓަކީ ސަރުކާރު ބަޖެޓުން 35 މިލިއަން ރުފިޔާ ޚަރަދުކޮށްގެން ހިންގާ ޕްރޮޖެކްޓެއް
އެމްއެންޑީއެފް ނޮދަން އޭރިއާ ކޮމާންޑްގެ އައު ހެޑްކުއޯޓަރޒްގެ ބިންގާ އެޅުން
ޤައުމީ ދިފާޢީ ބާރުގެ އެންމެ މުހިންމު އަދި އެންމެ އަސާސީ މަޤްޞަދަކީ ބޭރުންނާއި އެތެރެއިން ދިމާވެދާނެ ކޮންމެ ނުރައްކަލަކަށް ތައްޔާރުވެ ދިފާއުވުންކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
އެމްއެންޑީއެފް ނޮދަން އޭރިއާ ކޮމާންޑްގެ އައު ހެޑްކުއާޓަރސް ގެ ބިންގާ އެޅުމުގެ ރަސްމިއްޔާތުގައި ޗީފް އޮފް ޑިފެންސް ފޯސް، ލެފްޓިނެންޓް ޖެނެރަލް ޢަބްދުﷲ ޝަމާލް ވަނީ އެމްއެންޑީއެފް ނޮދަން އޭރިއާ ކޮމާންޑް އޮތް ސަރަހައްދުގެ މުހިންމުކަމާ ގުޅޭގޮތުން އަލިއަޅުއްވާލައްވައި ވާހަކަފުޅު ދައްކަވާފައެވެ.
ޗީފް އޮފް ޑިފެންސް ފޯސްގެ ވާހަކަފުޅުގައި، ދިވެހިރާއްޖޭގެ އެންމެ އުތުރުން ފެށިގެން ފާދިއްޕޮޅާ ހަމައަށް އޮންނަ ސަރަޙައްދުގައި ޤާއިމުކުރެވިފައިވާ އެމްއެންޑީއެފް ނޮދަން އޭރިއާ ކޮމާންޑަކީ، އެމްއެންޑީއެފްގެ ހަތަރު އޭރިއާ ކޮމާންޑުގެ ތެރެއިން ވެސް އެންމެ ސަރަޙައްދު ބޮޑު، ރަށްތައް ގިނަ، އަދި އެ ސަރަޙައްދެއްގެ ތެރެއިން ނިސްބަތުން ގިނަ އިންޓަރނޭޝަނަލް ކާގޯ ޓްރާންސްފަރތައް ހިނގާ ސަރަޙައްދެއް ކަމުގައި ފާހަގަކުރެއްވިއެވެ.
އަދި، އެމްއެންޑީއެފް ނޮދަން އޭރިއާ ކޮމާންޑްގައި "ފުލްފްލެޖްޑް" ހެޑްކްއޯޓަރޒްއެއްގެ ބިންގާ އެޅުމަށް ބޭއްވޭ އެ ރަސްމިއްޔާތަކީ ސިފައިންނަށް ވަރަށް ޚާއްޞަ، ވަރަށް ތާރީޚީ އަދި އެހާމެ އުފާވެރި ރަސްމިއްޔާތެއް ކަމުގައި ވިދާޅުވިއެވެ.
ރަސްމިއްޔާތުގައި ވާހަކަފުޅު ދައްކަވަމުން ޗީފް އޮފް ޑިފެންސް ފޯސް އިތުރަށް ވިދާޅުވީ، ދިވެހިރާއްޖޭގެ ޤައުމީ ދިފާޢީ ބާރުގެ އެންމެ މުހިންމު އަދި އެންމެ އަސާސީ މަޤްޞަދަކީ ބޭރުންނާއި އެތެރެއިން ދިމާވެދާނެ ކޮންމެ ނުރައްކަލަކުން ދިވެހި ދައުލަތާއި ރައްޔިތުން ޙިމާޔަތްކުރުމަށް އަސްކަރީ ބާރު ބޭނުން ކުރަން ޖެހިއްޖެ ޙާލަތެއްގައި އެ ބާރު ބޭނުންކުރުން ކަމަށެވެ.
އަދި އެކަމަށް ތައްޔާރުވެ ތިބުމަށްޓަކައި ހޯދަންޖެހޭ އާލާތްތަކާއި ވަސީލަތްތައް ހޯދުމާއި އެކަމަށް ތަމްރީނުވުންވެސް އެހާމެ މުހިއްމުކަން ފާހަގަ ކުރެއްވިއެވެ.
ހަމައެހެންމެ، މަދަނީ ދިފާޢުގެ ޤާބިލުކަން ދަމަހައްޓައި، އެކަމަށް ތައްޔާރުވެ ތިބުމަށްޓަކައި ހޯދަންޖެހޭ އާލަތްކާއި ވަސީލަތްތައް ހޯދައި، އެކަމަށް ތަމްރީނުވެ ތިބުމަކީ ވެސް ޤައުމީ ދިފާޢި ބާރުގެ ޒިންމާއެއް ކަމުގައެވެ.
މި މޭރުމުން ވާހަކަފުޅު ދައްކަވަމުން އެމަނިކުފާނު ވިދާޅުވީ، އޭރިއާ ކޮމާންޑުތަކުގެ ހިންގުން ދުވަހަކަށްވުރެ ދުވަހެއް ހަރުދަނާކޮށް ރައްޔިތުންނަށް ވީހާވެސް ގާތުން ޚިދުމަތް ދެވޭނެ ގޮތަކަށް އޭރިއާ ކޮމާންޑުތަކުގެ ހެޑްކްއޯޓަރޒްގެ އިތުރުން ކޮމްޕޮސިޓް އައުޓްޕޯސްޓް ތަކާއި ސްޓޭޝަންތަކާއި ފެސިލިޓީސްތައް ޤާއިމުކުރަންޖެހޭ ކަމަށެވެ.
ނޮދަން އޭރިއާ ކޮމާންޑްގެ އައު ހެޑްކުއޯޓަރޒް ޤާއިމް ކުރުމަށްޓަކައި، ހދ.ހަނިމާދޫން ހަތަރު ލައްކަ އަކަފޫޓަށް ވުރެ ބޮޑު ބިމެއް ސަރުކާރުން ވަނީ ހަމަޖައްސަވާދެއްވާފައެވެ.
ހދ.ހަނިމާދޫގައި ޤާއިމްކުރާ ނޮދަން އޭރިއާ ކޮމާންޑްގެ ހެޑްކްއޯޓަރޒްގެ މަސައްކަތްތައް ރޭވިފައިވަނީ ދެ ފޭސްއަކަށް ބަހާލައިގެންނެވެ.
މި ޕްރޮޖެކްޓްގެ މަސައްކަތްތައް ތާވަލް ކުރެވިފައިވާ ގޮތުން، ފޭސް 1 ގެ މަސައްކަތް ފަށާތާ އަށްމަސް ދުވަހުގެ ތެރޭގައި ނިންމުމަށް ވަނީ އެއްބަސްވެފައެވެ.
އެންމެ ފަހުގެ ޒަމާނީ ވަޞީލަތްތަކާއެކު ޤާއިމްކުރާ މި މަރުކަޒުގެ މަސައްކަތްތައް ނިމި، ނޮދަން އޭރިއާ ކޮމާންޑްގެ ހެޑްކުއޯޓަރޒްގެ ދާއިމީ މަރުކަޒަށް ބަދަލުކުރެވުމުން ނޮދަން އޭރިއާ ކޮމާންޑްގެ އަސްކަރީ ޤާބިލްކަށް މިހާރަށްވުރެ އިތުރުވެގެންދާނެއެވެ.
މި ޕްރޮޖެކްޓަކީ ސަރުކާރު ބަޖެޓުން 35 މިލިއަން ރުފިޔާ ޚަރަދު ކުރައްވައިގެން އުތުރުގައި ޤާއިމްކުރާ ސިފައިންގެ އެންމެ ބޮޑު މަރުކަޒެވެ.
