ލޫޓަން ޓައުން ބަލިކޮށް ޗެލްސީ އަށް ފުރަތަމަ މޮޅު

އިނގިރޭސި ޕްރިމިއާ ލީގުގައި ލޫޓަން ޓައުން ބަލިކޮށް، ޗެލްސީގެ މި ސީޒަންގެ ލީގުގެ ފުރަތަމަ މޮޅު ހޯދައިފި އެވެ.

ޗެލްސީގެ އަމިއްލަ ދަނޑު ސްޓެމްފޯޑް ބްރިޖުގައި ހޮނިހިރު ދުވަހު ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މި ސީޒަންގެ ލީގުގެ ފުރަތަމަ މެޗުގައި ޗެލްސީ ނިކުތީ ލިވަޕޫލާ ދެކޮޅަށެވެ. އެ މެޗު ނިމުނީ އެއްވަރުވެގެންނެވެ. ދެ ވަނަ މެޗުގައި ވެސްޓް ހޭމް ޔުނައިޓެޑާ ދެކޮޅަށް ކުޅެ އެ ޓީމު ވަނީ ބަލިވެފަ އެވެ. އައު ކޯޗު މައުރީސިއޯ ޕޮޗެޓީނޯގެ އިރުޝާދުގެ ދަށުން ޕްރިމިއާ ލީގުގައި ޗެލްސީން ފުރަތަމަ މޮޅު ހޯދި މެޗުގައި އެ ޓީމަށް ލީޑު ނަގައިދިނީ ރަހީމް ސްޓާލިން އެވެ. އެއީ މެޗުގެ 17 ވަނަ މިނެޓުގައި މާލޯ ގުސްޓޯ ތަނަވަސްކޮށްދިން ފުރުސަތެއްގައި ސްޓާލިން ޖެހި ލަނޑެކެވެ.

ޗެލްސީގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ. ގުސްޓޯ ތަނަވަސްކޮށްދިން ފުރުސަތެއްގައި، 68 ވަނަ މިނެޓުގައި ދެ ވަނަ ލަނޑު ޖަހައި ލީޑު ފުޅާ ކޮށްދިނީ ވެސް ސްޓާލިން އެވެ. އެ ޓީމުގެ ތިން ވަނަ ލަނޑު 75 ވަނަ މިނެޓުގައި ޖެހީ ނިކޮލަސް ޖެކްސަން އެވެ. އެއީ އޭރިޔާ ބޭރުން ސްޓާލިން ހުރަސްކޮށްދިން ބޯޅައެއް ލޫޓަން ޓައުންގެ ޑިފެންޑަރެއްގެ ކައިރިން ގޯލަށް ވައްދާލައިގެން އޭނާ ކާމިޔާބު ކުރި ލަނޑެކެވެ.

މޮޅާއެކު، ކުޅުނު ތިން މެޗުން ހަތަރު ޕޮއިންޓު ހޯދައިގެން ޗެލްސީ އޮތީ އަށް ވަނައިގަ އެވެ. ލީގުގައި އެ ޓީމަށް ދެން އޮންނާނީ ސެޕްޓެމްބަރު މަހުގެ ދެ ވަނަ ދުވަހު ނޮޓިންހަމް ފޮރެސްޓާ ދެކޮޅަށް ކުޅޭ މެޗެވެ. އޭގެ ކުރިން އޯގަސްޓު މަހުގެ 30 ވަނަ ދުވަހު ކަރަބޯ ކަޕްގެ ދެ ވަނަ ބުރުގައި ޗެލްސީ ކުޅޭނީ ވިލްބްލެޑަނާ ދެކޮޅަށެވެ.