ފޮރުވައިގެން ރަން އެތެރެކުރަން އުޅުނު އިންޑިއާގެ ދެ މީހަކު ޖޫރިމަނާކޮށް ރަން ކަސްޓަމްސްއަށް ނެގުމަށް ހުކުމްކޮށްފިއެވެ.

މި މައްސަލައަކީ އިންޑިއާގެ 2 މީހުން ކަމަށްވާ ރެހާނާ އަލްތޯފް ސެލިޔާ އަދި އަލްތޯފް ސެލިޔާ އަސްލަމްގެ މައްޗަށް ދިވެހިރާއްޖޭގެ ކަސްޓަމްސްގެ ގާނޫނުގެ 97 ވަނަ މާއްދާގެ (ރ) ގެ އުފުލާފައިވާ ދައުވާއެކެވެ.

މި މައްސަލައިގައި ބުނެފައިވަނީ އަލްތޯފް ސެލިޔާ އަސްލަމް 22 ޖުލައި 2023 ވަނަ ދުވަހުގެ ރޭގަނޑު 9:21 އެހާއިރު ވައިގެ މަގުން ދިވެހިރާއްޖެއަށް އައި އިރު އޭނާގެ ކުރިމަތިފަރާތާ ދިމާލުގައި އެއްޗެއް ފޮރުވާފައި ހުރިކަން ކަސްޓަމްސް އިން އޭނާގެ ހަށިގަނޑު ސްކޭން ކުރުމުންނާއި، ބޮޑީ ރަބް ޑައުންކުރުމުން ފާހަގަކުރެވިފައިވާތީ، އޭނާ ތިރިން ލައިގެން ހުރި އަންނައުނު އޭނާ ލައްވާ ބާލުވައިގެން ބަލާ ފާސްކުރި އިރު އޭނާ ލައިގެން ހުރި ޖަންގިޔާގެ އަޑިން ލައިގެން ހުރި އެހެން ޖަންގިޔަލެއް (ކަމަރެއްގެ ގޮތަށް އިން) ގެ ޖީބެއްގެ ތެރޭގައި އޮތް ރަން ޕޭސްޓް އަޅާފައިވާ 2 ޕެކެޓުގައި ޖުމްލަ 2.08 ކިލޯގްރާމް ހުރުމުންނާއި، އޭނާ ރަން އެތެރެކުރިކަމަށް އިއުތިރާފްވެފައިވާތީ އުފުލާފައިވާ ދައުވާއެކެވެ.

މީގެ އިތުރުން ރެހާނާ އަލްތޯފް ސެލިޔާ ހަމަ އެ ފުލައިޓުން އައިސްފައިވާ އިރު، އޭނާގެވެސް ކުރިމަތިފަރާތާ ދިމާލުގައި އެއްޗެއް ފޮރުވާފައި ހުރިކަން ކަސްޓަމްސްއިން އޭނާގެ ހަށިގަނޑު ސްކޭން ކުރުމުންނާއި، ބޮޑީ ރަބް ޑައުންކުރުމުން ފާހަގަކުރެވިފައިވާތީ، އޭނާ ތިރިން ލައިގެން ހުރި އަންނައުނު އޭނާ ލައްވާ ބާލުވައިގެން ބަލާ ފާސްކުރި އިރު އޭނާ ލައިގެން ހުރި ޖަންގިޔާގެ އަޑިން ލައިގެން ހުރި އެހެން ޖަންގިޔަލެއް (ކަމަރެއްގެ ގޮތަށް އިން) ގެ ޖީބެއްގެ ތެރޭގައި އޮތް ރަން ޕޭސްޓް އަޅާފައިވާ 2 ޕެކެޓުގައި ޖުމްލަ 2.08 ކިލޯގްރާމް ހުރުމުންނާއި، އޭނާ ރަން އެތެރެކުރިކަމަށް އިއުތިރާފްވެފައިވާތީ އުފުލާފައިވާ ދައުވާއެކެވެ.

މި ދެމީހުންގެ މައްޗަށް ވެސް ދައުވާ އުފުލާފައިވަނީ ދިވެހިރާއްޖޭގެ ކަސްޓަމްސްގެ ގާނޫނުގެ 97 ވަނަ މާއްދާގެ (ހ) އާއި ހަވާލާދީ އެ މާއްދާގެ (ރ) އާއި (ބ) ގެ ދަށުންނެވެ.

މި ދެމީހުން ވެސް ވަނީ ރަން ހުރިކަން ފާސްކުރި މަރުހަލާގައި އެއްބަސްވެފައެވެ. އަދި މި ދެމީހުންގެ މައްސަލަ ކުރިއަށް ގެންގޮސްފައިވަނީ އަވަސްނިޔާގެ އަޑުއެހުމެއްގެ ގޮތުގައެވެ. މީގެ އިތުރުން ޕްރޮސެކިއުޓަރ ޖެނެރަލްއާއެކު މި ދެމީހުން ވަނީ އިއުތިރާފުގެ އެއްބަސްވުމެއް ވެސް ހަދާފައެވެ.

މި މައްސަލައިގައި ދެމީހުންގެ މައްޗަށް ވަކިވަކިން ކޮށްފައިވާ ހުކުމުގައި ބުނެފައިވަނީ ދިވެހިރާއްޖޭގެ ކަސްޓަމްސް ގާނޫނުގެ 97 ވަނަ މާއްދާގެ (ހ) ގެ ދަށުން ދިވެހިރާއްޖެއަށް ސިއްރުން މުދާ އެތެރެކުރުުމުގެ ކުށުން ކުށްވެރިވެއްޖެ ކަމަށް ކަނޑައަޅައި، ކުށުގެ އުގޫބާތެއްގެ ގޮތުން ކޮންމެ މީހަކު 80،000 ދިވެހި ރުފިޔާއިން ވަނީ ޖޫރިމަނާކޮށްފައެވެ. އަދި މި ފައިސާ މި މަހުގެ 27 ވަނަ ދުވަހުގެ ކުރިން މީރާއަށް ދެއްކުމަށް އަންގާ، މ ދެމީހުން ގެނައި ރަން ކަސްޓަމްސްއަށް ނެގުމަށް ވަނީ އަމުރުކޮށްފައެވެ.