އަމާޒަކީ 2028 ވަނަ އަހަރު އަންނައިރު ރާއްޖެއަށް އަންނަ ފަތުރުވެރިންގެ އަދަދު 3 މިލިއަން ހުރަސްކުރުން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ލޯނު ނަގައިގެން މަސައްކަތްކުރަނީ ލޯނު ދެއްކޭނެކަމުގެ ޔަގީންކަމާއި ކަށަވަރުކަން އޮތީމާކަމަށް ރައީސުލްޖުމްހޫރިއްޔާ އަދި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވި "ޒަމާނަކުން އައި ޒަމާނެކެ މިއީ" ޖަލްސާގައި ވާހަކަފުޅުދައްކަވަމުން ރައީސް ވަނީ ރާއްޖޭގެ އިގްތިޞާދު ދެގުނަ ކުރައްވާނެކަމަށް އެމަނިކުފާނު ވިދާޅުވާ ވިދާޅުވުން ސާފުކޮށްދެއްވާފައެވެ. އެމްޑީޕީ އާއި ގުޅިފައިވާ ސިޔާސީ ޕާޓީތަކުގެ އެންމެ ފަހު ވައުދުކަމުގައިވާ އިގްތިޞާދީ ބޮޑު ބަދަލު ވައުދުގައިވާ ކަންކަން ތައާރަފްކުރުމަށް ކުރިޔަށްގެންދިޔަ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ރާއްޖޭގެ އިގްތިޞާދު ދެގުނަ ނުވަތަ ތިންގުނަ ކުރެވެން އަންނަނީ ފަތުރުވެރިކަން ކުރިއަރުވައިގެންކަމަށެވެ. އެހެންކަމުން އިގްތިޞާދީ ސިޔާސަތު އެންމެ ބޮޑަށް އަމާޒުކޮށްފައިވަނީވެސް އެމަގުންކަމަށް ރައީސް ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓް ބޮޑުކޮށް ހަނިމާދޫ އާއި ގަން އިންޓަރނޭޝަނަލް އެއަރޕޯޓް ބޮޑުކުރުން ސިޔާސަތުގައި އޮތްއިރު މާފަރު އިންޓަރނޭޝަނަލް އެއަރޕޯޓް ބޮޑުކޮށް ޑޮމެސްޓިކް އެއަރޕޯޓްތައް ރާއްޖޭގެ އެކިކަންކޮޅުތަކުގައި ތަރައްގީކުރަމުން އަންނަނީ ރާއްޖެ އަންނަ ފަތުރުވެރިންގެ އަދަދު އިތުރުކުރުންކަމަށް ރައީސް ވިދާޅުވިއެވެ. ރައީސް ވިދާޅުވީ އަމާޒަކީ 2028 ވަނަ އަހަރު އަންނައިރު ރާއްޖެއަށް އަންނަ ފަތުރުވެރިންގެ އަދަދު 3 މިލިއަން ހުރަސްކުރުންކަމަށެވެ.
މިއާއެކު ލިބިވަޑައިގަންނަވާ އެންމެ ބޮޑު އުފަލަކީ ވަޒީފާގެ ފުރުސަތު އިތުރުވެގެންދިޔުންކަމަށް ރައީސް ވިދާޅުވިއެވެ.
ރައީސް ވިދާޅުވީ ފަތުރުވެރިކަން ކުރިއެރުވުމަށް އަމާޒު ހިފާފައިވަނީ ޕްރައިވެޓް ސެކްޓަރ އާއެކުކަމަށެވެ. ވިޔަފާރިކުރަން ބޭނުންވާ ފަރާތްތަކަށް ވީހާވެސް ފަސޭހައިން މާލީ އެހީތެރިކަން ބޭންކު މެދުވެރިކޮށް ހޯދައިދެވޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ އިގްތިޞާދު ދެގުނަ ކުރެވޭނެ ގޮތަކީ މިއީކަމަށާއި ރާއްޖެ ތަރައްގީކުރެވިގެންދާނެ ގޮތަކީ މިއީކަމަށެވެ. މިއަދު ކަށަވަރުކުރެވިގެން މިދަނީ 10 އަހަރު ދުވަހުގެ ތެރޭގައި ރާއްޖޭގެ އިގްތިޞާދު ދެގުނަ ވެގެންދާތަންކަމަށް ރައީސް ވިދާޅުވިއެވެ.
ރައީސް ވިދާޅުވީ ރައްޔިތުން އެދޭފަދަ ތަރައްގީ ގެނެސްދެއްވާނެކަމަށާއި އެކަމުގައި ކުޑަރަށެއް ބޮޑު ރަށެއް ތަފާތުނުކުރައްވާނެކަމަށެވެ.
