މެންޗެސްޓަރ ސިޓީއަށް ކުޅެމުން އައި ސްޕެއިންގެ ޑިފެންޑަރު، އައިމެރިކް ލަޕޯޓް، ސައުދީ ޕްރޯ ލީގުގެ އަލް ނަސްރަށް ސޮއިކޮށްފިއެވެ.

އުމުރުން 29 އަހަރުގެ ޑިފެންޑަރު އަލް ނަސްރަށް ސޮއިކުރީ 23.6 މިލިއަން ޕައުންޑަށެވެ. 2018 ވަނަ އަހަރު އޭނާ އެތުލެޓިކް ބިލްބާއޯ އިން ސިޓީއަށް ބަދަލުވީ އެއިރުގެ ކްލަބް ރެކޯޑެއް ކަމަށްވާ 57 މިލިއަން ޕައުންޑަށެވެ.

ލަޕޯޓް ވަނީ ސިޓީއަށް ޖުމްލަ 12 ތަށި ކާމިޔާބުކުރުމަށް އެހީތެރިވެދީފައެވެ. ނަމަވެސް، ސިޓީއިން ޓްރެބަލް ކާމިޔާބުކުރި ސީޒަނުގައި އޭނާ ކުޅެފައިވަނީ އެންމެ 24 މެޗެވެ. އޭނާގެ ވަދާއީ މެސެޖުގައި އޭނާ ވަނީ ޓީމުގެ ކުޅުންތެރިންނާއި ސަޕޯޓަރުންނަށް ޝުކުރު އަދާކޮށްފައެވެ. އޭނާ ބުނީ ސިޓީއާއެކު ހޭދަކުރި ފަސް އަހަރު ދުވަހަކީ ދުވަހަކުވެސް ހަނދާނުން ފިލާނެ ފަސް އަހަރު ނޫންކަމަށެވެ. އަދި ސިޓީއަށް ކުޅެން ލިބުމަކީ އޭނާއަށް ލިބުނު ބޮޑު ޝަރަފެއް ކަމަށް ބުންޏެވެ.

ލަޕޯޓް ވަނީ ސިޓީއަށް ޖުމްލަ 180 މެޗު ކުޅެދީ، 12 ލަނޑު ޖަހައިދީފައެވެ. އެނާއަށް ކުޅުމުގެ ފުރުސަތު މަދުވީ މިދިޔަ ސީޒަނުން ފެށިގެނެވެ. އެއީ އޭނާގެ ބަދަލުގައި އަކަންޖީ އާއި އަކޭ އަށް ކުޅުމުގެ ފުރުސަތު ދޭން ފެށިފަހުންނެވެ. އަދި މި ހޫނުމޫސުމުގައި 77 މިލިއަން ޕައުންޑަށް ކްރޮއޭޝިއާގެ ޖޮސްކޯ ގްވާޑިއޯލް ގެނައުމާއެކު، ލަޕޯޓްއަށް ކުޅުމުގެ ފުރުސަތު އިތުރަށް މަދުވާނެއެވެ.

ސައުދީ ޕްރޯ ލީގުގެ އަލް ނަސްރަށް އެންމެ ފަހުން ސޮއިކުރި ކުޅުންތެރިޔަކީ ލަޕޯޓެވެ. އެ ޓީމަކީ ފާހަގަކޮށްލެވޭ މަޝްހޫރު ގިނަ ކުޅުންތެރިންތަކެއް ހިމެނޭ ޓީމެކެވެ. އޭގެތެރޭގައި، ކްރިސްޓިއާނޯ ރޮނާލްޑޯ، ސަޑިއޯ މާނޭ، މާސެލޯ ބްރޮޒޮވިޗް، އެލެކްސް ޓެލެސް, އޮޓާވިއޯ އަދި ސެކޯ ފޮފާނާ ހިމެނެއެވެ.

އަލް ނަސްރުން ވަނީ މިދިޔަ ހަފްތާގައި އޭއެފްސީ ޗެމްޕިއަންސް ލީގުގެ ގުރޫޕު ސްޓޭޖުންވެސް ޖާގަ ހޯދާފައެވެ. ލަޕޯޓް ޓީމާ ގުޅުމާއެކު، އޭއެފްސީ ޗެމްޕިއަންސް ލީގަށް ނުކުންނައިރު ޓީމު އިތުރަށް ވަރުގަދަވާނެއެވެ.