ރ. ހުޅުދުއްފާރަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލުކޮށްދެއްވައި، ރައްޔިތުން އެދޭ ތަރައްގީގެ ހުރިހާ މަޝްރޫއުތައް ކުރިއަށް ގެންގޮސްދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހު އެރަށަށް ވަޑައިގެން ބޭއްވެވި ބަނދަރު ބައްދަލުވުމުގައި ވާހަކަފުޅު ދައްވަމުން ރައީސް ވިދާޅުވީ، ރަށުގެ ގިރާ ސަރަހައްދު ހިމާޔަތްކުރުމަށް ވެވަޑައިގެންފައިވާ ވައުދުފުޅާ އެއްގޮތަށް މަސައްކަތްތައް ކުރިއަށްދާނެ ކަމަށާއި، ވަރަށް އަވަހަށް އަމަލީ މަސައްކަތް ފެށިގެންދާނެ ކަމަށެވެ.
ރައީސް ސާލިހު ވިދާޅުވީ ޒަމާނީ ފެންވަރަށް މަގުތައް ތަރައްގީ ކުރުމާއި، ފުޓްބޯޅަ ދަނޑު އެޅުމުގެ މަސައްކަތްވެސް މިހާރު ކުރިއަށްދާ ކަމަށެވެ. އަދި ވިދާޅުވީ ރައްޔިތުން އެދުނު ގޮތަށް ސްކޫލުގައި މަލްޓިޕަރޕަސް ހޯލު އަޅުއްވައިދެއްވައިފި ވާނެކަމަށާއި، އެ މަސައްކަތް ނިމިފައިވާ ކަމަށެވެ.
ހުޅުދުއްފާރުގެ ތަރައްގީއަށްޓަކައި އަޅުގަނޑުމެން ކުރަންޖެހޭ އަދިވެސް އެބަހުރި ބައިވަރު ކަންކަން. ކުރީ ދައުރުގަ ރިޔާސީ އިންތިޚާބުގެ ކެންޕޭނުގަ އަޅުގަނޑުމެން ވައުދުވިން ރަށުގެ ގިރާ ސަރަހައްދު ހިމާޔަތް ކުރުމަށް. މިހާރު އެމަސައްކަތް ވަނީ ކޮންޓްރެކްޓް ކުރެވިފަ. ލަސްތަކެއް ނުވެ އަމަލީ މަސައްކަތް މިރަށުގަ ކުރިއަށްދާތަން ފެނިވަޑައިގަންނަވާނެ. އޭގެ އިތުރުން އަޅުގަނޑުމެން ވައުދުވީ ސްކޫލުގަ މަލްޓިޕަރޕަސް ހޯލެއް އެޅުމަށާ، މަގު ހެދުމަށާ، ފުޓްބޯޅަ ދަނޑެއް ގާއިމްކުރުމަށް. މީ ހުޅުދުއްފާރަށް މިދިޔަ ރިޔާސީ ދައުރުގަ އަޅުގަނޑުމެން ވީ ވައުދު. އޭގެތެރެއިން ސްކޫލުގެ މަލްޓިޕަރޕަސް ހޯލުގެ މަސައްކަތް މިހާރު ވަނީ ނިމިފަ. 3.2 ކިލޯމީޓަރުގެ މަގު ހެދުމުގެ މަޝްރޫއު މިހާރު ކުރިއަށް އެދަނީ.ރައީސުލްޖުމްހޫރިއްޔާ، އިބްރާހީމް މުހައްމަދު ސާލިހު
ހުޅުދުއްފާރުގެ ތަރައްގީގެ މަޝްރޫއުތަކަށް އިޝާރަތް ކުރައްވައި ރައީސް ވިދާޅުވީ، ދެވަނަ ދައުރަށް އެމަނިކުފާނު އިންތިޚާބު ވެވަޑައިގެންފިނަމަ ހުޅުއްދުފާރުގެ ތަރައްގީއަށްޓަކައި އެރަށުގެ ރައްޔިތުން ބޭނުންވާ ކަންތައްތައް ކޮށްދެއްވާނެ ކަމަށެވެ.
އެގޮތުން ބޯހިޔާވަހިކަމަށް ދިމާވެފައިވާ މައްސަލަ ހައްލުކުރުމާއި، ރަށުގެ އިތުރު މަގުތައް ޒަމާނީ ފެންވަރަށް ތަރައްގީ ކުރުމާއި، ބަނދަރު އަޕްގްރޭޑް ކުރުމާއި، ސިއްހީ މަރުކަޒާއި، ފެނަކަ އިންޖީނުގެ އަދި އޮފީހުގެ މަސައްކަތް ހަލުއި ސްޕީޑްގައި ކުރިއަށްގެންދަވައި ނިންމަވާނެކަމުގެ ޔަގީންކަން އެމަނިކުފާނު ދެއްވިއެވެ.
މިރަށުގެ ރައްޔިތުން އެންމެ ބޮޑަށް ބޭނުންވެފަ ވާ އެއްކަމަކީ ބޯހިޔާވަހިކަމަށް ހައްލެއް ހޯދުން. ކުރިއަށް އޮތް ދައުރުގަ މިރަށުގަ އިރާދަކުރެއްވިއްޔާ ބޯހިޔާވަހިކަމަށް ބޭނުންވެފައިވާ ފަރާތްތަކަށް ހައުސިން ޔުނިޓް ނުވަތަ ފްލެޓް މިރަށުގައި އަޅައިދޭނަން. އަދި މިރަށުގަ ރައްޔިތުންނަށް އެއްތަނަކަށް އެއްވެ ބައްދަލުކޮށް ކުޅިވަރުގެ އެކި ވަސީލަތްތައް ބޭނުންހިފޭ ގޮތަށް ކޮމިއުނިޓީ ސެންޓަރެއް މިރަށުގަ އަޅައިދޭނަން. އަދި ސްކޫލަށް އިތުރަށް ބޭނުންވެފަ ވާ ސްކޫލު އޮފީހާ އިތުރު ކްލާސްރޫމްތައް މިރަށުގައި ކުރިއަށް އޮތް ދައުރުގަ އަޅުގަނޑުމެން އަޅައިދޭނަން.ރައީސުލްޖުމްހޫރިއްޔާ، އިބްރާހީމް މުހައްމަދު ސާލިހު
ރައީސް ވިދާޅުވީ ރަށުގެ ތަރައްގީއަށް އިތުރު މަޝްރޫއެއް ބޭނުންވާކަމަށް ވާނަމަ ރައްޔިތުންނާ ކައުންސިލުން މަޝްވަރާ ކުރުމަށްފަހު ހުށަހެޅުމަށް އެދިވަޑައިގަންނަވާ ކަމަށެވެ. އަދި ދެވަނަ ދައުރަށް އިންތިޚާބު ވެވަޑައިގެންފިނަމަ ރައްޔިތުން ހުށަހަޅާފައިވާ ތަރައްގީގެ މަޝްރޫއުތަކުގެ ލިސްޓު ތަރުތީބު ކުރެވި، އެ ލިސްޓާ އެއްގޮތަށް މަސައްކަތްތައް ކުރިއަށްދާނެ ކަމަށް ރައީސް ވިދާޅުވިއެވެ.
