ޕީސީބީގެ އެކްޝަން ޕްލޭނާއެކު، ސަރުކާރު ހިއްސާވާ ކުންފުނިތަކުން ދައުލަތުގެ ބަޖެޓަށް ބަރޯސާވާ މިންވަރު ދަށްކުރުން މުހިންމު - ނިޔާޒީ
24 އޯގަސްޓު 2023 | ބުރާސްފަތި 12:55ނިޔާޒީ ވިދާޅުވީ ކުންފުނިތަކުގެ އެކްސްޓަރނަލް އޮޑިޓް ހަރުދަނާކުރުމަށް އާ ރެގިއުލޭޝަނެއް ތައާރަފްކޮށްފައި ވާކަމަަށް
ޕީސީބީގެ އެކްޝަން ޕްލޭން ތައާރަފްކުރުން
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ އެކްޝަން ޕްލޭނާއެކު, ސަރުކާރު ހިއްސާވާ ކުންފުނިތަކުން ދައުލަތުގެ ބަޖެޓަށް ބަރޯސާވާ މިންވަރު ދަށްކުރުމަކީ މުހިންމު ކަމެއް ކަމަށް އޮޑިޓަރ ޖެނެރަލް ހުސައިން ނިޔާޒީ ވިދާޅުވެއްޖެއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ކުރިއަށް އޮތް 5 އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ނިޔާޒީ ވިދާޅުވީ، މި އެކްޝަން ޕްލޭންގެ އަލީގައި ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކުރުމަށް މަގުފަހިވެގެންދާނެއެވެ. އަދި އެ ސްޓްރެޓީޖިކް ޕްލޭނަކީ ޕީސީބީގެ މަސައްކަތްތަކާއި ސަރުކާރު ހިއްސާވާ ކުންފުނިތަކުގެ ގަވަނަންސް އެއް އަމާޒަކަށް ކުރިއަށްގެންދިއުމަށް މަގުފަހިވާނެ ކަމެއް ކަމަށްވެސް ނިޔާޒީ ވިދާޅުވިއެވެ. އެފަދަ ޕްލޭނެއް އެކުލަވާލުމަކީ އުފާވެރި ކަމެއްކަން ފާހަގަކުރައްވައި ނިޔާޒީ ވިދާޅުވީ އެ ޕްލޭންގައި ހިމެނޭ ކަންކަން ހާސިލްކުރެވޭނީ އެންމެން އެކުގައި ގުޅިގެން ކުރާ މަސައްކަތްތަކުގެ އަލީގައި ކަމަށެވެ.
މީގެ އިތުރުން ކުންފުނިތަކުގެ ހިންގުން ހަރުދަނާކުރުމަށް އެކައުންޓެންޓުންނާއި ރަނގަޅު އޮޑިޓަރުން އަދާކުރާ މުހިންމު ދައުރު ނިޔާޒީ ވަނީ ފާހަގަކުރައްވާފައެވެ. އެހެންކަމުން ޕީސީބީގެ މަސައްކަތްތައް ކުރިއެރުވުމަށް ޗާޓާޑް އެކައުންޓެންޓުންގެ ފަރާތުން ވެސް ކުރެވެން ހުރި ހުރިހާ ކަމެއް ކޮށްދެއްވާނެ ކަމަށް ނިޔާޒީ ވަނީ ވިދާޅުވެފައެވެ. އަދި އެކްޝަން ޕްލޭންގައި ހިމެނޭ ކަންކަން ހާސިލްކުރުމަށް ބޭނުންވާ ފަންޑާއި އެއިޑް، ކަމާބެހޭ ފަރާތްތަކުން ހޯއްދަވައިދެއްވާނެ ކަމަށް އުންމީދުކުރައްވާ ކަމަށް ނިޔާޒީ ވިދާޅުވިއެވެ. އަދި ޕީސީބީން އޮޑިޓަރ ޖެނެރަލްގެ އޮފީހާއެކު ވަރަށް ގާތުން މަސައްކަތްކުރާ ކަމަށާއި، ޕީސީބީގެ މަސައްކަތަށް ކާމިޔާބަށް އެދޭ ކަމަށްވެސް ނިޔާޒީ ވަނީ ވިދާޅުވެފައެވެ.
ނިޔާޒީ ވިދާޅުވީ ކުންފުނިތަކުގެ އެކްސްޓަރނަލް އޮޑިޓް ހަރުދަނާކުރުމަށް އާ ރެގިއުލޭޝަނެއް ތައާރަފްކޮށްފައި ވާކަމަށެވެ. އެކްސްޓަރނަލް އޮޑިޓަރުންނަށް އޭގެ ތެރެއިން އިތުރު ޒިންމާތަކެއް ކަނޑައަޅާފައި ވާނެކަމަށްވެސް އޭނާ ވިދާޅުވިއެވެ.
ޕީސީބީގެ 2024ން 2028 ވަނަ އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހްކޮށްދެއްވީ އޮޑިޓަރ ޖެނެރަލް ހުސައިން ނިޔާޒީއެވެ.
