ސައޫދީ އަރަބިއްޔާގެ އަލް އިއްތިހާދުގެ ތެރޭގައި މައްސަލަތައް ގިނަވެ، ކޯޗު ނޫނޫ އެސްޕިރޯޓޯ ސަންޓޯ އާއި ފްރާންސްގެ ފޯވަޑް ކަރީމް ބެންޒެމާގެ ގުޅުން ގޯސްވެއްޖެ އެވެ.
ސައޫދީ މީޑިއާތަކުން ބުނަނީ ކޯޗާއި ކުޅުންތެރިންގެ މެދުގައި މައްސަލަ ޖެހިފައިވާއިރު އެންމެ ބޮޑަށް ހިޔާލު ތަފާތުވެފައިވަނީ ޓީމަށް ގެންނާނެ ނުވަތަ ގެނެސްފައިވާ ކުޅުންތެރިންނާމެދުގަ އެވެ.
މި ގޮތުން ރެއާލް މެޑްރިޑްގެ ކެޕްޓަންކަން ކުރި ބެންޒެމާ އަކީ ނޫނޯގެ އިރުޝާދާއި ނުލައި ގެނައި ކުޅުންތެރިއެއް ކަމަށްވެ އެވެ. އަދި އޭނާ އަކީ ނޫނޯގެ ޕްލޭނަށް ފެތޭ ކުޅުންތެރިއަކަށްވެސް ނުވާ ކަމަށެވެ. މީގެ އިތުރުން ކުލަބުގެ ކެޕްޓަންކަން ދިނުމަށް ބެންޒެމާ އެދުނު ކަމަށް ވެސް މީޑިއާތަކުން ބުނެ އެވެ. ނަމަވެސް ނޫނޯ ނިންމީ ކެޕްޓަންކަން ރޮމާރީނިއޯ އާއި އަހްމަދު ޝަރަހިލީ އަށް ދިނުމަށެވެ.
ސައޫދީ އަރަބިއްޔާގެ ދެ މީޑިއާއަކުން ބުނަނީ ކޯޗު ނޫނޯއާ މައްސަލަ ޖެހުމުން ވީ އެންމެ އަވަހަކަށް މައްސަލަ ހައްލުކުރަން ބެންޒެމާ އެދިފައިވާ ކަމަށެވެ. ނަމަވެސް އެއީ ކޮން ކަހަލަ ހައްލެއް ކަމެއް ނޫސްތަކުން ނުބުނެ އެވެ.
ސައޫދީ ލީގު ވަރުގަދަ ކުރުމަށް ޔޫރަޕުގެ ތަރިން އެ ލީގަށް ގެންނަން ފެށުމާއެކު އިއްތިހާދުން ވެސް ވަނީ މޮޅު ކުޅުންތެރިންތަކެއް ހޯދައިފަ އެވެ. އޭގެ ތެރޭގައި ބެންޒެމާ އާއި ޗެލްސީ އަށް ކުޅުނު އެންގޯލޯ ކާންޓޭ އާއި ޕެޑްރޯ ނެވާސް އާއި ލިވަޕޫލަށް ކުޅުނު ބްރެޒިލްގެ ފަބީނިއޯ ހިމެނެ އެވެ. އަދި ކޯޗު ނޫނޯ ގެނައީ ވެސް މި ސީޒަނަށެވެ. އޭނާ އަކީ ބެންޒެމާ އާއި ކާންޓޭ އާއި ފަބީނިއޯ ފަދައިން ޔޫރަޕުގައި ކާމިޔާބީތަކެއް ހޯދާފައިވާ ކޯޗެއްނޫނެވެ. ނަމަވެސް ސައޫދީ ލީގުގައި ކޮންމެ ޓީމެއް ދެ މެޗު މިހާތަނަށް ކުޅުނުއިރު ބެންޒެމާ އަށް އަދި ގޯލެއް ނުޖެހެ އެވެ.
