އަސާސީ ޚިދުމަތްތައް ދޭ ކުންފުނިތަކުން ދޭ ވަޒީފާތައް އިތުރުކުރަން ޖެހޭ
އެމްޑީއޭގެ ރައީސް އަހްމަދު ސިޔާމް ވާހަކަދައްކަވަނީ
ރާއްޖޭގެ އިގްތިސާދީ މައިތަނބު ނުވެއްޓޭނެ ހުރިހާ ގޮތަކަށް މިސަރުކާރުން ދަނީ މަސައްކަތް ކުރަމުން ކަމަށް އެމްޑީއޭގެ ރައީސް އަހްމަދު ސިޔާމް ވިދާޅުވެއްޖެއެވެ.
ރ. ދުވާފަރުގައި ކުރިއަށް ގެންދިޔަ އުފާވެރި އަމާންރާއްޖެ ޖަލްސާގައި ފަތުރުވެރިކަމުގެ ސިނާއަތަށް ލިބެމުންދާ ކުރިއެރުންތައް ފާހަގަކުރައްވައި ސިޔާމް ވިދާޅުވީ ރާއްޖޭގެ އިގްތިސާދު އެންމެ މުހިންމު ތަނބު ނުވެއްޓޭނެ ގޮތަކަށް މިސަރުކާރުން ހިފަހައްޓަމުންދާ ކަމަށެވެ. އަދި އެކި ދިމާދިމާލުގައި ކައްޗަށް، އަރިއަށް ވެސް ތަނބު ޖަހާ އެމައިތަނބު ހިފަހައްޓާ ކަމަށާއި، އެމަސައްކަތް ކުރައްވަނީ ރައީސް އިބްރާހިމް މުހައްމަދު ޞާލިހު ކަމަށް ސިޔާމް ވިދާޅުވިއެވެ.
ވާދަވެރިންނަށް އިޝާރަތްކުރައްވައި ސިޔާމް ވިދާޅުވީ ފެނަކައިން ސްޓެލްކޯ ފަދަ ކުންފުނިތަކުން މާގިނަ ވަޒީފާތައް ރައްޔިތުންނަށް ދެމުންދާކަމަށް ބުނާ ކަމަށެވެ. ނަމަވެސް އެއީ މައްސަލައެއް ނޫން ކަމަށާއި، އަސާސީ ޚިދުމަތްތައް ދޭ މިފަދަ ކުންފުނިތަކުން ދޭ ވަޒީފާތައް އިތުރުކުރަން ޖެހޭ ކަމަށް ސިޔާމް ވިދާޅުވިއެވެ.
ސިޔާމް ވިދާޅުވީ ޔޫރަޕް، އޭޝިޔާ އަދި އެފްރިކާއިން ކުރިއަރާފައިވާ ގައުމުތަކުން ފެނާއި ކަރަންޓާއި ނަރުދަމާގެ ޚިދުމަތްތައް ރައްޔިތުންނަށް ފޯރުކޮށްދެނީ ވަރަށް ކުޑަ އަގެއް ކަމަށެވެ. އެގައުމުތަކުގެ ރައްޔިތުން މުސާރައިން 5 އިންސައްތަ ވެސް ހަރަދުކުރަން ނުޖެހޭ ކަމަށް ސިޔާމް ވިދާޅުވިއެވެ. ނަމަވެސް ރާއްޖޭގައި 2018ގެ ކުރިން މިފަދަ ޚިދުމަތްތައް ރަނގަޅަށް ނުދެވޭތަނުގައި ބިލް ދެއްކުމަށް ބުރައަކަށް ވެފައިވާކަމަށް ސިޔާމް ވިދާޅުވިއެވެ. މިފަދަ ހުރިހާ ޚިދުމަތެއް އެންމެ ފުރިހަމައަށް ހޯދުމަށް ދެވަނަ ދައުރަކަށް ރައީސް ޞާލިހު އިންތިޚާބު ކުރަންޖެހޭ ކަމަށް ސިޔާމް ވިދާޅުވިއެވެ.
