މެންޗެސްޓަރ ޔުނައިޓެޑުގެ މިޑްފީލްޑަރު، މޭސަން މައުންޓް އަށް އަނިޔާވެ، ކުރިޔަށް އޮތް ދެ މެޗުގައި ނުކުޅެވޭނެކަމަށް އެ ޓީމުން ބުނެފިއެވެ.

މައުންޓް އަށް އަނިޔާވެފައިވަނީ ޓޮޓެންހަމް ކައިރިން 2-0 ން ބަލިވި މެޗުގައެވެ. އަނިޔާގެ ސަބަބުން ދެން އޭނާއަށް ކުޅެވޭނެ ކަމަށް ބެލެވެނީ އިންޓަނޭޝަނަލް ބްރޭކަށްފަހުއެވެ. އަދި ސެޕްޓެންބަރު ނުވަވަނަ ދުވަހު ޔޫކްރެއިންއާ ދެކޮޅަށް އިންގްލެންޑް ކުޅޭ ޔޫރޯ ކޮލިފައިން މެޗުގައިވެސް އޭނާއަށް ކުޅެވުމުގެ ފުރުސަތު ކުޑައެވެ.

ޗެލްސީން މެންޗެސްޓަރ ޔުނައިޓެޑަށް މައުންޓް ބަދަލުވީ މިދިޔަ ޖޫން މަހު 55 މިލިއަން ޕައުންޑަށެވެ. އެޔަށްފަހު، ކޯޗު އެރިކް ޓެން ހާގް ވަނީ ޕްރިމިއަރ ލީގުގެ ފުރަތަމަ ދެ މެޗުގައިވެސް އޭނާއަށް ފުރުސަތު ދީފައެވެ. ނަމަވެސް، އޭނާއަށް އަދި އެންމެ އެދެވޭ ކުޅުމެއް ދެއްކިފައެއް ނުވެއެވެ. ވޮލްވްސް ކައިރިން 1-0 ން މޮޅުވި މެޗުގެ 68 ވަނަ މިނެޓުގައި އޭނާ ވަނީ ބަދަލުކޮށްފައެވެ.

ސެޕްޓެންބަރު މަހުގެ ތިންވަނަ ދުވަހު އާސެނަލްއާ ދެކޮޅަށް ނިކުތުމުގެ ކުރިން، ހޮނިހިރު ދުވަހު ޔުނައިޓެޑު ނިކުންނާނީ ނޮޓިންހަމް ފޮރެސްޓާ ދެކޮޅަށެވެ.