ހުޅުމާލޭގައި ޓޫރިސްޓް ބީޗެއް ތަރައްޤީކުރަން އެއްބަސްވުމެއްގައި ސޮއިކޮށްފި
އެތަން ފަރުމާ ކުރުމުގައި މިނިސްޓްރީގެ ޓެކްނިކަލް ޓީމާއި އާބަންކޯގެ ޓީމުން ބައިވެރިވެފައިވޭ
ހުޅުމާލޭގައި ޓޫރިސްޓް ބީޗެއް ހެދުމަށް ޓޫރިޒަމް މިނިސްޓްރީއާއި އާބަންކޯ އާ ދެމެދު އެއްބަސްވުމުގައި ސޮއިކުރުން
ހުޅުމާލޭގައި ޓޫރިސްޓް ބީޗެއް ހެދުމަށް ޓޫރިޒަމް މިނިސްޓްރީއާއި އާބަންކޯއާ ދެމެދު އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި އާބަންކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު އާތިފްއެވެ. ޓޫރިޒަމް މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޕާމަނަންޓް ސެކެޓްރީ ފާތިމަތު ނިލްފާއެެވެ. އެއްބަސްވުމުގައި ސޮއިކުރުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވީ ފަތުރުވެރިކަމުގެ ދާއިރާ މިހާރު ވެސް ތަރައްޤީ ކުރަމުން އަންނަނީ ދިވެހިންނާއި ފަތުރުވެރިންނާ ދެމެދު އަރާރުން ވުމެއް އުފެދިގެން ނުދާނޭ ގޮތައް ކަމުގައެވެ.
މިނިސްޓަރު ވިދާޅުވީ އެތަން ފަރުމާ ކުރުމުގައި މިނިސްޓްރީގެ ޓެކްނިކަލް ޓީމާއި އާބަންކޯގެ ޓީމުން ބައިވެރިވެފައިވާ ކަމަށެވެ.
އާބަންކޯގެ އެމްޑީއާ އާތިފް ވިދާޅުވީ މި ބީޗަކީ ގިނަ ބައެއްގެ ޝަކުވާއަށް ހައްލެއް ގެނައުމަށް ހިންގާ މަޝްރޫއެއް ކަމަށެވެ.
ބީޗު ތަރައްޤީ ކުރަނީ، ހުޅުމާލޭ ފުރަތަމަ ފިޔަވަހީގެ ވޯޓާ ތީމް ޕާކާއި އެމްޓީސީސީގެ ބަސް ސްޓޮޕްގެ ފުރަގަހުގައެވެ. އެތަނުގައި ބީޗު ހަދަނީ، އެ ސަރަހައްދަކީ އާންމު ރައްޔިތުނާ ތަންކޮޅެއް ދުރު، ދެބައިމީހުންނަށް ވެސް އެއްވެސް އުނދަގުލެއް ނުވާނޭ ސަރަހައްދަކަށް ވުމުން ކަމަށް އާބަންކޯއިން ބުނެއެވެ.
އެ ތަން ނިމޭއިރު، ބީޗެއްގައި ފަތުރުވެރިން ބޭނުންވާނެ އޯޕެން ޝަވާ، ޓޮއިލެޓް ބްލޮކްސް ފަދަ އެތައް ޚިދުމަތްތަކެއް ލިބެން ހުންނާނެއެވެ.
